14 ka mga Panghitabo sa Pagkatawo ni Jesus

Ni Jessica Griffith

Ang pagkahimugso ni Jesukristo gisaulog kada tuig—manganta kita og mga himno, malingaw ta sa mga tradisyon sa pamilya, ug hinumduman nato ang atong Ginoo pinaagi sa pagpasidungog sa Iyang pagkatawo. Apan unsa nga mga detalye bahin sa Pagkatawo ni Jesus nga makita nato sa mga kasulatan?


Ang Pagkahimugso ni Kristo Gitagna Na	Karaang Jerusalem ug Karaang America	Genesis 49:10; Isaias 7:14; 9:1–7; Miquias 5:2; Mosiah 3:8; Alma 7:10; Helaman 14:2–5	Sa mga tuig nga wala pa ang pagkahimugso sa Manluluwas, ang mga propeta nakadawat og pagpadayag bahin ni Jesukristo. Ang mga propeta sa Daang Tugon namulong sa usa ka hari nga magagikan ni Haring David kinsa matawo sa Betlehem—usa ka Mesiyas. Sumala sa interpretasyon sa Judeo, kini nga Mesiyas mahimong hari kinsa moluwas sa Iyang mga katawhan, ang mga Judeo, gikan sa politikanhong pagdaug-daog ug magmando sa yuta uban ang kaangayan. Hinoon, unsay wala gidahum sa karaang mga Judeo, mao ang Hari kinsa moluwas sa Iyang katawhan gikan sa espirituhanong pagdaug-daog. Imbis sa temporal nga kaluwasan ug yutan-ong gingharian, si Jesukristo mitanyag og mahangturong kaluwasan ug sa gingharian sa Iyang Amahan.
Ang Pagbisita sa Anghel nga si Gabriel sa mga Ginikanan ni Juan ang Bautista	Judea	Mateo 7:12–13; Lucas 1:5–25 (ilabi na sa bersikulo 17); Doktrina ug mga Pakigsaad 27:7; Giya ngadto sa mga Kasulatan, “Elias”	Si Juan Bautista usa ka Elias o tigpasiugda, ngadto ni Kristo. Ang anghel nga si Gabriel misulti ni Zacarias, amahan ni Juan, nga ang iyang asawa, nga si Elisabet, makabaton og anak nga kini nga bata pagahinganlan og Juan. Si Zacarias mitubag nga nagduha-duha, nga miresulta sa iyang pagkabungol ug pagkaamang.
Ang Anghel nga si Gabriel Nagpakita ni Maria	Nazaret ug Galilea	Mateo 1:18; Lucas 1:26–38	Paglabay sa unom ka bulan mao ang sunod nga pagbisita ni Gabriel ngadto sa ig-agaw ni Elisabet nga si Maria. Iyang giingnan si Maria nga bisan og siya usa ka birhen, makabaton siya og anak pinaagi sa gahum sa Espiritu Santo ug nga ang bata mao si Jesukristo. Mapainubsanong gidawat ni Maria ang iyang tawag isip inahan sa Anak sa Dios. Ang anghel misulti usab kaniya nga ang iyang ig-agaw nga si Elisabet nagmabdos.
Ang Pagbisita ni Maria kang Elisabet	Judea	Lucas 1:39–56	Human sa pagbisita sa anghel ni Maria, mibiya siya sa Nazareth aron mobisita sa iyang ig-agaw nga si Elisabet didto sa Judea sulod sa tulo ka bulan. Samtang si Maria didto, nakadawat si Elisabet og pagpamatuod pinaagi sa Espiritu Santo nga ang anak ni Maria mao ang Anak sa Dios. Mihatag usab si Maria sa iyang kaugalingong pagpamatuod sa Dios.
