Mga Tingog sa mga Santos sa Ulahing mga Adlaw
Mga Package sa Pasko alang Kanako?
Paghulagway pinaagi ni Carolyn Vibbert
Nagserbisyo ko sa California Sacramento Mission atol sa Pasko niadtong 2003. Ang akong kompanyon ug ang duha ka laing sister missionaries nga kauban namo sa apartment nakadawat og mga regalo ug mga sulat gikan sa ilang mga paryente ug mga higala. Nasayud ko nga dili kana mahitabo kanako.
Ang akong pamilya sa Argentina wala kaayoy kapanguhaan ug ang ilang mga sulat sa kasagaran malangan og duha ngadto sa tulo ka bulan. Layo ko sa akong pamilya, apan malipayon ko nga mogahin sa Pasko nga nagserbisyo ni Jesukristo.
Niadtong Gabii sa Pasko, nangandam na mi nga mangatulog sa dihang usa sa mga sisters miingon nako nga dunay tawo nga mibilin og mga package sa may pultahan nga dunay ngalan nako.
“Alang nako? Dili kana mahitabo!” Miingon ko, nga natingala.
Duha ka dagko nga mga kahon nga dunay ngalan nako apan walay address kon diin gikan. Naghinam-hinam ko, ug ang ubang mga sisters naghinam-hinam usab. Giablihan nako ang mga package, nga puno sa mga regalo, mga kendi, mga drawing sa mga bata, ug ubang mga butang! Wala ko makapugong nga makahilak.
“Kinsa kaha ang nagpadala nako niini nga mga package?” Natingala ko. Walay usa namo ang nasayud, apan kaming tanan nalipay tungod sa pagkamanggihatagon.
Pipila ka adlaw human sa Pasko, wala gihapon ko makahibalo kinsa ang nagpadala sa mga package. Mao nga gitawgan nako ang mission office ug nangutana sa secretary kon makasulti ba siya nako sa pangalan sa misteryoso nga nagpadala. Miingon siya nako nga mga miyembro sa usa ka ward nga gustong dili magpaila nakahukom nga magpadala og mga package ngari nako nga dunay mga goodies sa Pasko. Mapasalamaton ako kanunay sa kamanggihatagon sa ward nga nakahatag og dakong gugma nianang Gabii sa Pasko ug sa suporta nga akong nadawat sa akong misyon.
Nakat-unan nako nga ang matag miyembro sa Simbahan makahimo sa mga misyonaryo—bisan og layo sa panimalay—nga mobati nga dili mingawon pinaagi sa ilang awhag ug serbisyo. Kadto mao ang usa sa labing nindot nga mga Pasko sa akong kinabuhi. Nagserbisyo ako sa Manluluwas ug mibati sa Iyang gugma pinaagi sa mga miyembro sa Iyang Simbahan.