Kapau naʻá ku faivelenga ʻi he maama fakalaumālié, ko e hā ʻoku faingataʻa ai ke faivelenga he taimi ní?

Ko e kakai kotoa pē ʻoku haʻu ki he māmaní naʻa nau fili ʻi he maama fakalaumālié ke muimui ki he palani ʻa e Tamai Hēvaní mo tali ʻa Sīsū Kalaisi ko e Fakamoʻuí. Ka ʻoku ʻikai ʻuhinga ia ʻe faingofua pē ʻa e talangofuá mo e anga māʻoniʻoní ʻi he moʻuí ni. Kuo toʻo ʻetau manatu ki he maama fakalaumālié, koeʻuhí he ʻoku fakataumuʻa e palani ʻa e Tamai Hēvaní ke siviʻi moʻoni e founga te tau ngāue ʻaki ʻetau tauʻatāina ke filí ʻi he moʻuí ni. Ko ha konga foki ʻe taha ʻo ʻEne palaní ke tau maʻu ha sino fakamatelie, ʻa ia ʻoku moʻulaloa ki he ngaahi uʻa, ngaahi holi, mo e ngaahi ʻahiʻahi naʻe ʻikai ke tau ʻilo ʻi heʻetau kei hoko ko ha ngaahi laumālié. ʻOku hoko ʻeni ke faingofua ange hono fakatauveleʻi kitautolu ʻe he ngaahi meʻa ʻoku “anga-fakakakano, faʻa holi kovi, mo anga-fakatēvolo” (Mōsese 5:13), ʻa ia ko hono ʻuhinga ia ʻo e “ko e tangata fakakakanó ko e fili ia ki he ʻOtuá” (Mōsaia 3:19).

ʻE lava ʻe ha taha ke ne ikunaʻi e ngaahi faingataʻa ko ʻení ʻo kapau te ne “talangofua ki he ngaahi fakahinohino ʻa e Laumālie Māʻoniʻoní, pea liʻaki ʻa e tangata fakakakanó kae hoko ko ha tangata māʻoniʻoni ʻi he fakalelei ʻa Kalaisi ko e ʻEikí” (Mōsaia 3:19). ʻOku ʻikai ke faingofua, ka ʻe fakamālohia mo liliu koe ʻe Sīsū Kalaisi ʻi hoʻo fakafanongo ki he Laumālié, fai ʻa e ngaahi fili ʻoku leleí, pea haʻu kiate Iá.