Ang Ebanghelyo ni Jesukristo usa ka Dangpanan ug Panalipod
Ang tagsulat nagpuyo sa Curitiba, Brazil.
Ang mga pagtulun-an sa Doktrina ug mga Pakigsaad makapanalipod nato gikan sa mga kalisud nga atong atubangon samtang kita mangandam alang sa Ikaduhang Pag-anhi sa Ginoo.
Our Saviour, gikan sa SuperStock/Getty Images; background pinaagi ni David Clapp/Getty Images
Ang Ginoo gusto nga manalipod sa Iyang katawhan. Sa panahon sa grabe nga pagpanggukod diha sa Simbahan, Iyang gihatagan og gibug-aton ang kaimportante sa pagpundok ngadto sa Zion “alang sa usa ka panalipod, ug alang sa usa ka dangpanan gikan sa unos” (D&P 115:6; emphasis gidugang).
Kini nga dangpanan ug panalipod makita pinaagi sa pagsunod sa ebanghelyo ni Jesukristo samtang kita “mosiksik niini nga mga sugo” (D&P 1:37). Busa, atong susihon ang pipila ka mga baruganan nga nakita sa Doktrina ug mga Pakigsaad nga, kon nasabtan ug gisunod, makahatag og panalipod ug mahimong dangpanan batok sa tintasyon, dautan, ug sa ubang mga kakuyaw nga giatubang nato karon.
Panalipdan Kita kon Kita Magtinguha sa Espiritu Santo
Ang pagbaton sa Espiritu Santo uban nato mahimong usa ka dangpanan ug panalipod gikan sa kalibutan. Ang Ginoo misaad nga kon si Oliver Cowdery “mogamit” sa gasa sa pagpadayag, “kini mao ang moluwas kanimo gikan sa mga kamot sa imong mga kaaway, diin, kon dili pa tungod niini, sila mopatay kanimo ug modala sa imong kalag ngadto sa kalaglagan” (D&P 8:4). Tan-awa nga pinaagi sa tingog sa Espiritu, si Oliver Cowdery mahimong panalipdan gikan sa kamatayon ug gikan sa sala.
Ang pagdawat sa kamatuoran pinaagi sa gahum sa Espiritu Santo makapanalipod kanato batok sa mga pagtulun-an sa mga tawo ug sa mga bakak ug mga panglimbong ni Satanas. Ang Ginoo misaad nga “sila mga maalamon ug nakadawat sa kamatuoran, ug nakadawat sa Balaan nga Espiritu alang sa ilang paggiya, ug wala malimbongi—sa pagkatinuod Ako moingon nganha kaninyo, sila dili pagaputlon ug ilabay ngadto sa kalayo, apan molahutay niana nga adlaw” (D&P 45:57; emphasis gidugang). Ang gahum sa Espiritu Santo mosulat sa kamatuoran diha sa atong mga kasingkasing ug manalipod nato gikan sa pagpanglimbong.
Apan ang pagpaminaw sa mga aghat sa Espiritu wala magpasabut nga panalipdan kita gikan sa tanang pagsulay. Ang Seksyon 122 sa Doktrina ug mga Pakigsaad nagpakita nga bisan kon takus, mahimo kitang mag-atubang og mga kasubo ug mga hagit. Sa panan-aw ug kaalam sa Dios, kinsa “nasayud sa tanan nga mga butang” (D&P 127:2), “kining tanan nga mga butang makahatag [kanato] og kasinatian, ug alang sa [atong] kaayohan” (D&P 122:7).
Panalipdan Kita kon Mosunod Kita sa Buhi nga mga Propeta
Sa adlaw nga ang Simbahan naorganisar, ang Ginoo misugo sa Iyang mga Santos sa pagpaminaw sa propeta:
“Ikaw maminaw ngadto sa tanan niya nga pulong ug mga sugo diin siya mihatag nganha kanimo ingon nga siya nakadawat kanila, maglakaw sa tanan nga pagkabalaan diha sa akong atubangan;
“Kay ang iyang [ang Presidente sa Simbahan] pulong ikaw makadawat, ingon og gikan sa akong kaugalingon nga ba-ba, sa tanan nga pagpailub ug hugot nga pagtuo.
