Ko e hā ʻoku mahuʻinga ai ʻa e Fakalelei ʻa e Fakamoʻuí?

Fai ʻe ʻEletā Dallin H. Oaks

ʻO e Kōlomu ʻo e Kau ʻAposetolo ʻe Toko Hongofulu Mā Uá

Mei he “Fakamālohia ʻe he Fakalelei ʻa Sīsū Kalaisí,” Liahona, Nōv 2015, 61–64.

Tuʻunga ʻi he Fakalelei ne fakahoko ʻe hotau Fakamoʻuí naʻe fakafaingamālieʻi ai ʻa e toetuʻú koeʻuhí ke tau toe moʻui kotoa pē hili ʻetau maté.

Naʻá ne toe fakafaingamālieʻi foki ke tau maʻa mei heʻetau ngaahi angahalá kapau te tau fakatomala.

Naʻe foua ʻe Sīsū ʻa e faʻahinga kehekehe kotoa pē ʻo e faingataʻá koeʻuhí ke Ne ʻafioʻi ʻa e founga ke tokoniʻi ai kitautolu ke tau hoko ʻo lelei angé ʻi he taimi ʻoku tau loto-mamahi pe fāifeinga aí.

ʻOkú Ne ʻafioʻi ʻetau mamahí mo e faingataʻaʻiá, pea ʻokú Ne ʻi ai ke tokoni mai.

ʻOku lava ʻe Sīsū Kalaisi ʻo tokoniʻi mo fakaivia ha taha pē ʻokú ne kole ha tokoni.