Kau Māʻoniʻoni ʻi he Ngaahi ʻAho Kimui Ní
Naʻá ku Ngāue Leva he Taimi Ko iá
Tā fakatātā ʻa Stan Fellows
Ne u fakamaʻu hoku ʻofefiné ki hono sea motuʻa ʻi he kaá. Naʻe ʻikai haʻamau paʻanga feʻunga, ko ia naʻá ku houngaʻia ʻi he ngaahi meʻaʻofa ne foaki mai kuo ʻosi fakaʻaongaʻí. Naʻe hoko ko ha nofoʻa fakalahi (booster seat) he kuo tupu lahi hoku ʻofefiné ki hono sea motuʻá. Naʻá ku fakatuʻamelie ke fai e ngaahi ngāue ʻo e ʻaho fakaʻofoʻofa ko iá.
Naʻá ma afe ʻi he laipelí. ʻI heʻeku toʻo e leta hoku ʻofefiné, naʻá ku fakatokangaʻi ha fefine Latina (Hispanic) kei talavou ʻi he meʻalele hoko maí. Naʻe tangutu ha kiʻi pēpē ʻi he sea muí, ʻa ia naʻe teʻeki ke ne lava ʻo tangutu hangatonu pea naʻá ne hanoku pē hangē ha kiʻi foʻi pulú. Naʻe fāinga ʻa e faʻē kei talavoú ke fakamaʻu e leta ʻo e seá ke lava ʻo maluʻi hono kiʻi sinó. Naʻá ku maʻu ha fakakaukau ʻe ua.
“ʻOku ʻikai haʻane sea kā maʻá e pēpeé. Te u lava ʻo foaki ange ʻeku seá maʻana.”
Pea ne u toe fakakaukau pē.
“Mahalo pē ʻoku ʻikai poto ia he lea faka-Pilitāniá. ʻE faifai pea fakatupu lotomamahi ia ki ai. Ko ʻeku sea kaá ʻoku fuʻu motuʻa ia; mahalo he ʻikai te ne fie maʻu ʻe ia. Kapau te ne fie maʻu, te u maʻu fēfē hano fetongi?”
Ko ia ai naʻá ku tukunoaʻi pē.
Naʻe heka ʻa e faʻeé ki he meʻalelé ʻo ʻalu.
Ki muʻa peá u aʻu ki he matapā ʻo e laipelí, ne ʻākilotoa au ʻe he loto-tauteá. Naʻá ku ʻiloʻi kuo hala ʻeku filí, pea naʻe ʻikai ha founga ke u toe fakafoki ai ia.
Naʻá ku fusi mai ʻa e matapaá ka naʻe kei loka pē. Naʻe teʻeki ai ke ava e laipelí. Ne u fakahoko e toenga e ngāue ʻo e ʻaho ko iá mo ʻeku ongoʻi faingataʻaʻia pē ʻi he toutou manatu ki he meʻa naʻe hokó.
Hili ʻeku ngāue fakaʻosí, ne u fakakaukau ke u toe vakaiʻi e laipelí. Naʻá ku afe ʻo tau ʻi he tauʻanga meʻalele tatau pē ne u ʻi ai ki muʻá. Naʻá ku ʻohovale ʻi he sio ki he meʻalele ʻa e faʻē mo e foha tatau pē naʻá na tau mai hoku tafaʻakí. Ne u ongoʻi ha fiemālie lahi moʻoni.
Naʻe ʻikai ke u toe fehuʻia ka naʻá ku ngāue leva he taimi ko iá. Ne u vete leva e sea kā hoku ʻofefiné peá u ʻalu atu ki he faʻē kei talavoú. Naʻe ʻikai ke ne poto he lea faka-Pilitāniá. Naʻá ku tuhu ange pē ki heʻene pēpeé mo e sea kaá mo ʻene kaá. Naʻá ma hanga leva ʻo fakamaʻu ʻa e sea kaá ki he loto kaá. ʻI heʻeku fakaʻaliʻali ange e founga hono fakaʻaongaʻí, naʻá ku ʻiloʻi ne u ʻosi ʻiloʻi pē e lea faka-Sipeini naʻe fie maʻu ke u ʻiló: “gracias.”
Naʻe fonu hoku lotó ʻi he fakafetaʻi lahi ko ha toe faingamālie mei ha Tamai Hēvani ʻofa ke u tokoniʻi ai ha tokoua naʻe faingataʻaʻia.
Naʻá ku tānaki atu ha ngāue fakaʻosi ki he lisí—ko ha falekoloa maʻamaʻa ʻoku ofi maí. Naʻá ku fakamaʻu e leta nofoʻa hoku ʻofefiné peá u fakaʻuli māmālie ki he falekoloá. Naʻe tuku ʻi he tuliki ki mui ʻo e falekoloá ha sea kā—naʻe tatau tofu pē mo e sea naʻá ku toki foakí mo motuʻa tatau foki. Naʻá ku fakatau mai ia ʻi he ongoʻi ofo mo fakatōkilalo ʻi he ngaahi meʻa naʻe hoko ʻi he pongipongi ko iá.
Naʻe tō loloto ʻa e akonaki angavaivai ka e ola lelei ʻa e Fakamoʻuí ki hoku lotó: muimui ki he ngaahi ueʻi ʻa e Laumālie Māʻoniʻoní—ʻi heʻene fuofua hokó pē.