Mga Pangutana ug mga Tubag

“Kanunay kong nag-ampo alang sa usa ka butang nga importante, apan wala ko kahibalo kon nakadawat na ba ko og tubag. Unsaon man nako sa pag-ila niini?”

Ang pagdawat og mga tubag sa mga pag-ampo gihulagway nga usa ka proseso: una tun-an ninyo ang inyong pangutana diha sa inyong hunahuna, dayon mangutana mo sa Dios kon ang inyong tubag sakto ba. Kon ang inyong tubag sakto, ang Ginoo “mosulti og kalinaw sa imong hunahuna” (D&P 6:23).

Apan kon dili kamo mobati og tumang kalinaw? O kon kamo mibati nga nakadawat mo ug tubag, apan wala mo makasiguro kon inyo ba kini o sa Espiritu Santo?

Si Elder David A. Bednar sa Korum sa Napulog Duha ka mga Apostoles, “Ang pagpadayag motubo nga hinay-hinay sa pagdagan sa panahon ug ihatag sumala sa atong tinguha, katakus, ug pagpangandam.”¹ Dili kini moabut sa kalit; kasagaran moabut kini “pagtulun-an human sa usa ka pagtulun-an, lagda human sa usa ka lagda” (2 Nephi 28:30), ug sa kasagaran kinahanglan kamong mohimo og lakang sa usa ka direksyon bisan wala pa ninyo mabati nga nakadawat sa hingpit nga tubag. Usahay mahimong dili kamo makadawat og tubag—mao kana ang panahon nga kamo molihok uban sa hugot nga pagtuo nga ang Dios motubag kon tukma na ang panahon.

Kon kamo nabalaka basin ang inyong tubag gikan kaninyo o gikan sa Espiritu Santo, hinumdumi nga ang labing maayong tubag mao nga “magdapit ug magdani [kaninyo] sa pagbuhat sa maayo, ug sa paghigugma sa Dios, ug sa pag-alagad kaniya” (Moroni 7:13).

Mubo nga sulat

1. David A. Bednar, “Ang Espiritu sa Pagpadayag,” Liahona, Mayo 2011, 88.

Hukom ug Hulat sa Espiritu

Usa ka summer wala ko mobati nga ang Ginoo mihatag nako og tubag bahin sa usa ka importante nga desisyon. Sinsero akong nag-ampo kada adlaw aron makahibalo sa Iyang kabubut-on alang kanako, ug gisultihan nako Siya unsay akong gitinguha nga buhaton. Bisan walay klaro nga tubag, mihimo ko sa akong desisyon. Diha-diha akong gibati ang Espiritu nga nagsaksi ngari nako nga ang desisyon nga akong gihimo makatabang nako nga molambo ug mahisama sa akong Amahan sa Langit. Usahay kinahanglan kitang molihok aron makadawat og tubag—ang Langitnong Amahan motahud sa atong kabubut-on ug sa atong matarung nga mga tinguha. Kon nagpuyo kita nga takus, ang Iyang Espiritu mogiya nato pinaagi sa atong mga tinguha tungod kay kini tukma sa Iyang kabubut-on.

Amanda H., edad 16, Utah, USA

Pag-ampo alang sa Panabang

Nag-ampo ko ug nakadawat og mga tubag sa daghang mga butang, apan ang mga higayon nga mao ang labing klaro mao ang bahin sa buluhaton sa eskwelahan. Sa dili pa ang usa ka exam, mag-ampo ko nga makalma ra ug makahinumdom sa impormasyon nga akong gitun-an. Daghang mga higayon nakahinumdom ko sa tibuok mga paragraph sa impormasyon nga akong nahibaloan nga dili gyud unta nako mahinumduman kon wala pa ang Iyang tabang. Gipanalanginan gyud niya ang akong kinabuhi, ug gihatagan nako og bili ang gahum sa pag-ampo ug sa Iyang impluwensya nga akong gibati niini.

Emily B., edad 18, Queensland, Australia

Pagmapailubon ug Pagmabinantayon

Sa dili pa lang dugay, gihagit nako ang akong kaugalingon sa pag-ampo alang sa mga oportunidad sa pagserbisyo. Naghunahuna ko og mga paagi nga ako makatabang sa uban, apan wala ko makadawat og tubag nga akong gituohan nga usa ka aghat. Nawad-an na ko og paglaum sa dihang ang akong mama mipakigbahin niini kanako Alma 5:40: “Bisan unsa nga maayo nagagikan sa Dios.” Nakaamgo ko nga ang malinawon nga hunahuna sa pagserbisyo nga akong nasinati mao ang mga pag-aghat gikan sa Espiritu Santo. Nasayud ko nga ang atong mga pag-ampo tubagon kanunay; magmapailubon lang kita, magbinantayon, ug mosalig sa Ginoo.

