Ko ʻEtau Tafaʻakí
Naʻe ʻAfioʻi ʻe he ʻOtuá ʻEku Loto-mamahí
Fai ʻe Danelys W. Rodriguéz, Lepāpulika Tominikení
ʻI ha Sāpate ʻe taha ʻi he lotú, naʻá ku fakatokangaʻi ai kuó u mei ʻosi mei he houalotu Finemuí pea ʻe vave pē haʻaku kau ki he houalotu Taautaha Kei Talavoú. Naʻá ku loto-mamahi he naʻá ku ʻiloʻi ʻe lahi e ngaahi liliu ʻe hokó. Ne u feinga ke u ongoʻi fiefia hili e Lautohi faka-Sāpaté, ka naʻe ʻikai pē ke u lava. Ne u feinga ke u fakakaukau ʻoku finangalo e Tamai Hēvaní ke u fiefia kae ʻoua ʻe loto-mamahi (vakai, 2 Nīfai 2:25).
ʻI he ʻamanaki pē ke u tangi ki hoku kaungāmeʻá ʻi he holó naʻe haʻu ʻa e kalake fakauōtí ʻo pehē mai, “Sisitā Tanelisi, ko hoʻo meilí ʻeni!” Naʻá ne mono mai ha sila hinehina naʻe tohi ai hoku hingoá. Ne u fie ʻilo pe ko e hā e tohí, ko ia ne u ʻeke ange ki he kalaké pe ko e tohi meia hai. Naʻá ne tali mai ʻi heʻene tafoki ke ʻalú, ko e ʻomai mei he pēteliaké pea ko ha tatau ia hoku tāpuaki fakapēteliaké. Ne u tangi, ka ne u tangi ʻi he fiefia koeʻuhí ne u ʻiloʻi naʻe ʻafioʻi ʻe he ʻOtuá hoku loto-mamahí pea naʻá Ne ʻomi ha founga ke u fiefia ai. Naʻe faifai pea maʻu mai ha tatau ʻo hoku tāpuaki fakapēteliaké, ʻi he taimi totonu pē ne u fuʻu fie maʻu ai iá.
ʻI heʻeku aʻu ki ʻapi ʻo lau iá, ne u toe tangi pea ne u lotu ʻo fakamālō ki he ʻOtuá koeʻuhí ko hoku tāpuakí pea mo ʻEne tokoni ke u manatuʻi ʻeku monūʻia ke u hoko ko Hano ʻofefiné pea maʻu foki mo e maama ʻo e ongoongolelei taʻengatá ʻi heʻeku moʻuí.
Ko e taimi ʻoku ou loto-mamahi aí, neongo ʻoku ʻikai mahino kiate au ʻi he taimi ko iá, ka ʻoku ou ʻiloʻi ʻe tokoni mai ʻa e ʻOtuá ke u fiefia. Naʻá ku ʻiloʻi ʻeni ʻi he ʻofa ʻoku foaki ʻe he ʻOtuá ki heʻeku moʻuí. ʻOkú Ne foaki ʻa e ʻofa ko ʻení ki he tokotaha kotoa pē, pea ko hotau fatongia ia ke tali ʻa e ongo fakaofo ko ʻení. Te tau lava ʻo ikunaʻi e ngaahi ʻahiʻahí ʻi he fakahinohino ʻa e ʻOtuá. Te tau lava ʻo malimali pea fiefia.
Tā valivali ʻa Ben Simonsen
Ko e Potufolofola ʻOku ou Manako Taha Aí
Fai ʻe Kwamena Koomson, Kana
ʻOku tokoni ʻa e potufolofola ko ʻení ke fakamahino kiate au ʻoku ngata pē ʻi heʻetau fakatefito ʻetau moʻuí ʻia Sīsū Kalaisí te tau lava ai ʻo ikunaʻi ʻa e filí. Naʻa mo e taimi ʻoku hoko ai e ngaahi faingataʻá, kapau ʻoku tau langa ʻi he maka ʻo Sīsū Kalaisí, ʻoku malava e meʻa kotoa pē.
Kuo tokoni ʻa e potufolofola ko ʻení ke u kei loto-toʻa pē lolotonga e ngaahi faingataʻá.
ʻOku ou ʻiloʻi ʻoku moʻui ʻa e ʻOtuá pea naʻá Ne foaki mai Hono ʻAlo Tofu Pē Taha naʻe Fakatupú ki he māmaní ke huhuʻi ʻa e ngaahi angahala ʻa e faʻahinga ʻo e tangatá.