’Ia hitu ’ahuru i te hitura’a

Nā Elder Lynn G. Robbins

Nō te peresidenira’a nō te Hitu ’Ahuru

Nō reira, i roto i te hō’ē orara’a tei ’ī i te ’ōfa’i turorira’a ’e te hapehape, tē māuruuru pā’āto’a nei tātou ē, ’ua nehenehe ia tātou e tāmata fa’ahou ā.

E tupu iho ā te hape i roto i te orara’a. E’ita roa atu e nehenehe ’ia ’aravihi maita’i i te piana ma te ’ore e hapehape e te tahi tauasinira’a taime—penei a’e e miriōni roa. Nō te ha’api’i i te mau reo ’e’ē, e mea ti’a i te hō’ē ta’ata ’ia fa’aruru i te ha’amā e te hape i te parau tauasini-rahi-ra’a taime—penei a’e e miriōni roa. E’ita ato’a te ma’ona ’aravihi roa a’e o te ao e fa’aea i te hapehape noa.

’Ua parauhia ē, « E ’ere te manuiara’a ē e ’aita roa e manuia-’ore-ra’a, ’o te haerera’a rā mai terā manuia-’ore-ra’a i terā manuia-’ore-ra’a ma te tāpe’a noa i te ’ana’anatae ».¹

Nō ni’a i te ’ōpūpū mōrī tāna i hāmani, e au ē ’ua parau Thomas Edison ē : « ’Ua manuia ’ore iho ā vau e 1 000 taime. ’Ua riro te ’ōpūpū mōrī ’ei hō’ē tao’a hāmani nā roto e 1 000 ta’ahira’a ».² ’Ua pi’i ’o Charles F. Kettering i te mau manuia-’ore-ra’a ’ei « fa’a’ite ’avei’a i ni’a i te purōmu nō te manuiara’a ».³ Maita’i ē, e riro mai te hape tāta’itahi ’ei ha’api’ira’a pa’ari, e tauira’a i te ’ōfa’i turorira’a ’ei ’ōfa’i ta’ahira’a.

’Ua tauturu te fa’aro’o ’āueue ’ore o Nephi iāna iho ’ia haere mai terā manuia-’ore-ra’a i terā manuia-’ore-ra’a ē tae roa ’ua noa’a mai iāna te mau ’api veo. ’Ua ’ahuru taime tō Mose tāmatara’a ē manuia mai nei i te horo ’ē ia ’Aiphiti ’e te mau tamari’i ’Īsera’ēla.

E uiui paha tātou ē—mai te peu pa’i tei ni’a Nephi ’e ’o Mose i te tonora’a a te Fatu, nō te aha ïa ’aita te Fatu i haere mai nō te tauturu ia rāua ’ia manuia i te tāmatara’a mātāmua ? Nō te aha pa’i ’oia i vaiiho ia rāua—’e nō te aha ’oia i vaiiho ai ia tātou—’ia tāfifi ’e ’ia ’ore e manuia i roto i tā tātou mau tāmatara’a ’ia manuia ? I roto i te mau pāhonora’a e rave rahi i teie uira’a, teie te tahi :

• ’A tahi, ’ua ’ite te Fatu ē, « e noa’a ia [tātou] te ’ite rau i te ’ohipa nā roto i teie mau mea ato’a nei, ’e e riro ho’i ’ei maita’i nō [tātou] ».⁴

• Te piti, ’ia nehenehe ia « [tātou] e tāota i te maramara, ’ia ti’a ia [tātou] ’ia ’ite i te faufa’a rahi o te maita’i ».⁵

• Te toru, ’ia fa’a’ite ē, « nā Iehova ho’i teie nei tama’i »,⁶ ’e e mea nā roto ana’e i tōna maita’i e nehenehe ai tātou e fa’aoti i tāna ’ohipa ’e ’ia riro mai iāna te huru.⁷

• Te maha, nō te tauturu ia tātou ’ia fa’ananea ’e ’ia ha’amaita’i ā e rave rahi huru Mesia, o te ’ore roa ho’i e nehenehe e « ha’amaita’i » maori rā ’e « nā pae e piti »⁸ ’e tae noa atu i « te umu o te ma’i ra ».⁹

Nō reira, i roto i te hō’ē orara’a tei ’ī i te ’ōfa’i turorira’a ’e te hapehape, tē māuruuru pā’āto’a nei tātou ē, ’ua nehenehe ia tātou e tāmata fa’ahou ā.