Si Juan Bautista Natawo	Judea	Lucas 1:57–80	Sa dihang natawo si Juan Bautista, nagtuo ang mga tawo nga panganlan siya og Zacarias, sunod sa iyang amahan. Gisalikway ni Elisabet kana nga pangalan, misulti sa iyang mga higala ug mga silingan nga ang iyang pangalan mao si Juan. Sa dihang kini nga mga higala ug mga silingan nangutana ni Zacarias bahin niini, miuyon siya ni Elisabet. Tungod kay misunod siya sa mga instruksyon ni Gabriel sa paghatag og pangalan sa iyang anak, naulian ang dila ni Zacarias, ug iyang gigamit ang naulian nga pandungog ug pagsulti sa paghimaya sa Dios.
Ang Anghel nga si Gabriel Nagpakita ngadto ni Jose	Nazaret	Mateo 1:18–23	Sa pagkakita sa kondisyon ni Maria nga mabdos sa dihang miuli siya ngadto sa Nazaret, si Jose, ang tawo nga pakaslan ni Maria, buot “nga makigbulag kaniya,” o hilom nga ikanselar ang ilang kasal. Hinoon sa wala pa niya mabuhat, ang anghel nga si Gabriel nagpakita ngadto kaniya sa usa ka damgo, nagpamatuod nga ang bata nga gisabak ni Maria sa Espiritu Santo ug nga ang bata mao ang moluwas sa Iyang katawhan gikan sa ilang mga sala. Imbis makigbulag ni Maria, nakahukom si Jose sa pagpakigminyo kaniya.
Ang Tibuok Kalibutan Gibuhisan	Ang Gingharian sa Romano	Lucas 2:1–4; James E. Talmage, Jesus the Christ (1916), 91–92	Ang pagbuhis dunay duha ka tuyo ang pagbayad og buhis ug pagpalista sa census, nga giimplementar sa mga Romano. Sa kasagaran, ang mga Romano molista sa mga tawo base sa ilang gipuy-an karon, apan ang kustombre sa Judeo mao ang paglista sa mga tawo base sa ilang panimalay sa ilang katigulangan. Tungod niini, ang Betlehem, ang panimalay sa katigulangan ni Jose, napuno sa mga tawo, ug ang balay paabangan puno usab.
Natawo si Jesukristo	Nazaret, Betlehem, ug Judea Ang Betlehem nagpasabut nga “balay sa pan” ug gitagna nga dapit nga natawhan sa Mesiyas.	Lucas 2:6–7	Sila si Jose ug Maria mibiyahe ngadto sa Betlehem aron mobayad og buhis. Sa dihang natawo si Jesus, naghimo og morag kuna si Maria sa pasungan, o gamit ang kan-anan sa mga hayop. Wala mahisguti kon dunay bay mga hayop.
Gitagna nga mga Timailhan Nakita sa America	Ang America	Helaman 14:1–5; 3 Nephi 1:15–21	Sumala sa gitagna, sa adlaw sa pagkahimugso ni Kristo, dihay usa ka adlaw ug usa ka gabii ug usa ka adlaw nga puno sa kahayag ang yuta sa America. Usa ka bag-ong bitoon nagpakita sa kalangitan.
Ang mga Magbalantay sa Karnero Nakadungog sa Pagkahimugso ni Kristo	Duol sa Betlehem	Lucas 2:8–17	Niining higayuna sa tuig, ang mga magbalantay sa karnero nagtugway sa ilang kahayupan sa gawas sa adlaw ug gabii. Dinhi sila sa dihang ang usa ka anghel nagpakita ngadto kanila, nagsulti nila sa pagkahimugso sa Manluluwas. Human sa pahibalo sa anghel, panon sa mga anghel nagpakita, naghimaya sa Dios. Sa pagkadungog niini, ang mga magbalantay sa karnero nagdali nga miadto sa Betlehem aron makita si Jesus. Sa dihang nakakita na sila Kaniya, mibiya sila nila ni Jose ug Maria ug nagpamatuod sa uban unsay ilang nakit-an.
