Daygon ang Dios sa Kahitas-an

Ni Elder Ronald A. Rasband

Sa Korum sa Napulog Duha ka mga Apostoles

Gikan sa usa ka pakigpulong ngadto sa BYU Management Society–Salt Lake Chapter in Salt Lake City, Utah, USA, niadtong Disyembre 13, 2016.

Kon kita makigtambayayong uban sa Ginoo—motuman sa iyang gusto, mobayaw niadtong naglibut kanato—kita nagsaksi nga Siya buhi ug nga Siya nahigugma kanato.

Pito ka gatus ka tuig sa wala pa matawo si Jesukristo didto sa Betlehem sa Judea, si propeta Isaias mipahayag, “Ania karon, usa ka ulay manamkom, ug magaanak og usa ka anak nga lalaki, ug pagatawgon ang iyang ngalan Emmanuel” (Isaias 7:14).

Si Haring Benjamin, 125 ka tuig sa wala pa matawo ang Manluluwas, nanagna, “Ug siya pagatawgon og Jesukristo, ang Anak sa Dios, ang Amahan sa langit ug sa yuta, ang Tiglalang sa tanan nga mga butang gikan sa sinugdanan; ug ang iyang inahan pagatawgon og Maria” (Mosiah 3:8).

Ang adlaw sa wala pa matawo ang batang si Jesus, si Nephi, ang anak nga lalaki ni Nephi, nakadungog og tingog nga nag-ingon, “Pagkaugma moabut Ako diha sa kalibutan” (3 Nephi 1:13).

Pagkasunod adlaw, tabok sa kadagatan, ang batang si Kristo natawo. Dili ikapangutana nga ang iyang inahan, nga si Maria, nahingangha sa iyang bag-ong nahimugsong anak, ang Bugtong Anak sa Amahan diha sa unod.

Sa bungtod sa Judea nga naglibut sa Betlehem, misulti si Lucas nato, ang mga magbalantay sa karnero didto sa sibsibanan (tan-awa sa Lucas 2:8). Kining mga magbalantay sa karnero “makiangayon ug balaan nga mga tawo” (tan-awa sa Alma 13:26) kinsa mosaksi sa bata nga si Kristo.

“Ug, mitungha kanila ang usa ka manolunda sa Ginoo, ug ang himaya sa Ginoo misidlak libut kanila: ug sila giabut og dakong kalisang.

“Apan ang manolunda miingon kanila, Ayaw na kamo kalisang; kay tan-awa, gidad-an ko kamog maayong balita sa dakong kalipay nga magaabut sa tanang mga tawo.

“Kay alang kaninyo natawo karon sa lungsod ni David ang Manluluwas nga mao ang Kristo nga Ginoo.

“Ug sa kalit diha uban sa manolunda ang usa ka langitnong panon nga nanagdalayeg sa Dios, ug nanag-ingon,

“Himaya sa Dios sa kalangitan, ug sa yuta panagdait sa mga tawo, nga iyang gikahimut-an” (Lucas 2:9–11, 13–14).

Hunahunaa kana nga talan-awon sa Judea—ang panganod napuno sa kahayag sa talagsaong bitoon ug mga awit gikan sa langit nga nagpaila niining importanting hitabo. Ang mga magbalantay sa karnero dayon miadto “nga nanagdali” (Lucas 2:16) aron makita ang bata nga naghigda sa pasungan. Ug wala madugay ilang “gipanugilon” (Lucas 2:17) unsay ilang nakita ug nadungog.

Matag tuig sa Pasko idugang nato ang atong saksi ngadto sa mga saksi sa mga magbalantay sa karnero—nga si Jesukristo, ang literal nga anak sa buhing Dios, miabut sa usa ka bahin sa yuta nga atong gitawag nga Balaan nga Yuta.

Ang mga magbalantay sa karnero matinahurong miduol sa kwadra aron mosimba sa Hari sa mga hari. Unsaon man nato pagsimba Kaniya niining panahona? Walay hunong nga pag-shopping? Magkapuliki sa paghimog dekorasyon ug pagpamutos? Mao ba kana ang atong pahinungod sa atong Manluluwas? O magdala kita og kalinaw sa masulub-ong kasingkasing, panagdait niadtong nagkinahanglan og mas taas nga katuyoan, himaya sa Dios sa atong kaandam sa pagbuhat sa Iyang gusto?

