Mga Hulagway sa Hugot nga Pagtuo

Josephine Scere

Pennsylvania, USA

Ang pagpahinungod sa Philadelphia Pennsylvania Temple niadtong 2016 nakahatag og oportunidad ni Josephine nga makasulod niini kada semana. Sa templo nakakaplag siya og kalig-on ug pagkaayo sa pag-atubang sa mga pagsulay sa kinabuhi.

Leslie Nilsson, litratista

Natawo ko sa kalisud. Ang akong mama milalin gikan sa Liberia, pobre kami, ug ako usa ka bata nga giabusohan samtang ako gipaatiman sa mga tawo nga sa iyang pagtuo iyang kasaligan. Kana nakahimo sa pipila ka butang nga lisud kaayo sa akong kinabuhi.

Kon ang imong mga kalisud magsugod sa wala pa ang edad nga may tulubagon, nagtuo ko nga adunay lawom nga relasyon nga moabut uban sa Manluluwas. Kana nga relasyon mao ang labing tam-is nga panalangin alang nako, ug dili gayud mahimo nga talikdan ko kini.

Unsay nakapadesidido nako nga mosunod sa ebanghelyo mao ang akong mga pagsulay.

Ang kultura sa Africa nagsilsil og gugma alang sa Ginoo diha nimo sa sayo nga panuigon. Nahinumdom ko sa akong lola nga nagtudlo nako sa Pag-ampo sa Ginoo sa dihang kwatro anyos pa ko. Iyang gitisok ngari nako kon unsa ka importante nga dunay personal nga relasyon sa Manluluwas. Usa kadto ka nindot nga kasinatian alang nako.

Ang ebanghelyo miabut sa akong kinabuhi sa saktong panahon. Sa dihang 14 anyos ko. Miabut kini gikan sa senior missionary couple, nga sila si Glenn ug JoAnne Haws, kinsa nagsunod sa matag pulong nga ilang gitudlo kanako. Ila akong gitudloan.

Ang akong inahan nahimong miyembro niadtong 1995. Atol kadto sa panahon sa gubat sibil sa Liberia. Namatyan siya og mga igsoon sa gubat. Dayon ang manghud sa akong papa, nga kuyog sa akong mama nianang higayuna, napatay dinhi sa America. Lisud kayo kadto alang kaniya, ug nahimo siyang dili na aktibo.

Wala mosulti si mama nga siya usa ka miyembro sa Simbahan. Nakahinumdom ra ko nga nakakita og mga kasulatan sa iyang lamesa. Sa dihang sila si Elder ug Sister Haws miabut aron sa pag-fellowship ug pagtudlo kaniya, miingon sila, “Dili ka ba gusto nga ang imong anak nga babaye makahibalo unsay imong nahibaloan?” Nabunyagan ko niadtong Mayo 21, 2000.

Lisud ang kinabuhi bisan og ikaw usa ka Santos sa Ulahing Adlaw o dili. Ang akong kalig-on nagagikan sa akong relasyon sa akong Manluluwas ug sa akong anak nga lalaki, nga si Enoch. Ang pagtuman sa mga pakigsaad nga akong gihimo sa templo nakahatag usab nako og kalig-on.

Ang templo dinhi sa Philadelphia nakapausab niini nga siyudad. Hapit kada adlaw ko miadto sa templo atol sa open house. Ang mga tawo mohunong ug motan-aw ug motamihid lang sa templo. Nagtrabaho ko nga usa ka security usa ka gabii, ug kini nga babaye mihunong ug nangutana nako, “Unsa kini nga building?”

Giingnan nako siya, “Mao kini ang building diin ang matinud-anong mga miyembro sa Simbahan sa mga Santos sa Ulahing mga Adlaw makasulod ug mohimo og mga pakigsaad uban sa Ginoo.”

Miduko siya ug miingon, “Nanglimbawot ang akong balhibo.”

Nianang higayuna nahibulong ko. Kining bayhana taga-Philadelphia gyud. Wala siyay ideya unsay nahitabo, apan nabati gyud niya ang Espiritu tungod kay ang ebanghelyo tinuod.

Ang kamatuoran mao ang kamatuoran! Dili na kinahanglan nga lalison pa. Dili na kinahanglan nga ipaprobar pa. Mao gyud kini. Tinuod kini, ug tinuod kini alang sa tanan. Tinuod kini alang sa mga tawo nga nagpuyo sa Salt Lake City, Utah, ug tinuod kini alang sa mga tawo nga nagpuyo sa iskwater sa Philadelphia. Sa akong hunahuna mao kana ang nakapadasig kanato.

Lisud ang kinabuhi bisan og ikaw usa ka Santos sa Ulahing Adlaw o dili” miingon si Josephine. Apan ang iyang mga pagsulay, miingon siya, maoy nakapadesidido niya sa pagsunod sa ebanghelyo.

Ang naandang buluhaton sa pamilyang Scere naglakip sa paghimo sa daghang homework.

Giuna ni Josephine sa iyang kinabuhi ang iyang relasyon uban sa iyang Manluluwas ug uban sa iyang anak nga lalaki nga si Enoch.

“Kita adunay katungdanan ug responsibilidad ngadto sa usag usa,” miingon si Josephine. “Ang paagi sa pagtan-aw sa Ginoo natong tanan kinahanglan mao usab ang paagi sa atong pagtan-aw sa usag usa.”

Si Enoch magpaabut sa iyang inadlaw nga one-on-one nga panahon uban sa iyang inahan.

Moundang si Enoch sa paghimo sa iyang homework aron magdula og basketball uban sa iyang inahan gawas sa ilang balay sa Philadelphia.