Hili ʻa e ʻOfá, Pea Hā Leva?

Fai ʻe Palesiteni Dieter F. Uchtdorf

Tokoni Ua ʻi he Kau Palesitenisī ʻUluakí

Kuo akoʻi ʻe hotau palōfita ʻofeiná, Palesiteni Tōmasi S. Monisoni, ko e “ʻofá ko e ʻelito moʻoni ia ʻo e ongoongoleleí.”¹

ʻOku fuʻu mahuʻinga ʻa e ʻofá naʻe ui ia ʻe Sīsū “ko e ʻuluaki pea ko e lahi ia ʻo e fekaú” pea pehē ʻoku tautau ai ʻa e kihiʻi konga siʻi kotoa pē ʻo e fonó mo e ngaahi lea ʻa e kau palōfitá.²

Ko e ʻofá ʻa e tefitoʻi taumuʻa ʻo e meʻa kotoa pē ʻoku tau fai ʻi he Siasí. ʻOku totonu ke hoko ʻa e polokalama, fakataha, mo e ngāue kotoa pē ʻoku tau kau ki ai ʻi hotau fatongia ko e kau ākonga ʻa Sīsū Kalaisí mei he ʻulungaanga ko ʻení—he ʻo ka ʻikai e manavaʻofá, ʻa e “ʻofa haohaoa ʻa Kalaisí,” ko e meʻa noa pē kitautolu.³

Ko ʻene mahino pē ʻeni ki hotau ʻatamaí mo e lotó, ko ʻetau fakahā pē ʻetau ʻofa ki he ʻOtuá pea mo hotau kāingá—pea hā leva?

ʻOku feʻunga nai e ongoʻi manavaʻofa mo ʻofa ki he niʻihi kehé? ʻOku fakahoko nai hotau fatongia ki he ʻOtuá ʻi hono fakahaaʻi ʻetau ʻofa ki he ʻOtuá pea mo hotau kaungāʻapí?

Ko e Talanoa Fakatātā ʻo e Ongo Fohá

Naʻe ʻalu e kau taulaʻeiki lahí mo e kaumātuʻa ʻo e kau Siú kia Sīsū ʻi he temipale Selusalemá ʻo feinga ke fakafihiʻi Ia ka nau tukuakiʻi Ia ʻaki ʻEne ngaahi leá. Ka neongo iá, naʻe liliu ia ʻe he Fakamoʻuí ko ha faingamālie lelei ʻaki ʻEne fai ha talanoa.

Naʻá Ne kamata ʻo pehē, “Naʻe ai ʻa e tangata ʻe taha naʻe toko ua hono fohá.” Naʻe ʻalu ʻa e tamaí ki he ʻuluakí peá ne kole ange ke ʻalu ʻo ngāue ʻi he ngoue vainé. Ka naʻe ʻikai tali ia ʻe he fohá. Naʻe “fakatomala pea ʻalu” ʻa e foha ko iá kimui ange.

Naʻe ʻalu leva ʻa e tamaí ki hono foha fika uá ʻo kole ange ke ʻalu ʻo ngāue ʻi he ngoue vainé. Naʻe fakapapau ange ʻa e foha fika uá te ne ʻalu, ka naʻe ʻikai ʻalu ia.

Naʻe tafoki leva ʻa e Fakamoʻuí ki he kau taulaʻeikí mo e kaumātuʻá ʻo fehuʻi ange, “Ko hai ia ʻiate kinaua naʻe fai ʻa e loto ʻo ʻena tamaí?”

Naʻa nau fakahā ange ko e foha ʻuluakí—ʻa ē naʻá ne pehē he ʻikai ke ʻalú ka naʻe fakatomala kimui pea ʻalu ke ngāue ʻi he ngoue vainé.⁴

Naʻe ngāue ʻaki ʻe he Fakamoʻuí ʻa e talanoa ko ʻení ke fakamamafaʻi ha tefitoʻi moʻoni mahuʻinga—ko kinautolu ko ia ʻoku talangofua ki he ngaahi fekaú ʻoku nau ʻofa moʻoni ki he ʻOtuá.

