Mga Tingog sa mga Santos sa Ulahing mga Adlaw
Pagpakigbahin sa Gugma sa Manluluwas panahon sa Pasko
Paghulagway pinaagi ni Julie Rogers
Nadasig ako nga miapil sa kampanya sa Simbahan sa Pasko sa 2016 “Hayagi ang Kalibutan”. Naghinam-hinam ako nga makakompleto sa inadlaw nga mga hagit, ilabi na sa ikalimang adlaw: “Si Jesus mitabang sa masakiton, ug kamo usab makatabang.”
Nianang adlawa sa akong pagbiya padulong sa trabaho ug naglakaw agi sa kadalanan nagplano ko nga mobisita sa akong mga apohan. Nindot ang akong gibati. Pasko kadto ug ang kalibutan maanindot. Ang bagting sa kampana milanog sa kahanginan. Samtang nagkaduol ko sa hulatanan og sakyanan, ang tingog sa kampana hapit dili na madungog tungod sa usa ka babaye nga walay balay nga gisinggitan ang tigbagting sa kampana.
“Peke ka!” misinggit siya. “Gigutom ko, gitugnaw ko, gikuha nimo ang tanan alang sa imong kaugalingon! “Peke ka!”
Kadaghanan sa mga tawo mibaliwala niya, ug ang tigbagting sa kampana nagpadayon sa pagbagting. Gitaod nako ang akong headphones, apan makadungog gihapon ko sa babaye nga nagsinggit, “Peke ka! Gigutom ko! Gitugnaw ko.”
Nakahinumdom ko nga duna koy 20-dolyares sa akong bulsa. Naghunahuna ko sa paghatag niini ngadto sa babaye. “Dili,” naghunahuna ko. “Kon ihatag man gani ni nako ngadto sa usa ka tawo, ihatag nako kini ngadto sa usa ka tawo nga buotan.” Dayon ang Espiritu nagpahinumdom nako sa hagit ug kinsa ang akong gusto nga mahisama. Si Jesus mao ang Hari sa mga hari, apan miserbisyo Siya sa labing ubos. Nasayud ko unsay angay nakong buhaton.
Mipaingon ko ngadto sa babaye. Wala na siya karon magsinggit, apan ang iyang mga mata gipiyong ug mga luha miagas sa iyang mga aping. Gikuha nako ang 20-dolyares gikan sa akong bulsa ug gitunol ngadto kaniya.
“Lisud ba karong adlawa?” Nangutana ko.
Mihangad siya ngari nako. “Oo,” miingon siya.
“Pasayloa ko,” miingon ko. Gigakos nako siya, ug mihilak siya hangtud miabut ang sakyanan.
“Salamat,” miingon ang babaye sa dihang nanamilit kami sa usag usa. “Ug dili lang sa kwarta. Salamat sa paggakos. Nagkinahanglan ko og gakus.”
Ang paggakus ni bisan kinsa nga tawo diha sa dalan wala sa akong plano nga buhaton, apan nasayud ko nga butang kini nga buhaton ni Jesus. Mapasalamaton ko nga ang Ginoo mihatag kanako og oportunidad sa pagserbisyo sama sa Iyang pagabuhaton. Gitabangan ni Jesus ang masakiton, ang kabus, ug ang timawa. Makahimo usab ako.