Si Jesus miingon. “Dali, sunod kanako” (Lucas 18:22).

Ang ebanghelyo ni Jesukristo, gipahiuli pinaagi ni Propeta Joseph Smith, nadunggan sa mga tumutuo sa tibuok kalibutan. Akong nasaksihan ang pahinungod niadtong mihangup sa Iyang sagradong pulong gikan sa mga isla sa dagat ngadto sa halapad nga Russia kinsa midawat sa sagradong pulong sa Manluluwas.

Ang Mensahe sa Pasko

Uban sa unang mga Santos nga nagpundok sa Zion mao si Hannah Last Cornaby, kinsa nanimuyo sa Spanish Fork, Utah, USA. Sa malisud nga unang mga adlaw sa gipahiuli nga Simbahan, ang Pasko usahay mailhan sa mahal nga orange o gikulit nga dulaan, o tingali rag doll—apan dili pirme. Si Hannah misulat pagka-Disyembre 25, 1856:

“Miabut ang Gabii sa Pasko ug ang akong pinanggang mga anak, nga dunay binata nga pagtuo, mibitay sa ilang medyas, naghunahuna kon [kini] ba [masudlan]. Nasubo ko, pero wala nako nila gipakita ug mipasalig ko nila nga dili sila makalimtan; ug natulog sila nga malipayong nagpaabut sa buntag.

“Walay bisan unsa nga pangpatam-is, wala ko masayud unsay buhaton. Apan kinahanglan dili sila masagmuyo. Naghunahuna dayon ko sa kalabasa sa balay nga akong gilat-an ug gikuha ang sabaw, nga dihang napabukalan og pila ka oras, nahimong tam-is nga syrup. Niini, ug gamayng rekado, nakahimo ko og gingerbread dough, nga, dihang nahiwa sa lainlaing desinyo, ug naluto sa skillet, (wala koy stove) gisudlan ang ilang medyas ug nakapahimuot nila sama sa sagad nga mga lamiang kendi.”¹

Ang tinuorayng kahulugan niining istorya mao ang asoy sa usa ka inahan nga nagpulaw nga wala gani oven para mapasayon ang iyang buhat. Apan mapasaligon siya nga mahatagan og kalipay ang iyang mga anak, aron masuportahan ang ilang pagtuo, aron makapamatuod diha sa ilang balay nga, “Malipayong adlaw!” Maayo ang tanan!”² Dili ba mao kana ang mensahe sa Pasko?

Mitudlo si Presidente Thomas S. Monson: “Ang atong mga oportunidad sa paghatag sa atong mga kaugalingon sa pagkatinuod walay kinutuban, apan aduna usab kini katapusan. Adunay mga kasingkasing nga angayang mapamaya. Adunay mabinationg mga pulong nga angayang isulti. Adunay mga gasa nga angayng ihatag.”³

Kon makigtambayayong kita sa Ginoo—magbuhat sa Iyang gusto, modasig niadtong naglibut nato—nagasaksi kita nga Siya buhi ug nga Siya nahigugma nato, bisan unsa pa may atong temporal nga mga hagit.

Human ang Scottish nga kinabig nga si John Menzies Macfarlane nagpasakop sa Simbahan uban sa iyang biyudang inahan ug igsoon, silang tulo mibiyahe ngadto sa Salt Lake City niadtong 1852. 18 anyos ang iyang edad. Sa milabay nga katuigan, nahimo siyang surveyor, builder, gani district judge, apan ang iyang musika ang nakapailado niya.

Iyang giorganisar ang iyang unang choir sa Cedar City, Utah ug midala sa iyang banda libut sa southern Utah. Human sa pasundayag sa St. George, si Elder Erastus Snow (1818–88), usa ka Apostol ug lider sa kolonya, midasig ni John nga mobalhin ngadto sa St. George ug ikuyog ang iyang pamilya ug musika uban niya.

