Ang Pulang Tiket
Ang tagsulat nagpuyo sa Utah, USA.
Uh oh! Nakuhaan si Daniel og laing tiket.
“Kon ako magbinuotan ug mabination ug motabang og tawo nga akong makita, malipay kaayo ko” (Children’s Songbook, 197).
Gitan-aw ni Mateo ang math problem sa pisara ug daling misulat niini sa iyang notebook. Paborito niya ang math, mao nga gusto gyud siyang maminaw pag-ayo. Apan dili kaayo siya makadungog unsay gisulti ni Mrs. Santos tungod kay ang iyang higala nga si Daniel nag-istorya.
“Shh! Daniel, dili ko makadungog!” Mihunghong si Matthew. Apan nagpadayon sa pagsulti si Daniel. Sa katapusan si Mrs. Santos nakadungog niya.
“Daniel, nakabalda na sad ka,” miingon si Mrs. Santos. “Napasidan-an na ka. Karon kinahanglan kang mohatag nako og tiket.”
Hinay nga miadto si Daniel sa lingkuranan ug gitunol ang pula nga tiket. Naghuyhoy ang iyang abaga, ug nagduko. Si Mrs. Santos mihatag og mga tiket ngadto sa mga estudyante nga nagbinuotan ug misunod sa mga direksyon. Ang mga estudyante misulat sa ilang mga ngalan sa mga tiket ug ibutang kini sa usa ka banga kada adlaw. Apan kinahanglan nga imong ibalik paghatag ang tiket kon ikaw dili magbinuotan. Kada Biyernes, si Mrs. Santos mokuha og mga tiket sa banga, ug ang mananaog makapili og mga ganti gikan sa treasure chest sa klase! Si Daniel kinahanglang mohatag og balik sa daghang mga tiket tungod sa pagtabi, mao nga ang iyang ngalan wala kaayo mabunuti. Naguol si Mateo nga nakuhaan og laing tiket si Daniel.
Sa recess midagan si Mateo ngadto sa field aron magdula og football. Nakita niya si Daniel nga nagbarug nga nag-inusara sa may duyan. Makita niya nga naghilak si Daniel. Gusto si Mateo nga motabang niya nga mobati og nindot.
“Gusto ka ba nga magdula og football?” Nangutana si Mateo.
Wala motingog si Daniel. Misulay pa si Mateo sa pagpakigsulti kaniya, apan si Daniel mipalayo.
“Naa ra ko sa football field kon mausab ang imong hunahuna.”
Nakigdula si Mateo sa iyang laing mga higala, apan naghunahuna gihapon siya ni Daniel. Mag-otso anyos na si Matthew ug bunyagan na sa dili madugay. Gusto siya nga mahisama ni Jesus ug mahimong maayo nga higala. Aduna ba siyay mabuhat sa pagtabang ni Daniel nga dili mabutang sa kasamok?
Pagkasunod adlaw, ang klase nagbasa og istorya sa gagmay nga mga grupo. Imbis magbasa, giitsa-itsa ni Daniel ang iyang libro.
Gisulayan ni Mateo nga pahunungon siya. “Daniel, kinahanglan natong basahon ang libro, dili ang pagdula niini.”
Giitsa pag-usab ni Daniel ang libro. Nakita ni Mrs. Santos nga hapit kini miigo sa kisame. Giduol niya si Daniel ug nangayo og tiket. Miadto si Daniel sa iyang lingkuranan. Kahadlok ang nakita sa iyang nawong samtang siya nagpadayon sa pagpangita.
“Oh dili!” Nahutdan na siya og tiket!” Naghunahuna si Mateo. Kon wala nay mga tiket nagpasabut kini nga si Daniel kinahanglang magpabilin sa sulod inig ka recess. Ang hunahuna ni Mateo nagsugod sa paghunahuna og maayo. Unsay iyang mahimo? Dayon nakahunahuna siya.
“Daniel,” miingon si Mrs. Santos “kon wala kay tiket alang nako, nan—”
Miginhawa og lawom si Matthew. “Mahimo bang akoy mobayad alang niya, Mrs. Santos?” nangutana siya.
Ang klase nahilum. Walay usa nga nangutana kaniya niana kaniadto. Wala makasiguro si Mateo unsay isulti ni Mrs. Santos.
Nasurprisa si Mrs. Santos. Dayon siya mipahiyom. “Usa ka buotan kaayo nga higala. Oo, mahimo kang mobayad sa tiket ni Daniel alang kaniya.” Gitunol ni Mateo ngadto ni Mrs. Santos ang usa sa iyang mga tiket.
“Salamat, Mateo,” miingon si Daniel.
“Walay problema!” miingon si Mateo. “Gusto ka bang mobasa na ta karon?”
Miyango si Daniel ug mipunit sa iyang libro.
Samtang si Daniel nagsugod sa pagbasa, gibati ni Mateo ang kanindot ug kalipay. Kanang maayo nga ideya nagagikan sa Espiritu Santo! Nasayud si Mateo nga si Jesus gusto nga iyang tabangan si Daniel—tungod kay Iyang gihigugma si Daniel. Ug gibati usab ni Mateo ang gugma ni Jesus!