Ko e Founga ke FAKAHAAʻI AI ʻA E Loto Houngaʻiá

Fai ʻe ʻEletā Robert D. Hales

ʻO e Kōlomu ʻo e Kau ʻAposetolo ʻe Toko Hongofulu Mā Uá

Mei ha lea ʻi he konifelenisi lahi ʻo ʻEpeleli 1992.

Ko e meʻa ʻoku ou houngaʻia taha aí ko e feilaulau fakalelei ʻa hotau ʻEiki mo e Fakamoʻui ko Sīsū Kalaisí. Ko e Fakaleleí ko e maka ia ʻoku tuʻunga ai ʻa e ngaahi moʻoni kotoa pē ʻo e ongoongoleleí. …

Ko e loto houngaʻiá ko ha tuʻunga ia ʻo e ongoʻi mahuʻingaʻia, ko hano fakahā ʻo e fakamālō, ʻa ia ʻoku fakatupu ai haʻatau angavaivai he ʻoku tau fakatokangaʻi ha ʻulungaanga ʻo e angaʻofá, ngāue tokoní, pe tokaʻí mei ha taha kehe ʻa ia ʻoku fakatupulaki mo fakamālohia ai kitautolu.

Ko e taʻehoungaʻiá ko e ʻulungāanga ia ʻo e taʻeʻiloʻi pe taʻefakatokangaʻi e taimi kuo tokoniʻi ai kitautolu ʻe ha taha, pe toe kovi angé, ʻa e taimi ʻoku tau ʻiloʻi ai naʻe tokonia kitautolu kae ʻikai ke tau fakahā ha fakamālō.

Ko e ola ʻo hono fakahaaʻi mo e ongoʻi ʻo e loto houngaʻiá ʻokú te maʻu ai, ʻi he lilo, ha ongoʻi loto-tauʻatāina pe fakamoʻui. ʻOku ʻomi ʻe he loto houngaʻiá ha ongo fakafiefia ʻo tatau pē ki he taha naʻá ne foakí mo e taha naʻe fai ki ai e foakí.

ʻOku hanga ʻe he fakahaaʻi ʻo e loto houngaʻia ki heʻetau Tamai Hēvaní ʻi he lotú koeʻuhi ko e meʻa ʻoku tau maʻú ʻo ʻomi ha ongoʻi melino fakanonga—ko ha nonga ʻoku ʻikai ke ne fakaʻauha hotau laumālié koeʻuhí ko e meʻa ʻoku ʻikai ke tau maʻú. ʻOku ʻomi ʻe he loto houngaʻiá ha nonga ʻa ia ʻoku tokoni ia ke tau ikunaʻi ʻa e mamahi ʻo e faingataʻá mo e taʻe-malavá. ʻOku ʻuhinga ʻa e maʻu e loto houngaʻia he ʻaho kotoa peé ke tau fakahaaʻi ʻetau mahuʻingaʻia ʻi he meʻa ʻoku tau maʻu he taimi ní taʻe kau ai e meʻa naʻa tau maʻu ʻi he kuohilí pe fakaʻamu ke maʻu he kahaʻú. ʻOku hanga foki ʻe hono fakahoungaʻi ʻetau ngaahi meʻafoaki mo e talēniti kuo foaki maí ʻo fakahaaʻi ai ʻetau fie maʻu ha tokoni mei he ngaahi meʻafoaki mo e talēniti ʻoku maʻu ʻe he niʻihi kehé.

Ko e loto houngaʻiá ko ha tefitoʻi moʻoni fakalangi:

“Ke ke fakafetaʻi ki he ʻEikí ko ho ʻOtuá ʻi he ngaahi meʻa kotoa pē.” (T&F 59:7).

ʻOku ʻuhinga e potufolofola ko ʻení ke tau fakahaaʻi ʻa e loto-fakamālōʻia ki he ngaahi meʻa ʻoku hokó, ʻo ʻikai ngata pē ʻi he ngaahi meʻa leleí kae pehē foki ki he ngaahi ʻahiʻahi mo e faingataʻa ʻi he moʻuí ʻa ia ʻoku tupulaki ai ʻetau taukeí mo e tuí. ʻOku tau falala kakato kiate Ia, pea tau ʻiloʻi ko e meʻa kotoa pē ʻoku hokó ʻoku maʻá e fakataukeiʻi pē ʻotautolú.

Ko e taimi ʻoku tau lotu ai ʻo pehē, “ke fai pē Ho finangaló,” ʻoku tau fakahaaʻi ai ʻetau tui mo e loto houngaʻia moʻoni mo fakahā ai te tau tali ha faʻahinga meʻa pē ʻe hoko ʻi heʻetau moʻuí.

ʻOku ou fakatauange pē te tau ongoʻi ha loto houngaʻia moʻoni koeʻuhí ko e angalelei ʻa e ʻOtuá mo e ngaahi tāpuaki kotoa ʻoku tau maʻú pea fakahaaʻi ʻetau fakafetaʻi ko iá ʻi he lotu ki heʻetau Tamai Hēvaní.