Mga Tingog sa mga Santos sa Ulahing mga Adlaw
Gasa sa Usa Ka Pamilya alang sa Manluluwas
Sa nagkaduol na ang Disyembre, nagkapuliki ko sa pagpangandam sa buluhaton sa panahon sa Pasko. Sulod sa upat ka tuig, ang kasaulogan sa Pasko gihimo sa among panimalay, apan niining tuiga gibati nako ang kabug-at. Sa dihang gihisgutan nako uban sa akong bana ang tanan nga kinahanglan namong buhaton—pagpamalit og mga regalo, pag-andam sa pagkaon, ug sa pagbuhat sa daghan pang mga butang—nakahukom kami sa pagkanselar sa salo-salo sa Pasko ug mobuhat og lahi nga butang niini nga Pasko. Gusto namong buhaton ang butang nga makahatag kami og gasa alang sa Manluluwas.
Sa tibuok Disyembre, naghimo kami og mga family home evening mahitungod sa kinabuhi ni Jesukristo, miadto sa templo, ug nagplano og mga proyekto sa pamilya sa pagserbisyo. Ang akong bana usa ka bishop nianang higayuna, ug nakahukom kami nga sa Adlaw sa Pasko nga manganta kami alang sa tanang mga biyuda sa ward. Isip pamilya, nagsugod kami sa pagpraktis og pipila ka mga himno nga among kantahon. Ang akong mga anak ganahan nga mokanta sa “Away in a Manger” (Hymns, no. 206).
Sa Gabii sa Pasko, naghimo kami og mga kard nga dunay espesyal nga mensahe ug nag-andam og mga pagkaon aron dad-on sa among pagbisita. Nalipay ko nga nagtan-aw sa among pamilya nga nagkahiusa ug malipayon nga moserbisyo sa uban nianang maong gugma. Mabati nako ang espiritu sa Pasko.
Sa Adlaw sa Pasko, ang among mga anak naghinam-hinam kaayo nga mobisita. Sa kada panimalay nga among bisitahan, gibati namo nga mas malipayon, ug ingon nga ang mga himno nagkanindot matag higayon nga kantahon namo. Sa pag-abut namo sa katapusan nga balay, mora og walay tawo. Naghulat mi og pipila ka minuto, ug ang mga bata wala na mahimutang. Sa katapusan usa ka hamtong nga biyuda migawas ug nakighimamat namo nga nagsul-ob na sa sinina nga pang-Dominggo ug maayo nga pagkasudlay ang iyang buhok. Sa dihang nakakita siya namo, miluha ang iyang mga mata. Naemosyonal usab ko ug dili hapit makakanta.
Sa among pagpamauli, ang among singko anyos nga anak nga babaye misulti namo nga dili siya gusto nga mopauli apan gusto nga magsige og kanta. Wala pa gani ko makatubag, ang akong nuwebe anyos nga anak miingon, “Buhaton lang gud na nato og usab sa sunod tuig!”
Alang sa among pamilya, dili gayud makalimtan kini nga Pasko tungod kay nabayaw namo ang uban ug nakapakita sa among gugma alang ni Jesukristo. Samtang namalandong ko sa mga nanghitabo nianang adlawa, gibati nako ang gugma sa Ginoo ug nahinumdom sa Iyang mga pulong, “Sa pagkatinuod, magaingon ako kaninyo, nga maingon nga gibuhat ninyo kini ngadto sa usa sa mga labing gagmay niining akong mga igsoon, gibuhat usab ninyo kini kanako” (Mateo 25:40).