Mga Tubag gikan sa mga Lider sa Simbahan

Unsaon nga Mobati sa Tinuod nga Diwa sa Pasko

Ni Presidente Thomas S. Monson

Gikan sa 2013 nga Debosyonal sa Pasko sa Unang Kapangulohan.

Ang Pasko usa ka mahimayaong panahon sa tuig. Panahon usab kini nga nagkapuliki ang kadaghanan kanato. Akong panghinaut ug pag-ampo nga unta dili kita masubrahan sa pagpangandam niini nga kapaskohan nga mahatagan na hinoon nato og importansya ang sayop nga mga butang ug kalimtan ang yano nga mga kalipay sa pagsaulog sa pagkatawo sa Usa nga Balaan sa Betlehem.

Ang pagpangita sa tinuod nga kalipay sa Pasko dili moabut sa pagdali-dali aron mas daghan ang mahuman. Atong makaplagan ang tinuod nga kalipay kon kita mohimo sa Manluluwas nga sentro sa kapaskohan.

Sa atong pagsaulog sa Pasko kinahanglan nga kini usa ka pagpamalandong sa gugma ug walay paghinakog nga maoy gitudlo sa Manluluwas. Ang paghatag, dili ang pagdawat, ang magdala sa tibuok kahulugan sa diwa sa Pasko. Mas mabination kita sa usag usa. Uban sa gugma atong tabangan ang mga nagkalisud. Ang among mga kasingkasing mibati. Mga kaaway gipasaylo, mga higala gihinumduman, ug ang Dios gisunod. Ang diwa sa Pasko naglamdag sa bintana sa kalag, ug kita nagtan-aw sa nagkapuliki nga kinabuhi sa kalibutan ug nahimong mas interesado sa mga tawo kay sa mga butang. Sa pagsabut sa tinuod nga diwa sa Pasko, kinahanglan lang natong pangitaon ang Espiritu ni Kristo.

Hinaut nga mohatag kita sama sa gihatag sa Manluluwas. Ang paghatag sa kaugalingon usa ka balaan nga gasa. Mohatag kita isip paghinumdom sa tanang gihatag sa Manluluwas. Hinaut nga kita mohatag sab og mga gasa nga may mahangturong bili, kauban sa atong mga gasa nga mangabuak ra o makalimtan ra. Pagkadako kaha sa kaayohan niini sa kalibutan kon tanan kita mohatag og gasa sa panabut ug kalooy, sa pagserbisyo, ug pakighigala, sa kamabination ug kaaghop.

Samtang ang Kapaskohan moputos kanato sa tanan niining himaya, hinaut nga kita, sama sa mga Mago, mangita sa sanag, tinuorayng bitoon nga mogiya kanato sa atong pagsaulog sa pagkatawo sa Manluluwas. Hinaut nga kitang tanan mobiyahe ngadto sa Betlehem uban sa espiritu, nga magdala sa malumo, mabinationg kasingkasing isip atong gasa sa Manluluwas.