Si Jesus gisirkunsidar, Ginganlan, ug Gihalad didto sa Templo	Betlehem	Lucas 2:21–38; James E. Talmage, Jesus the Christ, 95	Human sa walo ka adlaw, si Kristo gisirkunsidar ug ginganlan, sumala sa kustombre sa Judeo. Ginganlan Siya nga Jesus, o “Yeshua,” nga nagpasabut nga “Manluluwas” sa Hebreohanon. Ang kustombre sa Judeo nagdiktar nga ang usa ka babaye kinahanglang maghulat og 40 ka adlaw human sa pagpanganak sa pagsulod sa tempo. Pagka human sa 40 ka adlaw, si Maria ug Jose midala ni Jesus aron ihalad sa templo. Gikahimamat nila si Simeon, kinsa gisaaran nga siya makakita ni Kristo sa dili pa siya mamatay. Nakaila siya ni Kristo, mikugos Kaniya sa iyang mga bukton ug midayeg sa Dios. Nanagna usab siya sa misyon ni Kristo dinhi sa yuta. Si Ana, usa ka propeta nga babaye, nakasaksi usab ni Kristo didto sa templo. Nagpamatuod usab siya sa Iyang misyon.
Ang mga Mago Nangutana ni Herod bahin ni Kristo	Jerusalem	Mateo 2:1–10	Wala mahibaloi nga gidaghanon sa mga Mago “gikan sa silangan” miadto sa Jerusalem nangita ni Kristo. Nakita nila ang bag-ong bitoon sa langit, nga nagpahibalo nga ang Kristo natawo. Nangutana sila ni Haring Herod, ang gitudlo nga hari nga Romano sa Judea, asa makit-i ang bata. Nahulga si Herod sa posibilidad sa usa ka bag-ong hari, ang Mesiyas, nga sa iyang pagtuo mopuli sa iyang gingharian. Wala mosulti sa mga Mago sa iyang kahadlok, mihangyo siya kanila sa pagpahibalo kaniya kon makit-an na nila ang Kristo. Nagplano Siya sa pagpapatay Kaniya.
Nakit-an sa mga Mago si Kristo ug Mihatag og mga Gasa	Betlehem	Mateo 2:9–12; Bible Dictionary, “Magi”	Natultulan ra sa mga Mago sa katapusan si Kristo. Misulti si Mateo nga ilang nakit-an si Jesus sa iyang balay isip “gamay nga bata,” nagsugyot nga miabut sila dili mominus usa na ka tuig human sa pagkahimugso ni Kristo. Mihalad sila Kaniya og bulawan, incienso, ug mira—bililhon nga mga gasa nga nag-ila sa pagkahari ni Jesus. Sa usa ka damgo, ang mga Mago gisultihan nga dili mosulti ni Herod sa ilang nakit-an.
Gipasidan-an si Jose nga Moadto sa Ehipto	Betlehem, Ehipto, ug Nazaret	Mateo 2:13–16, 19–23	Ang mga Mago wala gayud mo-report ngadto ni Herod sama sa ilang gisulti nga ilang buhaton. Ang reaksyon ni Herod mao ang pagsugo nga ang tanang mga bata nga natawo sa Betlehem nag-edad og dos ug paubos kinahanglang patyon. Gipasidan-an pinaagi sa panan-awon, gidala ni Jose sila si Maria ug Jesus ngadto sa Ehipto. Nagpabilin sila didto hangtud namatay si Herod. Sa pagkamatay ni Herod, usa ka anghel miadto ni Jose pinaagi sa panan-awon, nagsulti kaniya nga luwas na nga mobalik sa Israel. Hinoon sa pagkadungog nga ang anak ni Herod mao ang bag-ong magmamando, gidala ni Jose ang iyang pamilya ngadto sa Nazaret sa Galilea imbis sa Judea, ug sa ingon ang kinabuhi ni Kristo nagsugod isip Jesus sa Nazaret. Paglabay sa katuigan Siya pagabunyagan na, mopahigayon og mga milagro, ug mokompleto sa Iyang talagsaon nga mahangturong Pag-ula.