Ang Bisita sa Gabii sa Pasko
Ang tagsulat nagpuyo sa Idaho, USA.
Mao gyud kini ang labing nindot nga gabii sa tuig. Karon madaut kini!
“Manganta sa mga kanta sa pasko sa bata nga si Kristo: Pahibaloa ang imong silingan nga ikaw nagpakabana” (Children’s Songbook, 51).
Ganahan si Clara sa tradisyon sa pamilya sa Gabii sa Pasko. Una mangaon sila og gi-bake nga isda alang sa panihapon ug mga biskwit sa Pasko alang sa dessert. Dayon bisitahon nila ang merkado sa Pasko. Kon makauli na sila, magbasa sila sa istorya sa Pasko gikan sa Biblia. Ug sa dili pa mangatulog ilang pasigaon ang Christmas tree sa unang higayon ug matag usa mag-abli og usa ka regalo. Mao kadto ang paborito nga gabii sa tuig ni Clara. Dili na siya makahulat!
Hangtud nga mipahibalo si Mama.
“Duna kitay espesyal nga bisita sa Gabii sa Pasko niining tuiga. Nakahinumdom mo ni Ms. Rainer?”
Nakasinggit si Clara. “Ang silingan nga giimbitar ni Papa ngadto sa simbahan sa miaging semana?”
“Husto kana. Gikuha siya ni Papa karon.”
Napalingkod si Clara. Unsaon niya nga marelax ug malingaw uban sa wala mailhi nga tawo? Nadaut na ang Gabii sa Pasko! Hinoon, si Ms. Rainer wala moadto sa simbahan sa dihang giimbitar siya ni Papa. Tingali dili siya moanhi niining higayuna.
Apan sa dihang miabut na si Papa, ang “espesyal nga bisita” uban na niya. Morag gikapoy si Ms. Rainer ug magul-anon. Miingon si Clara og hello. Apan dili siya gusto nga mosulti og bisan unsa pa. Sa panihapon nagtan-aw lang siya sa iyang pagkaon samtang si Mama ug Papa nakigsulti ni Ms. Rainer.
“Nakaeskwela ka ba og mga dance lesson?” hinay nga pangutana. Nakakita si Clara nga si Ms. Rainer naghulat nga motubag siya. Miyango siya ug mitan-aw og balik sa iyang plato.
“Ako sad,” miingon si Ms. Rainer, hinay gihapon ang iyang tingog. “Unsa ang imong paborito nga estilo sa sayaw?”
Mikibo si Clara ug gitulod ang iyang mga utanon libut sa iyang plato.
“Ganahan ko og ballet,” miingon si Ms. Rainer. “Apil ko sa dance team sa unibersidad. Usa ka tuig mibiyahe mi sa tibuok Europe. Nindot kaayo kadto.”
Mitan-aw si Clara. Kana mora og nindot kaayo.
“Unsa pa ang imong ganahan?” nangutana si Clara.
Mipahiyom og gamay si Ms. Rainer. “Magpatukar og piano. Ug math.”
Misiga ang mga mata ni Clara. “Tinuod ba? Ang math mao ang akong paborito nga subject!”
Nakigsulti si Clara ngadto ni Ms. Rainer sa nahibiling oras sa panihapon. Nahibaloan niya nga si Ms. Rainer adunay college degree sa math ug nag-eskwela aron mahimong math professor sa dihang iyang gikatagbo ang iyang bana. Nakahimo og dili maayong mga pagpili ang iyang bana ug karon atua sa prisohan.
Human sa panihapon nagpabilin si Clara uban ni Ms. Rainer samtang miadto sila si Papa ug Mama sa merkado sa Pasko. Ug sa dihang nagbasa sila sa istorya sa Pasko, iyang gipakigbahin ang iyang mga kasulatan uban ni Ms. Rainer aron siya makasunod.
Sa wala madugay oras na nga mangabli sa mga regalo. Si Clara nakakuha og baga-baga nga mga pajama. Ganahan na kaayo siya nga isul-ob kini! Apan wala siya ganahi nga si Ms. Rainer walay regalo.
Diha dayon si Mama mitunol og regalo ngadto ni Ms. Rainer. Maulawon nga mipahiyom si Ms. Rainer ug miabli sa parisan nga asul nga mga medyas. Mitan-aw siya ni Mama nga nagluha ang mga mata. “Salamat. Wala na kinahanglana nga mohatag pa ka nako.”
Miadto si Clara sa iyang kwarto ug gisul-ob ang iyang bag-ong pajama. Dili siya makahunong sa paghunahuna ni Ms. Rainer. Ingon og mapasalamaton kaayo siya nga nakadawat og mga medyas alang sa Pasko!
Samtang gisul-ob ni Clara ang iyang kaugalingong mga medyas, nakadungog siya og maanindot nga musika nga gipatukar. Nagdagan siyang nanaog ug nakita sila si Mama ug Papa nga nanganta og kanta sa Pasko samtang si Ms. Rainer nagpatukar sa piano. Miapil si Clara. Samtang siya nagkanta, usa ka nindot nga pagbati ang diha sa iyang kasingkasing. “Tingali dili diay kaayo bati nga dunay bisita sa Gabii sa Pasko,” naghunahuna siya.
Pagka-Dominggo, si Ms. Rainer miadto sa simbahan ug milingkod uban sa pamilya ni Clara atol sa sakrament miting. Nalipay kaayo siya. Mipahiyom si Clara samtang iyang gipakigbahin ang iyang hymnbook uban ni Ms. Rainer. Tingali panahon na nga dugangan ang tradisyon sa Gabii sa Pasko.