Pagpangita ni Kristo Panahon sa Pasko

Ni Presidente Dieter F. Uchtdorf

Ikaduhang Magtatambag sa Unang Kapangulohan

Ngadto sa tanan nga gustong makasabut kinsa kami isip mga miyembro sa Ang Simbahan ni Jesukristo sa mga Santos sa Ulahing mga Adlaw, gusto kong motanyag og punto sa pagsugod nga gipasabut niining upat ka mga pulong: Kami nangita ni Kristo.

Kami nangita nga makat-on mahitungod Kaniya. Aron sa pagsunod Kaniya. Aron mahimong mahisama Kaniya.

Kada adlaw sa tibuok tuig, kami nangita Kaniya. Apan ilabi na niining panahuna sa tuig—Pasko, kon kami mosaulog sa pagkatawo sa atong hinigugma nga Manluluwas—ang among kasingkasing mas mohigugma ngadto Kaniya.

Isip kabahin sa atong mga pagpangandam sa pagsaulog sa Pasko, atong ikonsiderar kon sa unsa nga paagi nga kadtong nagpuyo og duha na ka libo ka tuig ang milabay nakaandam sa malipayong pagdawat sa pag-abut sa Manluluwas.

Mga Magbalantay sa Karnero

Wala kaayo kami makahibalo mahitungod sa mga magbalantay sa karnero, mao lang nga sila “didto sa sibsiban, nga nanagtukaw sa kagabhion sa pagbantay sa ilang mga hayop.”¹ Ang mga magbalantay sa karnero sama lang sa ordinaryong mga tawo, sama sa daghang buotan nga mga tawo kinsa motrabaho kada adlaw aron makakwarta.

Mahimong magrepresentar sila sa mga tawo kinsa, sa usa ka higayon, dili aktibong nangita ni Kristo, apan ang ilang mga kasingkasing nausab sa dihang ang kalangitan nabukas ug si Kristo mipahayag ngadto kanila.

Kini mao sila, human makadungog sa tingog sa langitnong mga mensahero, diha-diha miadto sa Betlehem sa kagustohan nga makakita.²

Ang mga Mago

Ang mga Mago mga eskolar kinsa nagtuon sa pag-abut sa Mesiyas, ang Anak sa Dios. Pinaagi sa ilang kahibalo, ilang nailhan ang mga timailhan nga nagtudlo sa Iyang pagkatawo. Sa dihang nahibaloan na nila kini, mibiya sila sa ilang mga panimalay ug mibiyahe paingon sa Jerusalem, nagpangutana, “hain ba ang gianak nga Hari sa mga Judio?”³

Ang ilang kahibalo ni Kristo dili pinaagi sa pagka-eskolar. Sa dihang nakita nila ang mga timailhan sa Iyang pagkatawo, milihok sila. Milakaw sila aron sa pagpangita ni Kristo.

Ang mga Mago mahimong magrepresentar niadtong kinsa nangita ni Kristo pinaagi sa pagkat-on ug pagtuon. Ang ilang debosyon sa kamatuoran sa katapusan migiya nila sa pagpangita ni Kristo ug pagsimba Kaniya isip Hari sa mga hari, ang Manluluwas sa katawhan.⁴

Simeon ug Ana

Sila si Simeon ug Ana mahimong magrepresentar niadtong kinsa nangita ni Kristo pinaagi sa Espiritu. Kining talagsaong mga tawo hilabihan ka relihiyoso ug, pinaagi sa pagpuasa ug pag-ampo ug pinaagi sa debosyon nga pagpakabuhi ug pagkamasulundon, naghulat nga madasigon nga makakita sa adlaw sa pag-anhi sa Anak sa Dios.

Pinaagi sa pagkamatinud-anon, pagpaubos, ug hugot nga pagtuo, mapailubon silang nagbantay sa pag-anhi sa Manluluwas.

Sa katapusan, ang ilang pagkamatinud-anon gigantihan sa dihang gipakita ni Maria ug Jose ang bata ngadto kanila kinsa sa umaabut mopas-an sa mga sala sa kalibutan diha sa Iyang Kaugalingon.⁵

Ang mga tumutuo diha sa mga Nephite ug mga Lamanite

Ang makapatandog nga istorya kon sa unsa nga paagi nga ang mga tumutuo sa Bag-ong Kalibutan nagbantay sa mga timailhan sa pagkatawo sa Manluluwas makita diha sa Basahon ni Mormon.

Nakahinumdom mo nga kadtong kinsa adunay hugot nga pagtuo ni Kristo gibiay-biay ug gigukod. Ang kahibalo sa kalibutan nianang panahuna miakusar sa mga tumutuo sa pagpadayon sa pagsuporta sa binuang nga mga pagtuo-tuo. Gani, ang dili mga tumutuo bokal kaayo sa ilang pagbiay-biay nga maoy nakaingon sa “dako nga kasamok” sa yuta (3 Nephi 1:7). Biay-biayon nila kadtong kinsa nagtuo nga ang Manluluwas matawo.

Ang ilang kasuko ug kapungot midako pag-ayo nga gusto na kaayo nila nga pamatyon kadtong nagtuo sa Manluluwas. Ang Basahon ni Mormon nagrekord sa makapaukyab nga kasulbaran.⁶

Ang mga tumutuo kinsa nagpuyo niining higayuna nagrepresentar niadtong kinsa nangita ni Kristo bisan kon ang uban mokatawa, mobiay-biay, ug manginsulto. Nangita sila ni Kristo bisan kon ang uban mosulay sa paghingalan kanila nga walay kabangkaagan, walay kahibalo, o ignorante.

Apan ang kasuko sa uban wala makapahigawad sa matinud-anong mga tumutuo sa pagtinguha ni Kristo.

Kami Nangita ni Kristo

Sa tibuok tuig, ug tingali ilabi na niining panahon sa Pasko, makahatag kanato kini og kaayohan sa makausa sa pagpangutana pag-usab sa pangutana “Sa unsa nga paagi nako gipangita si Kristo?”

Atol sa malisud nga panahon sa iyang kinabuhi, ang bantugan nga Haring David misulat, “O Dios, ikaw mao ang akong Dios, mangita ako kanimo sa dakong kakugi.”⁷

Tingali kini nga kinaiya sa pagpangita sa Dios mao ang usa sa mga rason nga si David gihulagway nga tawo nga tukma sa kasingkasing sa Dios.⁸

Atol niining panahon sa Pasko ug sa tibuok tuig, hinaut nga sa atong mga kasingkasing ug mga kalag pangitaon nato ang atong hinigugma nga Manluluwas, ang Prinsipe sa Kalinaw, ang Usa nga Balaan sa Israel. Tungod niini nga tinguha, sa dakong bahin, nagpasabut dili lamang kinsa kita isip mga miyembro sa Ang Simbahan ni Jesukristo sa mga Santos sa Ulahing mga Adlaw apan mas labaw pa kon kinsa kita isip mga disipulo ni Kristo.