Ang Pabuto

Sa 12 anyos pa si Elder Dale G. Renlund, ang iyang pamilya nagpuyo sa Sweden. Usa niana ka Dominggo, ang higala ni Dale nga si Steffan nagdala og dako nga pabuto ug posporo didto sa building sa Simbahan. Naghinam-hinam si Dale. Gikuha ni Dale ang pabuto ug giduslitan ang pabilo. Iyang gikumot ang pabilo, apan napaso ang iyang mga tudlo ug nabuhian ang pabuto! Sila si Dale ug Steffan gikuyawan nga nagtan-aw sa pabilo nga nagpadayon sa pagsiga.

Ang pabuto mibuto! Nanimaho ang chapel. Sila si Dale ug Steffan daling namunit sa mga piraso sa pabuto ug miabli sa mga bintana aron mogawas ang kabaho. Naglaum sila nga walay makamatikod.

Sa pag-abut sa mga tawo sa miting sa sakrament, sila naka-matikod. Isug kaayo ang baho nga ang mga tawo wala mahimutang atol sa miting. Naulaw kaayo si Dale. Nasayud siya nga unsay iyang nabuhat nakapahigawad sa Langitnong Amahan.

Human sa pagsimba, si Presidente Lindberg, ang presidente sa branch, mihangyo ni Dale nga moadto sa iyang opisina tungod kay nakamatikod siya nga dunay dili maayo. Gisultihan ni Dale si Presidente Lindberg nga nagbasol kaayo siya bahin sa pabuto.

Buotan si Presidente Lindberg. Miabli si Presidente Lindberg sa mga kasulatan ug mihangyo ni Dale sa pagbasa sa pipila ka gilinyahan nga mga bersikulo. Nagbasa si Dale, “Tan-awa, siya kinsa naghinulsol sa iyang mga sala, ang mao gipasaylo, ug Ako, ang Ginoo, dili na mahinumdom kanila. Pinaagi niini kamo masayud kon ang usa ka tawo naghinulsol sa iyang mga sala—tan-awa, siya mokumpisal kanila ug mobiya kanila” (D&P 58:42–43).

Pagkahuman og basa ni Dale, nakita niya nga nagpahiyom si Presidente Lindberg. Gibati niya nga napasaylo. Sa pagbiya ni Dale sa opisina, gibati niya ang kalipay.

Nakat-unan ni Elder Renlund nga siya mapasaylo kon makabuhat siya og sayop. Mobati siya og kalipay kon maghinulsol siya ug motuman sa mga sugo sa Langitnong Amahan.