Ko e Hala Fē Te U Filí?
Naʻe lea taʻetaau maʻu pē ʻa Hena ʻi he ʻaho kotoa pē.
Ko ʻeku fuofua ʻaho ia ʻi hoku ʻapiako foʻoú. Naʻá ku manako ke fakamaheni ki he niʻihi kehé pea naʻá ku poto hono fai iá. Naʻá ku aʻu ki hoku loki akó ʻo sio ki he kātoa ʻo e kakaí. Naʻá ku pehē te u fiefia ʻi he taʻú ni. Ne u tangutu mo hoku ngaahi kaungāmeʻa foʻoú, lolotonga e maʻu meʻatokoni hoʻataá, ʻi he tafaʻaki ʻo ha kiʻi taʻahine mei he kalasi ʻe tahá. Ko hono hingoá ko Hena. ʻI heʻeku tangutu ki laló, naʻe pehē mai ʻe Hena, “Mani, meʻa namukū moʻoni ho suú. Ne u fifili pe ko e kapa vevé pe ko hoʻo teuteú ʻoku nanamú.”
Naʻá ku fuʻu ʻohovale mo e niʻihi ko eé heʻene lea pehē maí. Ko ia ne u tuʻu leva ʻo hiki ki ha tēpile ʻe taha ʻo haʻaku kaungāmeʻa foʻou ʻe taha.
ʻI he ʻaho hono hokó naʻe toe lea taʻetaau mai pē ʻa Hena ʻi he taimi mālōloó. Naʻe hokohoko atu ʻene fai peheé ʻi he ʻaho kotoa pē, ka ko e taimi kotoa pē naʻá ne fai ai iá, naʻe ʻikai ke u fai ha tali taʻetaau ki ai he koeʻuhí naʻe talamai ʻe heʻeku faiako Lautohi faka-Sāpate ko Misa Loasení, ʻoku totonu ke ke fai ki he niʻihi kehé ʻa ia ʻokú ke loto ke fai kiate koé. ʻI he taimi pē naʻá ku fakakaukau ai ki aí, ne u kole fakalelei kia Hena ke kātaki ʻo tuku pe talamai e ʻuhinga ʻoku anga pehē mai ai kiate aú.
Naʻá ku ʻalu leva ki ʻapi ʻo talaange ki heʻeku faʻeé ʻa e meʻa kotoa pē naʻe lea ʻaki ʻe Hená. Naʻá ku fuʻu ʻita lahi ʻaupito! Naʻe pehē mai heʻeku faʻeé, “ʻEpi, feinga pē ke ʻoua naʻá ke angakovi ki ai. Ko e taimi ʻe niʻihi ʻoku anga pehē e kakaí koeʻuhí ʻoku hoko ha meʻa faingataʻa honau ʻapí.”
Naʻá ku ʻalu leva ki he akó mo fakakaukau pē ki he meʻa naʻe talamai ʻe Misa Loaseni mo ʻeku fineʻeikí. Ne faifai pea talamai ʻe Hena he ʻaho ko iá naʻe hoko e ngaahi faingataʻa ʻi honau ʻapí pea ko e ʻuhinga naʻá ne faʻa lea taʻetaau aí he naʻá ne ʻita. Naʻá ku fakamolemoleʻi ia, pea ko e taʻu ní ʻokú ma kalasi fakataha ai pea ʻokú ma kaumeʻa lelei ʻaupito!
Naʻá ku ʻiloʻi ko e muimui kia Sīsuú ko e hala lelei tahá ia.