Hoko ko ha Faifekau

Mei ha fakaʻekeʻeke ʻe Jenna Koford, ʻIutā, USA

Mālō e Lelei, ko Sesi au!

ʻE lava ke hoko ʻa e mēmipa kotoa pē ko ha faifekau. Naʻe fakaafeʻi kimautolu heʻemau palesiteni fakasiteiki ʻi Kalefōniá ke mau vahevahe ʻa e ongoongoleleí. ʻI he taimi naʻe fie maʻu ai ke u fai ha lipooti ʻi he kalasí fekauʻaki mo ha vahefonua ʻi he ʻIunaiteti Siteití, naʻá ku ʻiloʻi ko hoku faingamālie ʻeni!

Ko e Tukupaá

Naʻe kole mai heʻemau faiakó ke mau fili ha vahefouna ʻi he ʻIunaiteti Siteití pea faʻu hano tatau, pe ko hano kiʻi fakatātā fakaʻaliʻali. Naʻá ku talaange ki heʻeku faiakó naʻá ku fie līpooti kau ki he vahefonua ʻIutaá. Kuo tā tuʻo lahi ʻeku ʻalu ki ʻIutā ʻi he ngaahi ʻeveʻeva fakafāmilí. Naʻá ku fie maʻu ke u ʻilo lahi ange fekauʻaki mo e “Sitetiti ʻo e Punungahoné.” Pea naʻá ku fakakaukau mahalo naʻa tokoni ia ki heʻeku ngāue fakafaifekaú!

Ngaahi Moʻoni Fakafiefiá

Naʻá ku ako ʻo ʻilo ko e Fuofua Halanga Lēlue naʻe fou takai ʻi he kotoa ʻo ʻAmelika Noaté naʻe huufi ia ʻi ʻIutā ʻo fakaʻilongaʻi ʻaki ha foʻi faʻo fōlahi (spike) lanu koula. Naʻá ku fakapipiki ha fakatātā ʻo e Temipale Sōlekí ki heʻeku polōsekí. Naʻá ku hiki foki ha ngaahi moʻoniʻi meʻa fekauʻaki mo Palesiteni Tēvita O. Makei (1873–1970) he koeʻuhí ko e palōfita ia ʻoku saiʻia taha ai ʻeku kuitangatá.

Ko e Punungahoné

Naʻá ku fie fakaʻaliʻali ki heʻeku kalasí ʻa e ngaahi fakatupu fakaʻofoʻofa ʻa hotau Fakamoʻuí ʻi heʻeku fakatātaá. Naʻá ku fakapipiki ki ha ngeʻesi puha ha fanga kiʻi fakatātā ʻo e honé peá u tā valivali ia ke hangē ha punungahoné. ʻOku fakamanatu mai ʻe he punungahoné ke tau ngāue mālohi ʻo hangē ko e fanga honé ʻi hono vahevahe ʻo e ongoongoleleí.

Ngaahi Fakamatala ʻo e Hoko ko ha Faifekaú

Naʻá ku ʻave ʻeku ngāue fakaakó ki he ʻoupeni hausí. Naʻe fakaʻofoʻofaʻia ʻa e tokotaha kotoa pē ʻi heʻeku puha honé! Naʻe ʻomi heʻeku faiakó ha maaka haohaoa! Fakatauange pē ʻe sio e kakaí ʻo ʻiloʻi ʻa e fakaʻofoʻofa ʻo ʻIutaá. Mahalo pē te nau fie fehuʻi fekauʻaki mo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho kimui Ní. ʻOku ʻikai ke u faʻa tatali kae ʻoua kuó u fuʻu lahi feʻunga ke u ʻalu ʻo ngāue fakafaifekau pea vahevahe ke lahi ange ʻa e ongoongoleleí!