Ang Basahon nga Miluwas sa Akong Kinabuhi
Detalye gikan sa Tan-awa ang Inyong Gagmay nga mga Bata, pinaagi ni Robert Barrett
Ang akong pamilya ug ako nagpamiyembro sa Simbahan sa 12 anyos pa ko. Nianang higayona, wala koy ideya sa gibug-aton niana nga gasa. Wala gani ko masayud kon ang Simbahan tinuod ba, apan akong amahan ug inahan nakadayeg sa mga mensahe nga gisangyaw sa mga misyonaryo. Ganahan ko sa mga misyonaryo apan wala ko makasabut sa hingpit unsay ilang gisulti. Sa katapusan midapit sila kanamo nga magpabunyag, ug ang akong pamilya mihukom nga moapil mi isip pamilya o dili na lang gyud. Miuyon ko ug gibunyagan nga wala makabig.
Mitambong ko sa simbahan ug seminary, apan ang akong pamilya sa kadugayan nawala sa simbahan. Duna koy mga higala sa simbahan ug mitambong sa seminary ug Mutual uban nila. Wala ko magpakabana sa ebanghelyo o sa mga pagtulun-an ug naghunahuna nga ang simbahan makalaay. Naproblema na ko sa akong kinabuhi sa dihang nagsugod na ko sa pag-apil sa mga kalihokan sama sa pagpangawat ug pag-vandal. Ang akong amahan nahimong abusado, ug ako naghunahuna nga maghikog.
Hinoon, ang paghikog wala gayud mahimong opsyon. Dili ko makahimo niana sa akong inahan, kinsa akong gihigugma pag-ayo. Busa nangita ko og tubag. Gitan-aw nako ang akong mga higala sa simbahan. Ang usa ka butang nga anaa kanila nga wala nako mao ang pagpamatuod. Mao nga sa edad nga 16, upat ka tuig human sa akong bunyag, milingkod ko aron mobasa sa Basahon ni Mormon sa unang higayon.
Lisud kadto, ug milungtad og hapit duha ka tuig. Samtang nagbasa ko sa 3 Nephi kabahin sa pagbisita sa Manluluwas sa mga Nephite human sa Iyang Pagkabanhaw, diin Siya mipanalangin sa ilang mga anak ug mga anghel nanaog gikan sa langit ug miliyok kanila, ingon og ako mibarug sa taliwala sa mga Nephite ug nakita sa akong kaugalingong mga mata kanang milagroso nga panghitabo. Ang Espiritu Santo misaksi bahin nianang talagsaon nga hitabo.
Dili na ko makabasa, tungod kay mihanap akong mga mata tungod sa luha. Sa dihang naulian na ko, mipadayon ko sa pagbasa. Pipila ka semana ang milabay, ug nahuman nako ang libro, miluhod, ug nag-ampo aron masayud kon tinuod ba kini. Apan ako wala makadawat og tubag.
Milabay ang mga adlaw nga kanunay akong nagluhod ug nangamuyo aron masayud kon ang basahon tinuod ba, kon ang Simbahan tinuod ba, apan sa gihapon wala ko makadawat og tubag. Nawad-an sa paglaum, mga semana human nako mabasa ang tanan, miluhod ko sa makausa pa ug nangutana, “Langitnong Amahan, ang Basahon ni Mormon tinuod ba?” Ang tubag nga miabut dili mao ang akong gipaabut: “Gisultihan ko na ikaw. Nasayud ka niini.”
Nakaangkon na ko sa akong pagpamatuod mga semana na ang milabay, dihang nagbasa ko mahitungod ni Kristo nga mipanalangin sa mga bata. Ako nasayud nga kini nga Simbahan, Ang Simbahan ni Jesukristo sa mga Santos sa Ulahing mga Adlaw, mao ang gingharian sa Dios dinhi sa kalibutan, gipahiuli sa usa ka propeta ug gipangulohan sa usa ka propeta, sama sa karaang panahon.
Dili kini pagpasulabi og sulti nga ang Basahon ni Mormon miluwas sa akong kinabuhi, apan mas tukma ang pag-ingon nga ang gipahiuli nga ebanghelyo miluwas kanako ug nagpadayon sa pagbag-o kanako ug sa pag-amuma kanako matag adlaw. Mao kini ang akong pinakabililhon nga kabtangan.