“Kay pinaagi sa pagbuhat niini nga mga butang ang mga ganghaan sa impyerno dili makabuntog batok kanimo; oo, ug ang Ginoong Dios mopatibulaag sa mga gahum sa kangitngit gikan sa imong atubangan, ug mohimo sa mga langit sa pagkurog alang sa imong kaayohan, ug himaya sa iyang ngalan” (D&P 21:4–6).
Ang Ginoo misulti kanato pinaagi sa Doktrina ug mga Pakigsaad nga “sila kinsa dili maminaw sa tingog sa Ginoo, ni sa tingog sa iyang mga sulugoon, ni maminaw sa mga pulong sa mga propeta ug mga apostoles, isalikway gikan sa mga katawhan” (D&P 1:14; emphasis gidugang).
Ang pagpaminaw ug paggamit sa mga pagtulun-an sa buhi nga mga propeta makahatag og panalipod ug siguridad, kay sila naghisgot sa atong mga problema karon ug mosulti nato unsay atong kinahanglan nga buhaton aron mabuntog kini nga mga hagit. Talagsaon nga panalangin nga makabaton og buhi nga mga orakulo sa Ginoo.
Sa Doktrina ug mga Pakigsaad 101:43–62, ang Ginoo naggamit og sambingay bahin sa ubasan sa oliba sa pagpakita sa kaimportante sa pagpaminaw sa usa ka buhi nga propeta. Ang sambingay mitandi sa propeta ngadto sa usa ka magbalantay sa tore. Sa karaang panahon ang mga tawo mitukod og mga tore diin makita sa magbalantay ang gawas sa siyudad ug makapasidaan sa katawhan kon nagpadulong na ang kaaway.
Ang sambingay nagsugod: “Pagtukod og usa ka tore, aron adunay usa nga molantaw sa yuta sa palibut, aron mahimo nga usa ka magbalantay diha sa tore, aron ang akong mga kahoy nga oliba dili matumba kon ang kaaway moabut aron sa pagdaut ug pagkuha nganha kanila sa bunga sa akong ubasan” (bersikulo 45; emphasis gidugang).
Si Elder M. Russell Ballard sa Korum sa Napulog Duha ka mga Apostoles mitudlo bahin sa panalipod ug mga panalangin nga moabut sa pagsunod sa mga pulong sa tambag sa usa ka buhi nga propeta: “Dili gamay nga butang, akong mga kaigsoonan, nga dunay propeta sa Dios sa atong taliwala. … Kon makadungog kita og tambag sa Ginoo nga gipahayag pinaagi sa mga pulong sa Presidente sa Simbahan, kinahanglan nga positibo ug walay langan nga mosanong. Ang kasaysayan nagpakita nga adunay kasiguroan, kalinaw, kauswagan ug kalipay sa pagsanong sa mapanagnaong mga tambag.”1
Labaw nga importante kay sa pisikal nga panalipod nga moabut gikan sa pagpaminaw sa mga propeta mao ang espirituhanon nga panalipod. Gikinahanglan gyud kini pag-ayo, kay si “Satanas nagtinguha sa paglimbong kaninyo, nga siya unta makabuntog kaninyo” (D&P 50:3). Ang pagpaminaw sa mga propeta makapanalipod kanato gikan sa mga pilosopiya sa kalibutan ug “sa maliputon nga paglingla sa mga tawo, diin sila naghulat aron sa pagpangilad” (D&P 123:12).
Panalipdan Kita kon Kita Matinud-anon sa Kaminyoon
Detalye gikan sa Choosing Everything, ni Brian Kershisnik, dili mahimong pakopyahan; background pinaagi ni Claudio Contreras/naturepl.com/Getty Images
Ang Ginoo misaad nato nga ang bag-o ug walay katapusan nga pakigsaad sa kaminyoon mahimong mahangturon (tan-awa sa D&P 132:19). Kining doktrina sa kahimayaan mao ang dangpanan gikan sa mga bakak nga relasyon nga komon kaayo sa atong kalibutan. Bisan og daghang mga tingog sa kalibutan nangangkon nga ang kaminyoon kinaraan, samok-samok, o wala kinahanglana, ang tingog sa Ginoo nagpahayag, “Kinsa kadto nga nagdili sa pagminyo wala itugot sa Dios, kay ang kaminyoon gi-orden sa Dios ngadto sa tawo” (D&P 49:15).
