Atong Luna
Ang Pakig-amiga og Bag-ong mga Higala
Sa dihang ang akong mga ginikanan misulti nako nga ang akong pamilya mamalhin, ganahan kaayo ko nga makaamiga og bag-ong mga higala. Sa dihang miabut mi sa among bag-ong siyudad, miadto mi sa simbahan. Gibati nako ang kanindot sa Espiritu didto, ug nasayud ko nga maayo ra ang tanan.
Sa wala madugay, nagsugod na ko sa pag-eskwela sa akong bag-ong eskwelahan. Nag-inusara lang ko nga Mormon sa eskwelahan. Sa dihang misulod ko, gibati nako nga dili taga-didto. Makasulti ko nga ako lahi gikan sa ubang mga estudyante.
Sa unang semana ug sa misunod, naningkamot ko nga makaamiga. Apan gibati nako nga bakikaw! Gisulayan nako nga molingkod uban sa lain-laing mga tawo sa matag klase ug maniudto sa lain-laing mga lamesa kada adlaw. Ingon og wala man koy nahimo.
Nakahukom ko nga maningkamot nga mahimong mas maayo nga ehemplo ngadto sa akong mga ka-edad. Nag-focus ko sa Personal nga Kauswagan ug nagkugi sa pagtuon sa kasulatan. Samtang naningkamot ko pag-ayo, mas nakaamgo ko sa hingpit nga ako usa ka anak nga babaye sa Dios ug nga Siya nahigugma kanako.
Sa paglabay sa panahon ug nagpadayon ko sa pagbuhat niining mga butanga, namatikdan nako: nga nakaamiga nako didto sa eskwelahan. Ingon og ang mga tawo ganahan moduol ngari nako. Mikomentaryo sila bahin sa akong pagkalahi. Akong naamgohan nga tungod kini kay akong gipasanag ang akong kahayag. Duna koy lahi nga mga kinaiya kay sa akong mga kauban, tarung kong magsinina, mogamit ko og tarung nga pinulongan, ug buotan ko ngadto sa uban.
Kitang tanan mga anak sa Dios. Mapasalamaton kaayo ko nga akong gipasanag ang akong kahayag, bisan og gibati nako nga nalahi. Nasayud ko nga kita wala mag-inusara kon kita anaa sa habig sa Ginoo!
Rebekah C., Prince Edward Island, Canada
Mahimo Bang Mopakigbahin ko sa Basahon ni Mormon?
Atol sa Mutual, gihatagan mi og assignment nga mahimong mga misyonaryo pinaagi sa pagpangita og kompanyon, pagpakigbahin sa among mga pagpamatuod ngadto sa dili miyembro, ug paghatag sa among dili miyembro nga higala og kopya sa Basahon ni Mormon.
Human sa Mutual, nangayo ko og tambag sa akong mama. Misaad siya nako nga kon ako mag-ampo pinaagi sa hugot nga pagtuo ug mohangyo sa Langitnong Amahan, motubag gayud Siya kanako.
Milungtad og duha ka semana nga nangita ko og tawo nga modawat sa Basahon ni Mormon. Sa sinugdanan, pirme lang kong gisalikway. Gikapoy nako nga masakitan nga hapit na ko moundang.
Usa ka gabii nagdamgo ko mahitungod sa usa ka babaye kinsa suod sa among pamilya. Samtang nagdamgo ko, nakaamgo ko nga siya mao ang bisitahon nako ug sa akong kompanyon. Sa dihang nakamata ko, nagpasalamat ko sa Ginoo sa pagtabang nako.
Pagkasunod Mutual, ang akong kompanyon ug ako misulat sa among mga pagpamatuod sa atubangan sa libro ug nagahimo og basket sa prutas alang sa babaye. Miadto mi sa ilang balay, nanuktok, ug naghulat. Bisan tuod nahadlok ko nga basin dili siya modawat niini, giingnan nako ang akong kaugalingon nga magbaton og gamay nga pagtuo. Sa katapusan migawas siya nga malipayon ug midawat sa Basahon ni Mormon.
Pinaagi niini nga kasinatian, nakat-unan nako nga kon ikaw adunay gamay nga pagtuo ug nasayud ka nga ang Langitnong Amahan anaa, sayon nimong mabati nga ang imposible mahimong posible.
Rapunzel L., American Samoa
Ang Akong Pagbakasyon gikan sa mga Leksyon sa Piano
Usa ka semana, nakahukom ko nga mopahuway gikan sa pagpraktis og piano. Ang akong magtutudlo sa piano wala motugot nga mopahuway ug mao usab ang akong mama. Sulod sa usa ka semana wala ko magpraktis. Naghunahuna ko nga nindot kadto tungod kay duna koy nindot nga panahon sa pag-relax ug paghimo og laing mga butang.
Ang kalingawan nahunong pagka-Huwebes sa gabii, sa dihang ang akong mama mipahinumdom nako nga sunod buntag mao na ang akong leksyon sa piano. Nagtuo ko nga naa koy usa ka solusyon: Mimata ko og sayo mga usa ka oras ug nagsugod sa pagpraktis. Apan nakaamgo ko nga ang akong mga paningkamot dili paigo, ulahi na kaayo. Nakabaton ko og kagawasan sa pagpili, apan wala nako ikonsiderar ang mga sangputanan.
Pagkasunod buntag gikahimamat nako ang akong magtutudlo, ang mga sangputanan nagsugod sa pagpanggawas. Kinahanglan nga akong dawaton nga ako wala makapraktis, ug ang akong magtutudlo misulti nako nga kinahanglang ko nga mohulip sa tanang panahon nga wala ko makapraktis, dugang sa akong regular nga panahon sa pagpraktis.
Mapasalamaton ko sa mga leksyon nga akong nakat-unan mahitungod sa kabubut-on, responsibilidad, ug pagkamaytulubagon. Ang matag pagpili adunay sangputanan, ug akong nakat-unan nga makahimo ko og mas maayo nga mga desisyon kon ako mogahin og panahon sa pagkonsiderar pag-una sa mga sangputanan.
Blake H., Utah, USA