ʻOku Ongona ʻe he Tamai Hēvaní Hoʻo Ngaahi Lotú
Fai ʻe Neill F. Marriott
Tokoni Ua ʻi he Kau Palesitenisī Lahi ʻo e Kau Finemuí
ʻI ha ha taimi ʻe taha ʻi heʻeku kei siʻí, naʻá ku fie maʻu ai ke u ʻiloʻi ʻoku ʻafioʻi au mo mahino ki he Tamai Hēvaní ʻa e ngaahi faingataʻa ne u fehangahangai mo iá. Naʻá ku kole ange ke Ne fakahinohino kiate au ha potufolofola ʻe tokoni ke u ongoʻi fiemālie ai. Ne u fakaava hake e folofolá ʻo lau, “ʻOku tau vīkiviki ʻi he ngaahi mamahí foki … ʻi heʻetau ʻilo ʻoku tupu mei he mamahí ʻa e faʻa kātaki; pea mei he faʻa kātakí, ʻa e ʻilo; pea mei he ʻiló, ʻa e ʻamanaki lelei: pea ʻoku ʻikai fakamā ʻe he ʻamanaki leleí; he koeʻuhí kuo lilingi ʻa e ʻofa ʻa e ʻOtuá ki hotau lotó” (Loma 5:3–5). Naʻe akoʻi mai ʻe he potufolofola ko ʻení ʻe tokoni ʻeku ngaahi aʻusia faingataʻá ke fakatupulaki ʻeku faʻa kātakí, ʻiló, mo e ʻamanaki leleí, peá u ongoʻi e ʻofa ʻa e ʻOtuá kiate aú. Naʻá ku ʻiloʻi naʻe ongona ʻe he Tamai Hēvaní ʻeku lotú pea naʻá Ne tali mai ʻo fakafou ʻi he folofolá. Naʻá ku maʻu ʻa e tui ʻe faingamālie ʻa e meʻa kotoa pē.
Naʻe ako foki ʻe hoku mokopuna tangata ko Sitiuatí ʻoku ongoʻi ʻe he Tamai Hēvaní ʻetau ngaahi lotú. Naʻá ne fie maʻu hano kaungāmeʻa he akó. Naʻá ne fakakaukau mo ʻene fineʻeikí ke na lotu ke tokoniʻi ia ke maʻu hano kaungāmeʻa. ʻI he tā ʻa e fafangu mālōloó he ʻaho kotoa pē, naʻe ʻiloʻi ʻe Sitiuati naʻe lotua ia heʻene faʻeé. Taimi siʻi pē mei ai naʻá ne maʻu hano kaumeʻa foʻou! Naʻe ako ʻe Sitīuati ʻoku ʻafioʻi he Tamai Hēvaní ʻene loto hohaʻá. Naʻá ne ʻiloʻi naʻe tali ʻe he Tamai Hēvaní ʻene lotú.
Naʻe kau hoku mokopuna tangata ko Siakí ʻi hono taʻu 10 ki ha timi soka. Naʻe talanoa ʻa Siaki mo ʻene ongomātuʻá pea fakakaukau ke tauhi e ʻaho Sāpaté ʻo ʻoua naʻa vaʻinga ʻi he ngaahi feʻauhi ʻe fai Sāpaté. Naʻá ne loto-moʻua naʻa ʻikai fakalakalaka ʻene vaʻingá koeʻuhí ko e ʻikai ke ne kau ki he ngaahi feʻauhi ko iá. Naʻe ʻiloʻi ʻe he tehina ʻo Siaki ko Sālesí ʻene loto hohaʻá. ʻI ha ʻaho ʻe taha naʻe fai ai ʻe Sālesi ʻa e lotu fakafāmilí. Naʻá ne kole ki he Tamai Hēvaní ke tokoniʻi ʻa Siaki ke ʻoua ʻe hohaʻa ki he soká. Naʻe ʻilo ʻe Sālesi ko e founga ke ne tokoni ai ki hono tokouá ko haʻane lotu maʻana. Naʻá ne maʻu ʻa e tui ʻe tokoni ʻene lotú kia Siaki.
ʻOku tau fie maʻu ha tokoni ʻi he moʻuí ni, pea ʻoku fie foaki mai ʻe he Tamai Hēvaní ʻa e tokoni ko iá. ʻOkú Ne ʻofaʻi kitautolu. Te Ne fanongo mai ʻi he taimi te tau lotu aí!