Nagtudlo ang Ginoo kanato unsaon sa pagprotektar sa atong kaminyoon, “Higugmaa ang inyong asawa sa inyong tibuok nga kasingkasing, ug unong ngadto kaniya ug wala nay lain” (D&P 42:22).
Si Presidente Spencer W. Kimball (1895–1985) mipasabut sa malukpanon nga matang niini nga kasugoan:
“Kon ang Ginoo mosulti sa inyong tibuok kasingkasing, kini nagpasabut nga walay lain ni kabahin. Ngadto sa mga asawa, ang Ginoo misugo: ‘Higugmaa ang imong bana sa imong tibuok nga kasingkasing, ug unong ngadto kaniya ug wala nay lain.’
“Ang mga pulong wala nay lain nagwala sa tanang tawo ug sa tanang butang. Dayon ang kapikas mahimong mas labaw pa sa kinabuhi sa bana o sa asawa, ug dili ang sosyal nga kinabuhi ni ang pagpanarbaho ni pulitikanhong kinabuhi ni bisag unsa nga interes ni tawo ni butang nga molabaw gayud sa kaubang kapikas.”2
Unsay atong makita dako og epekto nato alang sa maayo o sa dautan. Mao nga sa akong hunahuna gipasidan-an kita sa Ginoo sa mosunod nga bersikulo: “Siya nga magtan-aw sa babaye nga may kahigal ngadto kaniya naglimud sa tinuohan, ug dili makaangkon sa Espiritu, ug kon siya dili maghinulsol siya isalikway” (D&P 42:23; emphasis gidugang).
Aron panalipdan gikan sa mga pang-ataki sa kaaway, ang atong mga mata ug mga kasingkasing kinahanglang itumong lamang ngadto sa atong kapikas ug ngadto sa Ginoo. Kinahanglang dili nato tugutan ang atong mga mata nga magliraw-liraw o magtinguha og lain kay sa atong kapikas. Kinahanglan nga atong siradoan ang atong mga kasingkasing ug mga hunahuna gikan niana nga tintasyon. Mao kini ang tambag sa Ginoo alang sa kalampusan sa kaminyoon.
Panalipdan Kita kon Moserbisyo Kita og Misyon
Duna kitay daghang mga oportunidad sa pagserbisyo diha sa Simbahan, ug ang Ginoo “mahimuot sa pagpasidungog niadto kinsa nag-alagad [Kaniya]” (D&P 76:5). Importante nga mga doktrina gitudlo sa Doktrina ug mga Pakigsaad bahin sa pagserbisyo og mga misyon.
Ang Ginoo nagsaad nga “bisan kinsa nga tawo ang molakaw ug mosangyaw niini nga ebanghelyo sa gingharian, ug dili mapakyas sa pagpadayon nga matinud-anon sa tanan nga mga butang, dili kapuyon diha sa hunahuna, ni magkulang sa panabut, ni kapuyon ang lawas; ug usa ka buhok sa iyang ulo dili mahulog ngadto sa yuta nga dili mahibaloan. Ug sila dili gutumon, ni uhawon” (D&P 84:80). Timan-i nga ang Ginoo dili mopagawas nato gikan sa mga kalisud apan misaad nga kita anaa sa Iyang balaanong pag-atiman.
Siya midugang, “Ako anaa sa inyong tuo nga kamot ug sa inyong walà, ug ang akong Espiritu mahimo nga anaa sa inyong mga kasingkasing, ug ang akong mga anghel anaa libut kaninyo, aron sa pagtabang kaninyo” (D&P 84:88). Kon moserbisyo kita Kaniya, “mahinabo nga ang gahum magpabilin diha kanimo; ikaw makaangkon og gamhanan nga hugot nga pagtuo, ug Ako mag-uban kanimo ug mag-una sa imong atubangan.” (D&P 39:12). Kadtong kinsa moserbisyo og misyon uban sa ilang tibuok kasingkasing adunay saad nga sila “pagapanalanginan sa espirituhanon ug temporal nga paagi” (D&P 14:11).
