Rurura’a ’āpo’ora’a nō te sābati mātāmua

I te sābati mātāmua ato’a o te ’āva’e, i roto i te mau rurura’a a te pupu peresibutero ’e te Sōtaiete Tauturu ’aita te hō’ē ha’api’ira’a e ha’api’ihia ’e te hō’ē ’orometua. E fa’atere rā te peresidenira’a o te pupu peresibutero ’e te Sōtaiete Tauturu i te rurura’a ’āpo’ora’a. I roto i teie rurura’a ’āpo’ora’a nō te sābati mātāmua, e a’o ’āmui te pupu peresibutero tāta’itahi ’e te Sōtaiete Tauturu nō ni’a i te mau hōpoi’a, te mau rāve’a au ’e te mau tītaura’a o te fenua iho, te ’apora’a mai nā roto mai i te hi’ora’a ’e te mau ’ohipa i tupu nō terā ’e terā ta’ata ; ’e te fa’anahora’a i te mau rāve’a nō te ’ohipa e rave mai te au i te mau mana’o i fāri’ihia mai nō ’ō mai i te Vārua ra. E ti’a i teie mau tāu’ara’a parau ’ia fa’auruhia nā roto mai i te mau pāpa’ira’a mo’a ’e te mau ha’api’ira’a a te mau peropheta ora.

E ’ere te mau rurura’a ’āpo’ora’a ato’a i te hō’ē ā huru. Teie te tahi mau rēni arata’ira’a nō te tauturu i te peresidenira’a ’ia arata’i i te hō’ē ’āpo’ora’a manuia.

Hou te rurura’a ’āpo’ora’a

E rave :

’Ite i te mau hina’aro o te fenua, te mau rāve’a au ’e te mau tītaura’a.
Pure nō te mā’iti i te hō’ē tumu parau nō te tāu’ara’a parau.
Ani i te mau melo o te pupu ’aore rā te mau tuahine o te Sōtaiete Tauturu ’ia haere ineine mai nō te fa’a’ite i tō rātou mau mana’o ’e te mau ’ohipa i tupu.

’Eiaha e :

Fa’aineine i te hō’ē ha’api’ira’a.
Haere mai mā te hō’ē rāve’a pāpū ’aore rā te hō’ē fa’anahora’a e rave i roto i te ferurira’a.

I roto i te rurura’a ’āpo’ora’a

E rave :

Ani i te mau melo ’ia fa’a’ite mai i te mau ’ohipa i tupu tā rātou i rave nō ni’a i te ferurira’a ’e te fa’anahora’a nā roto mai i te mau ’āpo’ora’a i ma’iri.
Vauvau atu i te tumu parau o te rurura’a ’e ’a fa’aitoito i te mau melo ’ia hi’o ’āmui nō ni’a i te reira, ma te ’imi i te mau rāve’a ’e ma te arata’ihia e te mau pāpa’ira’a mo’a, te mau parau a te mau peropheta ’e te Vārua Maita’i.
Fa’anaho i te ’ohipa e rave nō ni’a i te mea i tāu’aparauhia. Mai te mau fanahora’a fa’aotihia ’ei pupu ’aore rā te fa’anahora’a o tā vetahi e rave ’ōtahi noa.

’Eiaha e :

Rave nā ’outou noa te tāu’ara’a parau.
Tāmata ’ia fa’ahepo ia vetahi i tō ’outou mau mana’o.
Tāu’aparau i te mau fifi hiā’oto ’e te ’ōmo’e.
Ha’api’i i te hō’ē ha’api’ira’a.
Ha’avī i te tahi ’ia ’āmui mai.

I muri iho i te rurura’a ’āpo’ora’a

E rave :

Hi’o i te terera’a o te mau fa’anahora’a ’e te mau tītaura’a i ravehia i roto i te rurura’a ’āpo’ora’a
’Imi i te mau rāve’a nō te fa’a’ō mai ia vetahi tei ’ore i ’āmui mai i roto i te rurura’a nō te mau pi’ira’a ’aore rā nō te tahi atu mau tumu. Fa’a’ite atu ia rātou nō ni’a i te fa’anahora’a tei ravehia.
Hōro’a i te mau melo te mau rāve’a nō te fa’a’ite mai i te ’ohipa tei tupu i roto i te mau rurura’a i muri nei.

Mau tumu parau nō te rurura’a ’āpo’ora’a nō te sābati mātāmua

Te mau mana’o nō te mau tumu parau e tāu’aparau i roto i te mau rurura’a ’āpo’ora’a, e nehenehe e tae mai nā roto mai i te ’āpo’ora’a a te peresidenira’a, te ’āpo’ora’a pāroita, te fa’anahora’a a te ārea, te mau ferurira’a tā te feiā fa’atere i fāri’i ’a aupuru ai rātou i te mau melo ’e te mau fa’aurura’a o te Vārua Maita’i. Te mau tumu parau i raro nei ’o te tahi noa ïa mau mana’o tauturu. ’Ua ’ite paha te feiā fa’atere i te tahi atu mau hina’aro tei fa’auruhia ia rātou e paraparau.

E aha tā tātou e nehenehe e rave nō te aupuru i te feiā nā pīha’i iho ia tātou ? (hi’o Mosia 23:18).
Nāhea tātou ’ia fa’ata’a i te mau ’ohipa e rave mātāmua i roto i tā tātou mau hōpoi’a rau ?
Nāhea tātou i te fa’a’ite atu i te ’evanelia i tō tātou mau hoa ’e tō tātou ta’ata tupu ? (hi’o Alama 17).
Nāhea tātou ’ia pāruru ia tātou iho ’e tō tātou ’utuāfare i te mau rāve’a ha’apararera’a au ’ore ’e te hōho’a faufau ?
E aha tā tātou e rave nō te arata’i ’e nō te ha’apūai i tā tātou mau tamari’i ’e te feiā ’āpī i roto i tā tātou pāroita ?
Nāhea tātou i te tu’u rahi atu ia tātou i roto i te ’ohipa ’ā’amu ’utuāfare ’e te ha’amorira’a i roto i te hiero ?
Nāhea tātou i te ani i te tauturu a te Fatu ’a ’imi ai tātou i te mau pāhonora’a nō tā tātou mau uira’a nō te ’evanelia ’e ’ia tītau i te hō’ē māramarama hōhonu atu ā o te ’evanelia ?
Nāhea e ti’a ai ia tātou ’ia ha’apūai i tō tātou ’itera’a pāpū nō te Fatu ’e nō tāna ’evanelia ’e ’ia tauturu i tō tātou ’utuāfare ’ia fa’arava’i iāna iho i te pae vārua ?