Mongolia’s Got Talent!
Ang mga tagsulat nagpuyo sa Utah, USA, ug Ulaanbaatar, Mongolia.
Sa pagkumpara pipila ra ka mga taga-Mongolia ang nakahibalo mahitungod sa Simbahan, apan kini nga choir nakatabang nga mausab kana.
Litrato sa maayong kabubut-on ni Odgerel Ochirjav; imahe sa pundok sa mga tawo gikan sa Getty Images
Sa miaging Disyembre usa ka choir gikan sa Ulaanbaatar Mongolia East ug West Stakes nakaabut sa semi-final sa nasyunal nga salida sa telebisyon nga Mongolia’s Got Talent. Ang choir—naglangkob sa mga estudyante sa seminary ug institute, katunga niini mga returned missionary—wala magdahum nga makaangkon niini nga matang sa oportunidad sa pagpakigbahin sa ilang mga pagtuo ug mga talento.
Niadtong 2015 usa ka Area Seventy mibisita sa Mongolia ug mihatag og training kabahin sa mga paningkamot sa public affairs sa Simbahan. Si Odgerel Ochirjav, presidente sa Ulaanbaatar Mongolia West Stake, nagduha-duha sa pagpadayon. Dayon niadtong Enero 2016 ang iyang bayaw nga lalaki mitawag ug miingon, “Nagtan-aw ko sa Mongolia’s Got Talent. … Duna koy kusog nga impresyon nga ang choir sa inyong Simbahan kinahanglang moapil.”
Gihisgutan ni Presidente Ochirjav ang ideya uban sa choir director, nga si Sister Unurjargal Purev. Siya ug ang mga miyembro sa choir ganahan sa posibilidad. Ang choir nailhan nga Zion, o “SION,” usa ka acronym sa mga taga-Mongolia alang sa espiritu, hugot nga pagtuo, hunahuna, ug panaghiusa.
Ang Unang Hugna
Alang sa unang hugna sa kompetisyon niadtong Marso 2016, ang SION mipasundayag pinaagi sa pagsagol sa duha ka mga kanta. Usa ka maghuhukom miingon, “Nakita nako nga mihayag ang inyong mga nawong! … Kinahanglan natong ibutang ang inyong video sa YouTube aron ipakita kini sa tibuok kalibutan.”
Laing maghuhukom nangutana kon unsay ilang buhaton kon makadaog sila og U.S. $50,000. Nalipay siya sa dihang sila miingon nga gusto nila nga ihatag ang tanan, isip usa ka espesyal nga regalo sa Pasko ngadto sa usa ka orphanage.
Ang Ikaduha nga Hugna
Sa 400 ka mga partisipante, ang SION apil sa 200 nga makaapil sa ikaduhang hugna, apan ang ilang pasundayag naka-iskedyul sa samang adlaw sa multi-stake youth conference, nga naglakip sa 35 ka mga miyembro sa choir. Nakahukom ang choir nga moapil sa ikaduhang hugna, mao nga miabang sila og bus ug, pagkahuman sa ilang pasundayag, mibiyahe og otso oras ngadto sa youth conference.
Sa 200 ka mga mipasundayag, ang SION apil sa 32 nga makaapil sa semi-finals. Ang choir nagsugod na nga nabutang sa social media kalabut sa Mongolia’s Got Talent.
Ang Semi-finals
Nagpraktis sila gikan sa Hunyo hangtud Septyembre aron mangandam alang sa semi-finals. Sa adlaw sa pasundayag, mimata sila sa alas 4:00 sa buntag nga -29 degrees F (-34 degrees C) ang klima. Si Sister Nomuungerel Enkhtuvshin, usa ka miyembro sa choir, miingon, “Daghang mga miyembro sa among grupo ang nagpislango. Apan naayo ra sila sa dihang nag-ampo mi alang kanila.”
Ang mga tawo sa tibuok Mongolia mitan-aw sa pasundayag ug mi-text sa ilang boto.
Si Brother Shijir Purevdorj miingon, “Isip resulta niining salida sa TV, daghang mga tawo ang nakabaton og positibo nga kinaiya ngadto sa Simbahan.”
Ang mga Panalangin
Ang mga miyembro sa choir mismo nakadawat og mga panalangin. Si Brother Odgerel Tumursukh miingon, “Among gihalad ang among atensyon ug panahon sulod sa tibuok tuig samtang among gihimo ang among mga trabaho ug ubang mga bahin sa among mga kinabuhi. Bisan og lisud kini, nakadawat mi og daghang mga panalangin. Nakat-unan nako ang pagdumala sa akong oras ug pagsakripisyo alang sa Ginoo.”
Agig dugang sa nagtubo nilang pagtuo, ang mga miyembro sa choir nakabaton og pagsalig sa kaugalingon, nakapalambo og panaghigalaay, ug nakat-on og panaghiusa. “Ang pagkanta diha sa choir nakatabang namo sa pagpasaylo ug pagsuporta sa usag usa,” miingon si Brother Ganbaatar Ulziiduuren. “Mas nagkahiusa kami.” Si Sister Bilguunzaya Tungalagtuul nakat-on “nga kinahanglan nga dili ako magduha-duha sa akong kaugalingon o maghunahuna nga wala koy mahimo.”
Miingon si Brother Bayartsogt Lhagvajav, “Ang pagkanta diha sa choir nakahatag og daghang mga panalangin sa akong pamilya, ug nakatabang usab kini nako sa pagdawat og mga tubag nga akong gitinguha taud-taod na. Ang among mga lider mihatag namo og [mga] solusyon. … Nakapalig-on kini sa akong pagpamatuod nga ang atong mga lider gitawag sa Dios.”
“Sa dihang miapil ko sa Mongolia’s Got Talent,” si Sister Onon Dalaikhuu mipasabut, “Nakat-unan nako nga ang pag-awhag ug pagsuporta sa usag usa [mao ang] yawe sa [atong] kalampusan.” Ang mga responsibilidad ni Sister Dalaikhuu naglakip sa pag-organisar sa mga crew member, nga nakatabang sa pagpalig-on sa iyang mga abilidad sa pagpangulo. Midugang siya, “Gibati namo nga [ang] Ginoo migiya ug miimpluwensya namo. Daghan namo ang masakiton, busy, gikapoy, ug mibati nga nabug-atan. Hinoon, sa dihang nag-ampo ming tanan, ingon og nakakaplag mi og dugang gahum ug tinguha sa paglahutay.”
Bisan og ang choir wala makadawat og igong mga pagbotar aron makaapil sa finals, ang ilang pasundayag nakahatag sa Simbahan og positibo nga oportunidad nga mailhan sa tibuok Mongolia. Si Presidente Ochirjav mipasabut, “Masulundon kita sa assignment nga gihatag sa atong mga lider sa priesthood, ug ang Ginoo miandam og paagi. … Karon ang tibuok siyudad [Ulaanbaatar] naghisgot sa pag-apil sa Mormon choir sa Mongolia’s Got Talent.”