Lisud kaayo ang panahon niadtong 1869, ug si Elder Snow mihangyo ni Brother Macfarlane nga mopasundayag og programa sa Pasko nga modasig sa espiritu sa mga tawo. Si Brother Macfarlane ganahan og bag-o ug maayong piyesa sa musika alang sa kalihokan. Apan bisan giunsa niya og sulay pag-compose, walay nahitabo. Nag-ampo siya alang sa inspirasyon ug nag-ampo pag-usab.

Dayon, usa ka gabii, iyang gipukaw ang iyang asawa ug mituaw, “Duna na koy mga pulong alang sa awit, ug duna na sab koy musika!” Dali siyang miadto sa keyboard sa ilang organ ug mitugtug sa tuno, misulat niini samtang ang iyang asawa naggunit sa nag-awup-awop nga suga sa gamayng pabilo nga naglutaw sa grasa. Ang mga pulong ug musika miabut:

Sa layong patag sa Judea,
Nadunggan awit sa himaya
Daygon ang Dios
Daygon ang Dios
Daygon ang Dios sa kahitas-an.
Ug kalinaw sa yuta!
Pagdait ipakita!4

Si Brother Macfarlane wala pa gayud makaadto sa Judea aron makita kanang kapatagan nga mas pareho sa batoon nga kilid sa kabungturan, apan ang dinasig nga mensahe sa iyang musika miabut gikan sa iyang kalag isip saksi sa pagkahimugso sa Manluluwas didto sa Betlehem, usa ka sinugdanan nga mousab sa kalibutan sa kahangturan.⁵

Si John Menzies Macfarlane mipamatuod ni Jesukristo pinaagi sa iyang musika, ug si Hannah Last Cornaby mipamatuod ni Kristo pinaagi sa pagserbisyo sa iyang mga anak. Kita usab makaserbisyo sa Ginoo ug makasaksi Kaniya pinaagi sa yanong mga buhat sa pagkadili hakog. Kita usab makahimo sa kalainan sa atong mga pamilya, sa atong mga ward, sa atong mga trabahoan, ug sa atong ubang mga bahin sa responsibilidad.

Paghimo og Kalainan

Usa ka yanong paagi nga kita makahimo og kalainan mao ang pag-apil sa tinuig nga kampanya sa Simbahan sa social media. Ang kampanya gidisenyo sa pagtabang sa mga Santos—ug sa mga anak sa Dios sa tibuok kalibutan—nga mo-focus sa Manluluwas. Niining tuiga ang Simbahan nagpasiugda og laing paningkamot sa pagsaulog sa pagkatawo ni Kristo ug sa pag-awhag sa mga tawo sa pagsunod Kaniya pinaagi sa pagserbisyo sa uban panahon sa Pasko.

Balikon sa Simbahan ang malampusong tema sa miaging tuig: “Mahimong Kahayag sa Kalibutan” (tan-awa sa Mormon.org). Ang tema gikan sa Juan 8:12, nga mabasa, “Ug kanila si Jesus misulti pag-usab nga nag-ingon, Ako mao ang kahayag alang sa kalibutan: siya nga magasunod kanako dili gayud magalakaw sa kangitngit, hinonoa magabaton siya sa kahayag nga magahatag og kinabuhi.”

Ang kampanya naglakip sa espesyal nga kalendaryo ug may kalabutan nga mga bersikulo sa kasulatan nga naghatag og mga ideya alang sa mga tawo nga moserbisyo ug mopakigbahin sa kahayag sa Pasko.

“Matag usa kanato mianhi sa yuta nga gihatagan sa Kahayag ni Kristo,” miingon si Presidente Monson. “Sa atong pagsunod sa ehemplo sa Manluluwas ug magpuyo sama sa Iyang pagpuyo ug sa Iyang pagtudlo, kana nga kahayag mosanag diha sa atong kaugalingon ug modan-ag sa dalan alang sa uban.”⁶

Mailhan nato ang Manluluwas pinaagi sa pagbuhat unsay Iyang gibuhat. Samtang magserbisyo kita sa uban, gidala nato sila—ug ang atong mga kaugalingon—paduol ngadto Kaniya.

