Pōpoaki ʻa e Faiako ʻAʻahí
Ko ha Fatongia Toputapu ʻa e Tuʻunga Fakaemātuʻá
Ako ʻi he faʻa lotu ʻa e fakamatala ko ʻení pea fekumi ke maʻu ha ueʻi fakalaumālie ke ʻiloʻi ʻa e meʻa ke vahevahé. ʻE fakatupulaki fēfē ʻe he mahino ʻa e “Ko e Fāmilí: Ko ha Fanongonongo ki Māmaní” ʻa hoʻo tui ki he ʻOtuá mo faitāpuekina ʻa kinautolu ʻokú ke tokangaʻi ʻi he faiako ʻaʻahí? Ke maʻu ha fakamatala lahi ange, ʻalu ki he reliefsociety.lds.org.
Tuí, Fāmilí, Fakafiemālié
Naʻe faʻu ʻe he Tamai Hēvaní ʻa e ngaahi fāmilí ke tokoniʻi kitautolu ke akoʻi e ngaahi tefitoʻi moʻoni ʻoku totonú ʻi ha ʻātakai ʻofa. Naʻe pehē ʻe Palesiteni Tōmasi S. Monisoni: “Lea lelei ki hoʻo kiʻi tamasiʻí pea fāʻofua ki ai; toutou lea ange, ‘ʻOku ou ʻofa ʻiate koe’; toutou fakahā kiate ia hoʻo houngaʻiá. ʻOua naʻa teitei ʻai ke mahuʻinga ange ha palopalema ʻoku teu ke fakaleleiʻi ʻi ha taha ʻoku totonu ke ‘ofaʻi.”1
Naʻe akoʻi ʻe Sūsana W. Tena, palesiteni lahi mālōlō ʻo e Kau Finemuí: “ʻOku fakafōtunga ʻe he Tamai ʻi Hēvaní ʻa e sīpinga ʻoku totonu ke tau muimui aí. ʻOkú Ne ʻofaʻi, akoʻi, kātakiʻi, mo tuku mai kiate kitautolu ʻetau tauʻatāina ke filí. … Ko e taimi ʻe niʻihi ʻoku fetoʻoaki ʻa e tauteá, ʻa ia ʻoku ʻuhinga ‘ke akoʻí,’ mo e fakaangá. ʻOku fakatupulaki lahi ange ʻe he fānaú—pea pehē ki he kakai kotoa pē—ʻa e ʻulungāngá mei he ʻofá mo e poupoú ʻi he kumi fehalākí.”2
Naʻe pehē ʻe ʻEletā Kuenitini L. Kuki ʻo e Kōlomu ʻo e Kau ʻAposetolo ʻe Toko Hongofulu Mā Uá, “Kapau te tau fakahoko faivelenga e lotu fakafāmilí, ako folofolá, efiafi fakafāmili ʻi ʻapí, tāpuaki ʻo e lakanga fakataulaʻeikí, [mo e] tauhi ʻo e ʻaho Sāpaté ke māʻoniʻoní, ʻe … mateuteu ai [ʻetau fānaú] ki ha ʻapi taʻengata ʻi he langí, ʻo tatau ai pē pe ko e hā e meʻa ʻe hoko kiate kinautolú ʻi ha māmani faingataʻa.”3
Ngaahi Potufolofola Kehé
1 Nīfai 8:37; 3 Nīfai 22:13; Tokāteline mo e Ngaahi Fuakava 93:40; 121:41
Ngaahi Talanoa ʻa e Kakai Moʻuí
Naʻe pehē ʻe ʻEletā Lōpeti D. Heili ʻo e Kōlomu ʻo e Kau ʻAposetolo ʻe Toko Hongofulu Mā Uá, “Naʻe fai haʻaku lau nusipepa pea ʻunuʻunu mai ha taha hoku makapuná…ʻI heʻeku heʻeku lau tohí, naʻá ku fiefia ke fanongo ki hono kiʻi leʻó ʻokú ne fakatalanoa hake. Ne fakaʻohovale ʻa e hili ha ngaahi momeniti, naʻá ne fakahaohao hake ʻi hoku vahaʻa mo e nusipepá. Naʻá ne ala mai ʻo fakahanga atu au kiate ia peá ne ʻuma mai mo ne fehuʻi, ‘Kulenipā! ʻOkú ke ʻi hena?’
“… Ko ʻete tokangá ʻoku ʻuhinga ia ki heʻete ʻiloʻi e loto ʻo e toʻu tupú pea fengāueʻaki mo kinautolu. Ko e fengāueʻaki mo kinautolú ʻoku ʻikai ko e fetalanoaʻaki pē ka ko e ngāue fakataha mo kinautolu. …
“Kuo pau ke tau palani pea fakaʻaongaʻi lelei ʻa e ngaahi faingamālie akonaki. …
“… ʻI he lōloa ange ʻeku moʻuí, ko e lahi ange ia ʻeku fakatokangaʻi e ngaahi taimi akonaki ʻi heʻeku kei tupu haké, tautautefito ki he ngaahi akonaki ʻa ʻeku mātuʻá, kuó ne liliu ʻeku moʻuí peá u aʻusia ai e tuʻunga lolotongá.”4