Mei he Malaʻe Ngāue Fakafaifekaú
ʻAlu ʻo Vakai ʻa Lepeka
ʻOku nofo ʻa e tokotaha naʻá ne faʻú ʻi ʻIutā, USA.
Naʻe ʻikai ha taha ke ne fakaava e matapaá ʻi he taimi naʻá ma tukituki aí, ka naʻá ma ʻiloʻi naʻe fekauʻi kimaua ki ai ke tokoniʻi ha taha ʻo e fānau ʻa e ʻOtuá.
Kuo lava ha ngaahi māhina siʻi ʻeku ngāue fakafaifekau ʻi hoku misioná ʻi he Misiona ʻIlinoisi ʻi Sikākou Sauté peá u kei ngāue pē ʻi hoku fuofua ʻēliá. Naʻe toki tāpuni e ʻēlia ʻo e ongo sisitā naʻe ofi mai kiate kimauá, ko ia naʻá ma fatongia ʻaki e kau fiefanongo kotoa pē ʻoku lea faka-Sipeini ʻi he feituʻu ko iá. Naʻe ʻi ai ha fefine ai ko hono hingoá ko Lepeka.
Ko e fuofua taimi ne ma fetaulaki ai mo Lepeká, ne u ʻohovale heʻene tuí. Naʻá ne nofo ʻi he konga ki lalo ʻo ha fale, ʻa ia naʻe pau ke ma tukituki ʻi hono matapā luvá ke ne haʻu ʻo fakaava e matapaá kiate kimaua. Naʻe kamata akoʻi ia ʻe he ongo faifekau kimuʻá hili ʻene kole e tatau ʻo e vitiō Maʻu ʻa e Tui kia Kalaisí. Kapau naʻe ʻikai ke ne kole ha foʻi vitiō, naʻe ʻikai ke mei lava ʻe he ongo faifekaú ʻo ʻiloʻi ia.
Naʻá ku lava ʻo tala mei he meʻa naʻá ne fakamatala maí naʻe faingataʻa e moʻui ʻa Lepeká. Ko ha taha ia naʻe moʻui fiefia, ka kuo fakamavaheʻi ia mei hono fohá mo e toenga e fāmilí. Neongo naʻe ʻikai lahi ʻene paʻangá, naʻá ku ongoʻi e ʻofa ʻa e ʻEikí kiate iá.
ʻI heʻema akoʻi iá, naʻá ku lava ʻo tala ʻokú ne ongoʻi e Laumālié. Naʻe hoko ʻema ʻaʻahí ko ha meʻa fakafiefia ia kiate ia. Meʻapangó ko ʻene fuʻu nofo mamaʻó, naʻe faingataʻa ai ke ma ʻaʻahi maʻu pē kiate ia.
Naʻa mau konifelenisi fakasouni ʻi ha ʻaho Falaite ʻe taha, ne ma palani ai ke ma ʻalu he ʻosi e konifelenisí ki he konga ko ia homa ʻēliá koeʻuhí he naʻá ma ʻosi ofi atu ai. Naʻá ma ʻeke kia Lepeka pe ʻe ʻi ʻapi pē, ka naʻá ne pehē ʻe ʻi he ngāué ia. Naʻá ma fakakaukau ke ma kei ʻaʻahi pē ki he kau fiefanongo kehe naʻe ʻi he feituʻu ko iá.
Naʻá ma iku ʻo fakamoleki ha taimi lahi ange ʻi ai, pea naʻe ʻikai ke ma fakapapauʻi pe ko e hā te ma faí. Naʻe pehē mai leva hoku hoá, “ʻOku ou tui ʻoku totonu ke ta ʻalu ʻo vakai pe ʻoku ʻi ʻapi ʻa Lepeka.” Naʻe ʻikai ke ʻuhingamālie kiate au e fokotuʻu ko ʻení he naʻe talamai ʻe Lepeka ʻe ʻikai ke ʻi ʻapi. Naʻá ku ongoʻi ha leʻo ʻoku fanafana mai kiate au he taimi ko iá, “Foki ʻo ʻaʻahi ki ai.” Ne u ongoʻi hangē naʻe fusi fakamālohiʻi hoku sinó ke hanga ki he feituʻu ʻoku halanga ki he fale ʻo Lepeká. Ko e ongo mālohi taha ia kuó u ongoʻi ʻi ha toe taimi ange.
Naʻá ku talaange ki hoku hoá ke fakatafoki e kaá, pea naʻá ma ō ki he ʻapi ʻo Lepeká. Naʻá ma tukituki tuʻo ua ʻi he matapā luvá, ka naʻe ʻikai ha taha. Naʻá ku loto-mamahi he ne u ʻiloʻi kuo pau pē naʻe ʻi ai e ʻuhinga naʻe fekauʻi ai kimaua ʻe he ʻEikí ki aí. Naʻá ku fokotuʻu ange ke ma toe tukituki fakaʻosi pē. Naʻá ma talitali pē, pea ʻi he ʻamanaki ke ma fokí, naʻe fakaava mai ʻe Lepeka e matapaá.
Naʻá ne ʻi ʻapí koeʻuhí he naʻe toki tuli ia mei heʻene ngāué, pea naʻá ne fuʻu fie maʻu ke talanoa ki ha taha. Naʻá ne lotua ke ma ʻaʻahi ange kiate ia. Naʻá ne talamai ko ʻene ongo ʻāngeló kimaua. Naʻa mau fepōtalanoaʻaki pea naʻá ma fakafiemālieʻi ia ʻaki hono akoʻi kiate ia e ongoongoleleí.
ʻOku ou fiefia ʻoku ʻafioʻi ʻe he Tamai Hēvaní ʻEne fānaú takitaha pea naʻá Ne fanongo ki he lotu ʻa Lepeká, pea ʻoku ou fiefia heʻema muimui ki he ueʻi fakalaumālie ke ma ʻaʻahi kiate iá, pea ma hoko ai ko e tali ki he lotu ko iá. ʻOku ʻafioʻi heʻetau Tamai Hēvaní e meʻa kotoa pē ʻoku hoko ʻi heʻetau moʻuí taki taha, pea ʻi he taimi ʻoku tau falala ai kiate Iá pea kole ʻi he tuí, te Ne tokoniʻi kitautolu ʻi he ngaahi meʻa ʻoku tau fie maʻú.