Lybee B., edad 16, Oregon, USA

Salig sa Espiritu

Kon makat-on kamo sa pagsalig sa Espiritu Santo ug makapalambo og abilidad sa pag-ila sa paagi nga ang Langitnong Amahan motubag kaninyo, makita ninyo kon sa unsa nga paagi nga ang Espiritu anaa alang kaninyo. Ang iyang tingog moaghat nato sa ligdong nga paagi nga kon kita nagkapuliki sa mga butang sa kalibutan, dili kita makamatikod sa hinay nga mga paghung-hong ug mga pagbati nga moabut gikan sa kahitas-an. Hinoon, kon kita nagpuyo sa matarung nga paagi, nan makabaton kita kanunay sa saad nga kita masayud sa atong kasingkasing unsa ang gisulti sa Espiritu agig tubag sa atong mga pangamuyo.

Sister Ribeiro, edad 24, Brazil Porto Alegre South Mission

Sulayi Kini ug Tan-awa!

Usahay ang Ginoo nagkinahanglan nga kita molihok sa atong pagtuo sa dili pa kita makakuha og kompleto nga tubag. Gusto ba kamo nga masayud nga ang Pulong sa Kaalam usa gayud ka tinuod nga sugo gikan sa Dios? Nan sunda kini! Gusto ba kamo nga masayud kon ang Basahon ni Mormon tinuod? Nan basaha kini! Saligi ang saad sa Juan 7:17: “Kon tuyoon ni bisan kinsa ang pagbuhat sa kabubut-on sa Dios, nan iyang mahibaloan kon ang akong gitudlo gikan ba sa Dios o nagsulti ba lamang ako sa kinaugalingon kong pagbulot-an.”

Preston O., edad 19 Utah, USA

Pinaagi sa Gahum ni Kristo

Nagtan-aw ko sa Face to Face nga sibya uban ni Elder Rasband ug Sister Oscarson sa dihang usa ka batan-on nangutana sa samang pangutana bahin sa pagdawat og mga tubag. Mikutlo si Sister Oscarson sa Moroni 7:16, “Pinaagi sa gahum ug gasa ni Kristo … kamo mahimo nga masayud uban sa hingpit nga kasayuran nga kini gikan sa Dios.” Kana nga mga kasulatan nagpakita nato nga kita makahibalo sa kabubut-on sa Dios alang nato uban sa hingpit nga kasayuran. Kon nabati ninyo ang Espiritu kamo makahibalo sa tubag.

Sara S., edad 17, Santa Catarina, Brazil

Ang mga tubag gituyo alang sa tabang ug panglantaw, dili isip opisyal nga mga pamahayag sa doktrina sa Simbahan.

Ang Inspirasyon Moabut sa Hinay-Hinay

“Kon kita magtinguha og inspirasyon sa pagtabang sa paghimo og mga desisyon, ang Ginoo mohatag og malumo nga mga pag-aghat. Kini nagkinahanglan nga kita maghunahuna, maggamit og hugot nga pagtuo, magtrabaho, makigbisog usahay, ug molihok. Panagsa ra nga ang tanang tubag sa desisyon sa importanting butang o komplikado nga problema moabut nga kompleto sa usa ka higayon. Kasagaran, moabut kini sa hinay-hinay, nga wala pay makita nga resulta.”

Si Elder Richard G. Scott (1928–2015) sa Korum sa Napulog Duha ka mga Apostoles, “Learning to Recognize Answers to Prayer,” Okt. 1989 nga kinatibuk-ang komperensya.

Umaabut nga Pangutana

“Usahay dili ko mobati nga takus nga higugmaon sa Manluluwas. Unsaon nako sa pagbuntog niini nga pagbati ug makakita sa kabililhon sa kaugalingon?”

Isumiter ang inyong tubag ug, kon ganahan, apili og klaro kaayo nga litrato hangtud Enero 15, 2017, sa liahona.lds.org (i-klik ang “Submit an Article”).

Ang mga tubag tingali i-edit alang sa gitas-on o sa pagklaro.