Ang Ginoo mohatag niini nga panalipod ngadto sa mga pamilya niadtong nagserbisyo: “Ako, ang Ginoo, mohatag kanila og usa ka saad nga Ako mosangkap sa ilang mga banay; ug usa ka masangputon nga pultahan ang pagaablihan alang kanila, gikan karon” (D&P 118:3).
Ug ang matinud-anong mga misyonaryo gisaaran nga “ang imong mga sala mapasaylo diha kanimo, ug ikaw magpas-an og binugkos diha sa imong likod” (D&P 31:5). Kini nga panalangin mao ang dangpanan alang sa atong mga kalag.
Panalipdan Kita Kon Mosunod Kita sa Balaod sa Ikapulo
Sa Doktrina ug mga Pakigsaad makita nato ang mosunod nga pagtulun-an mahitungod sa ikapulo: “Tan-awa, karon kini gitawag karong adlawa hangtud sa pag-anhi sa Anak sa Tawo, ug sa pagkatinuod kini mao ang adlaw sa sakripisyo, ug ang adlaw alang sa ikapulo sa akong mga katawhan” (D&P 64:23).
Gusto ko nga mosulti nga ang balaod sa ikapulo supak sa mathematics tungod kay ang 90 mas dako pa kay sa 100. Sa atong paghatag sa Ginoo sa 10 porsyento sa atong kinitaan, misaad Siya nga ‘buksan ko kaninyo ang mga tamboanan sa langit, ug buboan ko kamo sa panalangin, sa pagkaagi nga wala na unyay dapit nga igong kabutangan sa pagdawat niini” (Malaquias 3:10; tan-awa usab sa 3 Nephi 24:10).
Sa pagtimbang-timbang kon unsa ka lig-on ang atong pagtuo, tan-awon nato ang atong kinaiya sa balaod sa ikapulo. Ang pagbayad sa ikapulo dili kabahin sa kwarta kondili kabahin sa pagtuo.
Si Presidente Henry B. Eyring, Unang Magtatambag sa Unang Kapangulohan, nagtudlo kanato: “Pinaagi sa atong desisyon karon nga mahimong usa ka hingpit nga tigbayad sa ikapulo ug sa atong makanunayong mga paningkamot sa pagtuman, malig-on kita diha sa atong pagtuo ug, moabut ang panahon, ang atong mga kasingkasing malukmay. Mao kana ang kausaban sa atong mga kasingkasing pinaagi sa Pag-ula ni Jesukristo, sobra pa sa paghalad sa atong kwarta o mga butang, nga nahimong posible alang sa Ginoo nga mosaad sa panalipod alang sa mga hingpit nga tigbayad sa ikapulo sa ulahing mga adlaw [tan-awa sa D&P 64:23]. Makabaton kita og pagsalig nga mahimo kitang takus alang nianang panalangin sa panalipod kon mopasalig kita karon sa pagbayad og hingpit nga ikapulo ug makanunayon sa pagbuhat niini.”3
Panalipdan Kita Kon Mosunod Kita sa Pulong sa Kaalam
Nagpuyo kita sa panahon nga ang atong panglawas mahimong mahulga sa daghang makuyaw nga mga butang. Ang Ginoo, nakahibalo sa atong giatubang, mitudlo ni Propeta Joseph Smith niadtong 1833 nga “agi og sangputanan sa mga dautan ug sa mga laraw nga anaa ug motungha diha sa mga kasingkasing sa dautan nga mga tawo sa katapusan nga mga adlaw, Ako nagpasidaan kaninyo, ug magpasidaan kaninyo, pinaagi sa paghatag nganha kaninyo niini nga pulong sa kaalam pinaagi sa pagpadayag” (D&P 89:4).