“Pangalan Labaw sa Tanang mga Pangalan”

Panahon sa Pasko, mingawon kaayo ko sa among gamay nga apo nga si Paxton. Natawo nga dunay talagsaon nga genetic disorder, si Paxton nag-antus sa dili maihap nga mga problema sa panglawas. Ang Langitnong Amahan mitudlo sa among pamilya og daghang espesyal ug malumo nga mga leksyon panahon sa tulo ka mubo nga mga tuig ni Paxton nga mipanalangin sa among kinabuhi.

Ang akong igsoong babaye, nga si Nancy Schindler, naghimo og habol agig pasidungog ni Paxton. Gitawag niya kini og “Pangalan labaw sa Tanang mga Pangalan” Ang habol adunay 26 ka mga pangalan ni Jesukristo—mga pangalan nga nagsugod sa mga letra nga A hangtud Z. Ang habol ang nagpahinumdom nako sa mahimayaong panagkita sa pamilya sa umaabut uban ni Paxton nga nahimong posible pinaagi sa pag-antus, sakripisyo, ug Pagkabanhaw sa Manluluwas.

Ang habol nakadasig nako sa pagsugod sa pagtuon sa mga pangalan ni Jesukristo sumala sa gipadayag sa mga kasulatan. Ang pagpangita sa Iyang mga pangalan nahimong kabahin sa akong personal nga pagtuon sa kasulatan. Nakakita na ko og gatusan ka pangalan sa Manluluwas.

Usa sa akong mga responsibilidad isip miyembro sa Korum sa Napulog Duha ka mga Apostoles, ug sumala sa gipahayag sa Doktrina ug mga Pakigsaad, mao ang pagpamatuod kabahin ni Jesukristo. Ang Doktrina ug mga Pakigsaad namahayag, “Ang napulog duha ka tigpanaw nga mga konsehal gitawag ngadto sa Napulog Duha ka mga Apostoles, o talagsaon nga mga saksi sa ngalan ni Kristo sa tibuok kalibutan” (D&P 107:23; emphasis gidugang).

Karong bag-o gihangyo ko sa pagpamulong sa sakrament miting sa Primary Children’s Hospital sa Salt Lake City. Gibati nako nga naaghat sa pagpamulong kabahin ni Jesukristo ug sa Iyang malaumong mga pangalan. Mipamatuod ko sa Manluluwas isip “ang masidlak nga bitoon sa kabuntagon” (Pinadayag 22:16), usa ka “labawng sacerdote sa mga maayong butang” (Mga Hebreohanon 9:11), “usa ka Dios sa mga milagro” kinsa nabanhaw “uban sa pagpang-ayo diha sa iyang mga pako” (2 Nephi 27:23; 25:13), “Ang Prinsipe sa Kalinaw” (Isaias 9:6; 2 Nephi 19:6), ug “ang pagkabanhaw, ug ang kinabuhi” (Juan 11:25).

Sa panahon sa Pasko, ganahan ko nga mo-recite sa lain-laing mga pangalan sa Manluluwas samtang maglakaw ko padulong ug pauli gikan sa akong opisina agi sa mga suga sa Pasko sa Temple Square.

Niining tibuok panahon sa Pasko, naghinam-hinam ko sa pagsa-ulog pa og dugang sa Iyang mga pangalan ug sa pagpangita og mga oportunidad sa pagpasidungog sa Iyang pangalan. Samtang maningkamot sa paghimo og kalainan niining panahon sa pasko, naglaum ko nga himoon ninyo ang Manluluwas nga sentro sa inyong mga paningkamot ug nga kamo modala og himaya ngadto Kaniya samtang serbisyuhan ninyo ang uban pinaagi sa Iyang pangalan.

Mosaksi ko nga ang atong Amahan sa kahangturan buhi. Ang iyang plano sa kalipay mipanalangin sa kinabuhi sa matag usa sa Iyang mga anak sa tanang henerasyon. Ako nasayud nga ang iyang Pinalanggang Anak, si Jesukristo, ang bata nga natawo sa Betlehem, mao ang Manluluwas ug Manunubos sa kalibutan.

Kini nga mga pulong sa pagdayeg nagsulti sa kamatuoran sa akong mga dunggan: “Himaya sa Dios sa kalangitan, ug sa yuta panagdait, sa mga tawo nga iyang gikahimut-an.”⁷