Pagpangita Pag-usab sa Iyang Hugot nga Pagtuo
Ang pagbalik dili kanunay sayon, apan kanunay kini nga maanaa.
Ang mga pulong “[Nangahulog] ngadto sa gidili nga mga dalan ug [nanga] wala” (1 Nephi 8:28) tingali dili kaayo malaumon sa kadaghanan kanato samtang magbasa kita sa Basahon ni Mormon. Ang kaatbang kini, sa tinuod. Sayon kaayo ang paghunahuna sa mangitngit nga padulngan niining grupo sa mga tawo nga gihulagway sa panan-awon ni Lehi sa kahoy sa kinabuhi—ang grupo kinsa nakatilaw sa bunga ug dayon mibiya.
Apan si Te Oranoa M., edad 17, gikan sa New Zealand adunay lahi nga panan-aw. “Unsay nakapadasig nako niini nga kasulatan,” miingon siya, “wala kini mag-ingon nga nawala sila sa kahangturan.”
Pagkanindot nga pagkasabut! Ug kini nagagikan mismo sa personal nga kasinatian. “Ako mismo, mibiya sa Simbahan,” miingon siya, “apan nakabalik ra ko.”
Nawala
Si Te Oranoa nagdako sa Simbahan ug naghisgot bahin sa pag-angkon og iyang pagpamatuod ug gani naghimo og espirituhanong mga tumong. “Apan kana nga pagpamatuod nahimong huyang,” mingon siya.
Sa pipila ka mga paagi, pareho sila ni Amulek, ilabi na sa paagi nga iyang gihulagway ang iyang kaugalingon ngadto sa katawhan sa Ammonihah: “Ako nagpatig-a sa akong kasingkasing, kay ako gitawag sa makadaghan ug ako wala mopatalinghug; busa ako nasayud mahitungod niini nga mga butang, apan ako wala magpakasayud” (Alma 10:6).
Alang ni Te Oranoa, kana nga kasulatan adunay personal nga kahulugan. “Sama ni Amulek, Nasayud ako niining tanang espirituhanong mga butang, ug ang Espiritu nagsulti nako sa pagbuhat og piho nga mga butang, apan tungod kay ako medyo gahig ulo ug garbuso, wala nako kini buhata. Pagkahuman, ang akong pagpamatuod ingon og nawala.”
Sa katapusan, ang istorya ni Amulek napamilyar na kaayo ni Te Oranoa. Nahimo kini nga kritikal nga panahon sa pagbalik.
Pagpangita og Nindot nga Handumanan
Bisan sa panahon nga ang iyang pagtuo nawala, makahinumdom gihapon siya sa nindot nga mga kasinatian kaniadto. Wala gayud makalimot si Te Oranoa unsay iyang gibati sa dihang misulod sa templo uban sa iyang grupo sa mga batan-on o moapil og youth conference.
“Dihay usa ka pattern,” miingon siya. “Nindot gyud ang akong bation kon mosimba ko, apan dili nindot ang akong bation kon dili ko makasimba.”
Sa katapusan miabut ang adlaw sa dihang si Te Oranoa nakahukom nga mosusi kon mabati pa ba niya pag-usab kadtong nindot nga mga pagbati. Ang una niyang gibuhat mao ang pagbasa sa bag-ong mga pakigpulong sa kinatibuk-ang komperensya.
Usa ka pakigpulong sa kinatibuk-ang komperensya sa Oktubre 2016, “Pagkat-on gikan kang Alma ug Amulek,” ni Presidente Dieter F. Uchtdorf, Ikaduhang Magtatambag sa Unang Kapangulohan, nakapahigmata sa pagbati ni Te Oranoa. Nakakita siya og dugang sa iyang kaugalingong kinabuhi ug mga pagbati samtang gihulagway ni Presidente Uchtdorf kon sa unsang paagi nga ang pagtuo ni Amulek nawala. Nakahinumdom usab siya pag-ayo sa kalipay nga iyang gibati sa dihang mas lig-on ang iyang pagtuo. Diha-diha, gusto siya nga mohimo og mga kausaban.
“Naglaum ko nga makakita og butang nga makapabalik sa akong pagpamatuod,” mipasabut siya, “mao nga gibasa nako ang pakigpulong ni Presidente Uchtdorf ug oo, gibati nako ang espirituhanong kadasig!”
Naglaum alang sa Kahangturan
Ang dalan ni Te Oranoa balik ngadto sa pagtuo dili sayon, apan dihay kahayag sa tumoy sa langub nga maoy nakaaghat niya sa pagpadayon, ang paglaum sa usa ka mahangturong pamilya.
“Ang pamilya mahimong magkauban sa kahangturan,” miingon siya. “Mao kana ang akong labing dako nga damgo, ang akong labing dako nga paglaum sa kinabuhi. Kon gusto ko nga makat-on og butang, o doktrina nga lisud masabtan, maningkamot ko ug ipangilabut kini sa mahangturong mga pamilya. Pananglit, ngano nga ang Pag-ula ni Jesukristo importante kanako? Alang sa usa ka butang, nagkinahanglan ko sa Iyang Pag-ula sa akong kinabuhi aron mahimo kong takus nga mosulod sa templo ug mabugkos ngadto sa akong pamilya alang sa kahangturan.”
Pagbalik ngadto sa Dios
Tingali makaayo ang paghinumdom nga ang mga tawo sa panan-awon ni Lehi kinsa nangahulog human makatilaw sa bunga, sa tinuod, nakatilaw gihapon niini. Nakahibalo gyud sila sa kaanindot niini, bisan kon sa makadiyot lang. Ug madiskobrehan nila kini pag-usab. Mao kana ang paglaum nga gituohan ni Te Oranoa, alang sa iyang kaugalingon ug sa uban.
“Kinahanglang dili ka na mopadayon niadtong gidili nga mga dalan sa nahibiling adlaw sa imong kinabuhi,” miingon siya. “Makabalik ka ngadto sa Ginoo kon gusto ka na.”