Hangtud sa Sunod Natong Panagkita
Walay Kahadlok uban sa Kawsa ni Kristo
Gikan sa Mga Pa.5 gtulun-an sa mga Presidente sa Simbahan: Joseph Smith (2011), 426-28, 430.
Dili kamo mahimong buotan kaayo.
Ako mahigugmaon sa kawsa ni Kristo ug sa hiyas, kaputli, ug usa ka matarung, nga sumbanan sa pamatasan, ug balaang paglakaw.
Nagtuo ako sa pagpuyo nga mahiyason, matarung ug balaan nga kinabuhi sa atubangan sa Dios ug mobati nga akong katungdanan ang pagdani sa tanang tawo uban sa akong gahum sa pagbuhat og susama, nga sila unta mohunong sa pagbuhat og dautan ug magkat-on sa pagbuhat og maayo, ug putlon ang ilang mga sala pinaagi sa pagkamatarung.
Ang paglig-on sa atong hugot nga pagtuo pinaagi sa pagdugang sa matag maayo nga kalidad nga moadorno sa mga anak sa bulahan nga si Jesus, maka-ampo kita sa panahon sa pag-ampo; makahigugma kita sa atong mga silingan sama sa atong kaugalingon, ug magmatinud-anon sa mga kagul-anan, kay nasayud nga ang ganti sa ingon mas mahinungdanon diha sa gingharian sa langit. Pagkamakahupay! Pagkamalipayon! Papuy-a ako sa kinabuhi nga matarung, ug himoa nga ang akong ganti susama sa iyaha! …
Isip usa nianang adunay dakong tinguha sa kaluwasan sa tawo, ako kamong tanan nga pahinumduman sa pagpaninguha uban sa silyo sa hiyas, kabalaan, ug sa mga sugo sa Dios. Pagbinuotan, pagmaalamon, pagmakiangayon, pagmasugtanon; ug labaw sa tanan, pagmanggihatagon, sa kanunay puno sa mga maayo nga buhat. …
Pagmaaghup ug pagmapaubsanon, matarung ug putli; mobalos og maayo alang sa dautan. … Pagmapainubsanon ug pagmapailubon sa tanang mga kahimtang sa kinabuhi; dayon kita mas mahimayaong modaug.
Gibati namo sa pag-awhag sa atong mga kaigsoonan uban sa walay kahadlok, nga magmapailubon ug magmainampuon, sa paglakaw nga tinuod isip mga anak sa kahayag ug sa adlaw, nga sila unta adunay grasya sa pagsalikway sa matag pagtintal sa yawa, ug sa pagbuntog sa matag dautan diha sa takus nga pangalan sa atong Ginoong Jesukristo.
Ang hunahuna nga ang matag usa makadawat sumala sa iyang kaugalingon nga kakugi ug pag-agwanta samtang ania sa kalibutan, kinahanglan makadasig sa matag usa kinsa gitawag sa pagpangalagad niining maayong mga balita. …
Ang atong pagsalig anaa sa atong Dios, ug determinado kita, ang Iyang grasya nagtabang kanato, sa pagpabilin sa kawsa ug maghupot nga matinud-anon hangtud sa katapusan, nga kita unta makoronahan uban sa mga korona sa celestial nga himaya, ug mosulod sa kapahulayan nga giandam alang sa mga anak sa Dios. …
Dili kamo mahimong buotan kaayo. Ang pagpailub langitnon, ang pagkamasulundon halangdon, ang pagpasaylo manggiloy-on, ug pagkabayaw diosnon; ug siya nga magpabilin nga matinud-anon hangtud sa katapusan dili gayud siya kawad-an sa iyang ganti. Ang usa ka maayo nga tawo molahutay sa tanang mga butang aron sa pagpasidungog ni Kristo.