Leʻo ʻo e Kau Māʻoniʻoni ʻi he Ngaahi ʻAho Kimui Ní
Vilitaki Atu Ki Muʻa ʻi he Fakafiefiemālié
Tā fakatātā ʻa Allen Garns
Ko e ngaahi ʻekitivitī fakamālohisino hangē ko e lue laló, ʻaka pasikalá mo e sikií ʻoku fuʻu mahuʻinga ia kiate au. Naʻe ongo kiate au, kimuí ni mai, ʻa e founga ʻoku tatau ai ʻetau moʻui ʻi he māmaní mo e taimi ʻoku ou fakamoleki ki he ʻekitivitī fakamālohisinó. ʻOku ou faʻa tokanga taha pē ki hono fakamālohia hoku iví mo e taukeí ʻi ha foʻi ʻekitivitī ʻe taha ʻi ha vahaʻa taimi pau. Pea ʻi haʻaku fili, pe tupukoso hake pē, pe ko ha fakaafe, ʻoku ou fetongi leva ʻo fakahoko ha ʻekitivitī ʻe taha. Neongo pe ʻe fēfē haʻaku loto-falala ki ha faʻahinga fakamālohisino fakatupu moʻui lelei, ka ko ʻeku liliu pē ʻo fai ha fakamālohisino foʻoú, ʻoku ongosia vave hoku sinó, tō nounou ʻeku taumuʻá, peá u ongoʻi e ngaahi uoua ne teʻeki te u “teitei ongoʻi ki muʻa.” ʻOku ou fakahoko e fakamālohisino foʻou ko iá peá u toe langa hake leva ʻa e mateaki mo e taukei ʻoku fie maʻu ke u maʻú.
ʻOku hoko e meʻa tatau pē ʻi he moʻuí, ʻoku tau faʻa tokanga taha pē ki ha ngaahi ʻulungāanga pau, ʻoku tau ongoʻi fiemālie ai. Pea koeʻuhí ko hatau fili, koeʻuhí ko ha fie maʻu pē ke fai ha liliu, pe ʻi ha fakaafeʻi kitautolu ʻe ha taha ke fai ha liliu, ʻoku hoko leva e taimi ko ia ʻoku tau ongoʻi fiemālie ai heʻetau tuʻunga fakalakalaká ko ha taimi ʻo e faingataʻa mo ha faingamālie ke tupulaki ai.
ʻOku lava ke hoko e fehangahangai mo e ngaahi pole ʻo e moʻuí ko ha ngāue faingataʻa. ʻOku fakalotolahi mai ‘e Nīfai ʻo pehē: “Ke mou vivili atu ki muʻa ‘i he tui mālohi kia Kalaisi, pea maʻu ‘a e ‘amanaki ‘oku mālohi haohaoa, mo ha ‘ofa ki he ‘Otuá mo e kakai fulipē. Ko ia, kapau te mou vilitaki atu, pea keinanga ‘i he folofola ‘a Kalaisí, pea kātaki ki he ngataʻangá, vakai, ‘oku folofola ‘e he Tamaí: Te mou maʻu ‘a e moʻui taʻengatá” (2 Nīfai 31:20).
ʻOku ou fifili he taimi ʻe niʻihi, mahalo pē naʻe fakalata ʻetau nofo taʻe fakangatangata ʻi he maama fakalaumālié, ʻo fakafanongo ki he talanoa ʻe he Tamai Hēvaní kau ki Heʻene palani lahi ʻo e fiefiá. Ka neongo iá, naʻe fie maʻu ki heʻetau fakalakalaká ha “loki ako”—māmaní—koeʻuhí ka tau lava ʻo aʻusia e moʻui fakamatelié ʻiate kitautolu pē.
ʻI heʻeku fakamoʻoni ki he moʻoni mo e fie maʻu pau ki he palani ʻa e Tamai Hēvaní, kuo akonakiʻi ʻe he ngaahi faingamālie foʻoú mo e ngaahi aʻusia fakamamahí ʻa e fakakaukau ko ʻení koeʻuhí ke u moʻui ʻaki. ʻOku hangē ʻoku tau ako fakakongokonga pē ʻa e moʻoni ʻo e ongoongoleleí, ʻo toutou ako ʻa e kaveinga tatau pē. ʻOku ou faʻa fehuʻia he taimi ʻe niʻihi ʻo pehē, “Ko e hā fua e meʻa ʻoku fie maʻu ke tau akó?” Pe, hangē ko e fakamālohisino moʻui leleí, “Ko e hā fua e ngaahi uoua ʻoku fie maʻu ke u ueʻí?”
Ka ʻi he liliu ʻa e moʻuí ʻi he founga tatau pē ʻoku feliliuaki ai e ngaahi faʻahitaʻú, ʻoku ou ʻilo kuo pau ke ʻomi ʻe he ʻEikí e ngaahi taukei ʻoku ou fie maʻú. Pea ʻi heʻeku vilitaki atu ki muʻá, te u ako ai ke u hoko ʻo hangē pē ko Iá pea toe foki hake ki Hono ʻaó.