Kadtong kinsa motuman sa balaod sa Ginoo kabahin sa panglawas “makadawat og maayo nga panglawas ug uyok sa ilang mga kabukogan [pisikal nga kahimsog]; ug makakita og kaalam ug dako nga mga bahandi sa kahibalo, gani ang mga tinago nga mga bahandi [mga panalangin sa kahibalo ug espirituhanon]; ug modagan ug dili maluya, og molakaw ug dili makuyapan [pisikal nga kahimsog].”
Ug ang Ginoo misaad sa kaluwasan niadtong kinsa mosunod niini nga balaod: “Ug Ako, ang Ginoo, mohatag ngadto kanila og usa ka saad, nga ang tiglaglag nga anghel mosaylo kanila, ingon sa mga anak sa Israel, ug dili mopatay kanila” (D&P 89:18–21).
Kini nga saad wala magpasabut nga dili kita mamatay, tungod kay ang kamatayon kabahin sa mahangturong plano. Apan “ang anghel nga tiglaglag, siya kinsa moabut sa pagsilot sa dili matarung tungod sa ilang mga sala, sama sa karaang panahon sa iyang pagsakit sa dautang mga Ehiptuhanon sa ilang pagkadautan [tan-awa sa Exodo 12:23, 29], moagi sa mga Santos.”4
Panalipdan Kita kon Mobarug Kita sa Balaan nga mga Dapit
Imahe sa Tore gikan sa Getty Images; Sacramento California Temple, ni Sandra Rast
Ang Ginoo misugo nato makadaghan sa “pagbarug sa balaan nga mga dapit” (tan-awa sa D&P 45:32; 87:8; 101:22). Sa pagkatinuod ang atong mga templo balaan nga mga dapit. Gitudlo ni Presidente Joseph Fielding Smith (1876–1972):
“Kon nakahibalo kita sa atong gibuhat nan ang endowment mahimo nga panalipod sa atong kinabuhi—usa ka panalipod nga wala sa tawo kinsa dili moadto og templo.
“Nakadungog ko sa akong amahan [Presidente Joseph F. Smith] miingon nga sa oras sa pagsulay, sa oras sa tintasyon, maghunahuna siya sa mga saad, sa mga pakigsaad nga iyang gihimo didto sa Balay sa Ginoo, ug kini nahimong panalipod ngadto kaniya.”5
Kauban sa mga templo, ang mga chapel ug mga classroom sa mga meetinghouse sa Simbahan ug ang atong mga panimalay gipahinungod, nga balaan nga mga dapit. Kini nga mga dapit balaan kon ang mga tawo nga mopuyo niini putli og kasingkasing ug magsunod sa mga sugo sa Dios. Kon motuman kita sa mga sugo, matagamtam nato ang pakig-uban, direksyon, ug paghupay sa Espiritu Santo. Kon Siya mahimo natong kanunay nga kauban, nan sa pagkatinuod magbarug kita sa balaan nga mga dapit.
Panapos
Nakita nato sa Doktrina ug mga Pakigsaad ang lain-laing mga matang sa panalipod nga gihatag sa ebanghelyo ni Jesukristo kon kita magtinguha sa pagkat-on ug pagsunod niini nga mga baruganan. Mahimo kitang mangutana asa makita kini nga panalipod.
Ang Ginoo, nagpakita sa gugma ug kalooy ngadto sa mga Santos, misaad nga Siya magauban kanato: “Pagmalipayon, mga bata; kay Ako anaa sa inyong taliwala, ug Ako wala mobiya kaninyo” (D&P 61:36). “Patalinghug, … miingon ang Ginoo nga inyong Dios, gani si Jesukristo, ang inyong manlalaban, kinsa nasayud sa kahuyang sa tawo ug unsaon sa pagtabang kanila kinsa natintal” (D&P 62:1).
Kon gamiton nato ang Pag-ula ug mga pagtulun-an sa atong Manluluwas nga si Jesukristo sa atong kinabuhi, makadawat kita sa panalipod ug dangpanan nga mohatag nato sa kalig-on sa paghupay sa atong mga salagubangon, sa pagbuntog sa atong mga sala ug mga kalisud, ug mohimo nato nga mga Santos.