Mahalo ko e ʻuhinga ia naʻe kole ai ʻe Sīsū ki he kakaí ke nau fakafanongo mo muimui ki he lea ʻa e kau Fālesí mo e kau tangata tohí kae ʻoua te nau muimui ki heʻenau sīpingá.⁵ Naʻe ʻikai fai ʻe he kau faiako fakalotu ko ʻení e ngaahi meʻa ne nau pehē te nau faí. Naʻa nau manako ke talanoa kau ki he tui fakalotú, ka naʻe ʻikai te nau maʻu ʻa hono uhouhongá.

Ngaahi Ngāué mo Hotau Fakamoʻuí

ʻI he taha ʻo e ngaahi lēsoni fakaʻosi ʻa e Fakamoʻuí ki Heʻene kau ākongá, naʻá Ne lea kiate kinautolu kau ki he Fakamaau fakaʻosí. ʻE fakamavahevaheʻi e kau angahalá mo e kau angatonú. ʻE maʻu ʻe he leleí ʻa e moʻui taʻengatá; ʻe ʻoatu ʻa e angahalá ki he tautea taʻengatá.

Ko e hā e faikehekehe ʻi he ongo kulupú?

Naʻe fakahaofi ʻa kinautolu naʻa nau fakahaaʻi ʻenau ʻofá ʻi he ngāué. Naʻe fakamalaʻiaʻi ʻa kinautolu ne ʻikai fai iá.⁶ ʻE hāsino ʻi heʻetau ngaahi ngāue fakaʻahó ʻa ʻetau ului moʻoni ki he ongoongolelei ʻo Sīsū Kalaisí mo hono ngaahi tuʻunga ʻulungaanga mahuʻingá mo e ngaahi tefitoʻi moʻoní.

ʻI he ʻaho fakaʻosí, he ʻikai fakafeʻungaʻi kitautolu ki he hakeakiʻí ʻi hono fakahā ʻataʻatā pē ʻetau ʻofa ki he ʻOtuá mo hotau kāingá. He ʻoku hangē ko ia naʻe akoʻi ʻe Sīsuú, “ʻe ʻikai hū ki he puleʻanga ʻo e langí ʻa kinautolu kotoa pē ʻoku pehē mai kiate au, ʻEiki, ʻEiki, ka ko ia ʻokú ne fai ʻa e finangalo ʻo ʻeku Tamai ʻoku ʻi he langí.”⁷

Ko e Hā ʻOku Hoko Mai hili ʻa e ʻOfá?

ʻE lava ke nounou mo mahinongofua pē e tali ki he fehuʻi “Hili ʻa e ʻofá, pea hā leva?” Kapau ʻoku tau ʻofa moʻoni ʻi he Fakamoʻuí, te tau falala kiate Ia pea ʻaʻeva ʻi he hala ʻo e tuʻunga fakaākongá. ʻI heʻetau ʻofa ki he ʻOtuá, te tau feinga ke tauhi ʻEne ngaahi fekaú.⁸

Kapau ʻoku tau ʻofa moʻoni ki hotau kāingá, te tau fāifeinga ke tokoniʻi ʻa e “kakai masivá mo e faingataʻaʻiá, pea mo e mahakí mo e tukuhāusiá.”⁹ He ko kinautolu ʻoku fai ʻa e ngaahi ngāue taʻe-siokita ko ʻeni ʻo e manavaʻofá mo e ngāue tokoní,¹⁰ ko e kau ākonga kinautolu ʻa Sīsū Kalaisí.

Ko e meʻa ʻeni ʻoku hoko mai hili ʻa e ʻofá.

Ko e ʻelito ʻeni ʻo e ongoongolelei ʻo Sīsū Kalaisí.