Mga Tingog sa mga Santos sa Ulahing mga Adlaw
Ang Pasko sumala sa Pagsabut sa Akong Anak nga Babaye
Paghulagway pinaagi ni Allen Garns
Ang kahilom mihakop sa akong pamilya ug kanako samtang naglakaw kami padulong sa kamalig aron pagtan-aw sa linawas nga pasundayag sa pagkatawo sa Ginoo. Ang mga hayop naglinya sa pasungan, ug usa ka lalaki ug babaye, nga nagsinina sama nila ni Jose ug Maria, nagbarug uban sa bata nga gikugos sa babaye. Hilom sila ug nakatutok sa gamay nga bata. Ang tibuok palibut malinawon kaayo.
Ang akong mas magulang nga mga anak, ang akong asawa, ug ako nagbarug samtang ang akong kinamanghuran nga anak nga babaye naglingkod sa uhot diha sa among atubangan. Hilom siya ug nagpuyo, ug ang iyang mga mata nakatutok sa bata. Sa dihang ang uban sa akong pamilya andam na nga molakaw, akong gihikap ang abaga sa akong anak nga babaye ug mihunghong nga oras na aron molakaw. Miingon siya nga gusto siya nga magpabilin uban sa batang Jesus. Ang iyang mga pulong mitandog sa akong kasingkasing, ug nakahukom ko nga magpabilin uban kaniya.
Paglabay sa pipila ka minuto, hinay nakong gigunitan ang kamot sa akong anak nga babaye ug misulti kaniya nga kinahanglan na kaming mobiya. Miingon siya nga gusto pa siyang magpabilin. Giagbayan nako siya ug miluhod tupad niya.
Wala madugay akong gibati nga ingon og ako mibalik sa karaang panahon ug uban nila ni Maria ug Jose. Nakasabut dayon ko nganong ang akong anak nga babaye gusto nga magpabilin pa. Gibati nako og kusog ang Espiritu. Niana nga dapit, gibati nako nga ako anaa sa presensya sa Manluluwas. Mga luha mianag sa akong mga mata samtang gibati nako ang Iyang gugma. Sa dihang oras na gayud nga mobiya, akong gialsa ang akong gamayng anak nga babaye. Samtang nagpaingon na ako sa exit, nakadungog ko niya nga misulti sa batang si Jesus og babay ug unsa niya ka mahal Siya.
Nianang gabhiona gipakigbahin nako ang kasinatian uban sa akong anak nga babaye nga akong ibahandi sa nahibilin sa akong kinabuhi, ug gani hapit nako kini nga wala masinati. Nianang gabhiona, nakadawat ko og gasa. Gibati nako nga mas nasuod sa Dios ug mibati sa Iyang gugma alang nako. Mapasalamaton ko sa Manluluwas ug sa oportunidad sa paghinumdom sa Iyang pagkatawo. Nasayud ko ang kinabuhi, ehemplo, ug Pag-ula sa Manluluwas naglangkob sa talagsaong gasa sa walay katapusan nga gugma gikan sa Dios ngadto sa Iyang tanang mga anak. Gihambin nako kanunay kini nga gasa sa kahiladman sa akong kasingkasing.