Tokoni ke Tokangaʻi ʻa ʻElisī
ʻOku nofo ʻa e tokotaha naʻá ne faʻú ʻi ʻOlikoni, USA.
“Te u ʻeva mo koe. Talanoa kia koe Ke fakahā ʻeku ʻofá” (Tohi Hiva ʻa e Fānaú, 78)
Naʻe sio fakamamaʻu ʻa Taniela ki tuʻa ʻi he matapā sioʻatá. Naʻá ne sio ki hono ngaahi kaungāmeʻá ʻenau lue ki he paʻaké mo ʻenau pulu pasiketipoló. Naʻá ne fie ʻalu foki mo ia.
Naʻe pehē ange ʻe he fineʻeikí, “Taniela, he ʻikai ke u lava ʻo ʻave koe he ʻahó ni.” “ʻOku puke lahi ho tuofefiné. Pea ʻoku teʻeki ke ke matuʻotuʻa feʻunga ke ke ʻalu tokotaha pē. Fakamolemole pē.”
Naʻe fakafulofula ʻa Taniela ki hono tuofefine ko ʻElisií. Naʻe tangutu ʻa ʻElisī ʻi hono salioté ʻo huki pē ʻene meʻa vaʻingá. Naʻá ne taʻu nima, ka naʻe teʻeki ke ne lava ʻo lue pe lea. Naʻe faingataʻa e tale ʻa ʻElisií. Naʻá ne faʻa puke maʻu pē, pea kapau ʻe fuʻu vela pe fuʻu momoko e ʻeá he ʻikai ke ne lava ʻo hū ki tuʻa. Pea naʻe pau ke fakatiupi ʻene kaí ki hono keté.
Naʻe ʻofa ʻa Taniela ʻi hono tuofefiné, ka ko e taimi ʻe niʻihi naʻá ne ʻita foki mo ia. Naʻe faingataʻa maʻu pē ke fai e meʻa ʻoku lelei taha moʻo ʻElisií. Naʻe fie maʻu ʻe Taniela ke ʻalu ia ʻo vaʻinga mo e tamaikí. Naʻá ne fuʻu ʻita ʻaupito.
Naʻá ne pehē ange ki heʻene fineʻeikí, “ʻOku ʻikai totonu ia!” “Ko e meʻa kotoa pē ʻoku fekauʻaki ia mo ʻElisī he taimi kotoa pē!” Naʻá ne lele leva ki hono lokí.
Naʻe fakaʻau ke kovi ange e tale ʻa ʻElisií pea naʻe pau ke ʻave ai ia ki falemahaki, hili ha ʻaho ʻe ua mei ai. Naʻe haʻu e ongo kui ʻa Tanielá ke tokangaʻi ia. Naʻe lahi nofo pē ʻa e Fineʻeikí mo e Tangataʻeikí ʻi falemahaki mo ʻElisī ʻi he toenga ʻo e uiké.
Naʻe hanga ʻe he ongo kui ʻa Tanielá ʻo ʻave ia ke vaʻinga mo e tamaikí. Ka naʻe hohaʻa ʻa Taniela pe ʻoku fēfē ʻa ʻElisī. Naʻá ne fakatomala ʻi he meʻa naʻá ne lea ʻaki ki heʻene faʻeé he ʻaho atú. Naʻe ʻikai ke ne saiʻia he taimi naʻe faʻa taʻofi ai ʻene vaʻingá koeʻuhí ko ʻElisií. Ka naʻe saiʻia ʻaupito ʻa Taniela he taimi naʻe faʻa malimali ai ʻa ʻElisī heʻena talanoá, pea naʻá ne fiefia ʻi he taimi ʻoku nofo ai mo ʻElisií.
Naʻe fakasio pē ʻa Taniela kituʻa he matapā sioʻatá, mo e ʻamanaki ke sio ki heʻene Fineʻeikí mo e Tangataʻeikí ʻokú na foki mai mo ʻElisī ki ʻapi.
Fakafokifā pē kuo fakatokangaʻi atu ʻe Taniela e kā ʻa e Fineʻeikí ʻoku afe mai he tauʻanga meʻalelé. Naʻá ne lele vave atu ke feʻiloaki mo ia.
Naʻá ne pehē ange ʻi heʻene fāʻofua kiate iá, “Fineʻeiki, ʻoku ou kole fakamolemole atu ʻi heʻeku lea naʻe fai kau kia ʻElisií he ʻaho naʻá ku ʻita aí.”
Ne tali ange ʻe he Fineʻeikí ʻi heʻene fāʻofua kia Tanielá, “ʻOku sai pē ia. ʻOku ou ʻiloʻi ʻokú ke ʻofa pē ʻia ʻElisī. ʻOku hā ngali taʻetotonu ʻa e ʻikai ke tau faʻa lava ʻo fai maʻu pē ʻa e meʻa ʻoku tau loto ke faí. ʻOku faingataʻa ia he taimi ʻe niʻihi ki he taha kotoa pē. Ka ʻoku ou ʻiloʻi ʻoku tau monūʻia he kau ʻa ʻElisī ʻi hotau fāmilí.”
Naʻe pehē ange ʻe Taniela, “ʻOku ou ʻofa ki ai.”
Naʻe pehē ange he Fineʻeikí, “Mo au pē. Naʻe pehē ʻe he toketaá mahalo naʻa lava ʻo ʻatā mai ʻapongipongi.”
Naʻe ʻi he Palaimelí ʻa Taniela mo ʻElisī hili ha uike ʻe ua mei ai.
Naʻe pehē ʻe he palesiteni Palaimelí, “Mou takitaha kumi hamou hoa pea tuʻu ki he siakalé!”
Naʻe fakavave atu ʻa Taniela ʻo ne teke mai e saliote teketeke hono tuofefiné.
Naʻá ne pehē ange ki he faiako ʻa ʻElisií, “Te u hoa au mo ʻElisī.” Naʻá ne teke atu ia ki muʻá ke na kau fakataha mo e fānaú ʻi he siakalé.
Naʻá ne fakasio hifo kia ʻElisī. Ne mamali atu ʻa ʻElisī, pea naʻá ne malimali foki mo ia.
Naʻe fiefia ʻa Taniela ʻi he toe foki mai ʻa ʻElisī ki ʻapí. Naʻá ne fie hoko ko ha tuongaʻane lelei kia ʻElisī.