I te matahiti 1970 ra, e pīahi matahiti mātāmua vau i BYU, ’ua tāpa’o vau iā’u i roto i te hō’ē piha a te ’orometua rahi ra ’o Jae Ballif, nō ni’a i te ihitumu (Physique). I te hope’a o te hō’ē tuha’a ha’api’ira’a, e hōro’a mai ’oia i te hi’opo’ara’a. Mai te peu e C te nota o te hō’ē pīahi ’e ’ua hina’aro ’oia i te hō’ē nota maita’i a’e, e fa’ati’a te ’orometua Ballif ’ia rave i te tahi atu ā hi’opo’ara’a nō ni’a i terā ha’api’ira’a. Mai te peu e B tā te pīahi i te piti o te hi’opo’ara’a ’e ’aita ’oia i māuruuru, e nehenehe tāna e rave i te toru o te hi’opo’ara’a, ’e te maha e fa’ahou ā. Nō te mea ’ua fa’ati’a noa mai ’oia iā’u ’ia rave fa’ahou ā i te hi’opo’ara’a, ’ua tauturu mai ’oia iā’u ’ia ’aravihi roa ’e ’ia noa’a iā’u te nota A.

E ’orometua pa’ari ta’a ’ē ’oia tei fa’auru i tāna mau pīahi ’ia tāmau noa i te tāmata—’ia fa’ariro i te manuia-’ore-ra’a ’ei ha’api’ira’a, ’eiaha rā ’ei ’ati, ’e ’eiaha e mata’u i te manuia-’ore-ra’a, ’ia ha’api’i rā nā roto mai i te reira.

’Aita i maoro a’enei ’ua tāniuniu vau i teie ’aito, 47 matahiti i muri mai tō’u haerera’a i tāna mau ha’api’ira’a ihitumu. ’Ua ani au iāna, nō te aha ’oia i fa’ati’a ai i te mau pīahi ’ia tāmata e hea rahira’a taime nō te ha’amaita’i i tā rātou nota. ’Ua nā ’ō mai ’oia : « ’Ua hina’aro vau e ti’a i te pae o te mau pīahi ».

Tē māuruuru nei tātou nō te mau tāmata-fa’ahou-ra’a, ’ia hape ’e ’ia manuia ’ore tātou, tē māere roa nei rā tātou i te maita’i o te Fa’aora i te hōro’ara’a mai i nau tāmata-fa’ahou-ra’a nō te upo’oti’a i ni’a i te hara ’e i ni’a i te mau manuia-’ore-ra’a o tō tātou nei ’ā’au.

’Aita e ta’ata pa’epa’e a’e ia tātou maori rā te Fa’aora. Tē fa’ati’a nei ’oia ia tātou ’ia rave ’e ’ia rave fa’ahou ā i tāna mau hi’opo’ara’a. Nō te riro mai iāna ra te huru, tītauhia tau rahira’a tāmata-fa’ahou-ra’a i roto i tō tātou mau tāfifira’a tāmahana ’e te ta’ata tino nei, ma te ha’avīra’a i tō tātou mau hia’ai, te ha’api’ira’a i te fa’a’oroma’i ’e te fa’aorera’a hapa, te upo’oti’ara’a i ni’a i te fa’ataura’a, te ’apera’a i te mau hara aramoinara’a, te tahi ma’a hi’ora’a noa ïa teie. Mai te mea e nātura ta’ata te hape, e hia ïa manuia-’ore-ra’a e tītauhia ’eiaha fa’ahou ā tō tātou nātura i tō te tino, tō te Atua rā ? Tauasini rahira’a ? Hau atu paha i te hō’ē miriōni.

Nō tōna ’ite ē e ’āpapa haere te fifi i ni’a i te ’ē’a piriha’o ’e te oaoa, ’e e riro te manuia-’ore-ra’a i te tupu pauroa te mahana nō tātou, ’ua ’aufau te Fa’aora i te hō’ē ho’o fāito ’ore nō te hōro’a ia tātou i te rahira’a tāmata-fa’ahou-ra’a e tītauhia nō te manuia maita’i i tā tātou hi’opo’ara’a tāhuti nei. Pinepine paha te pāto’ira’a tāna e fa’ati’a ’ia riro mai te tahi ’ohipa huru teimaha roa ’e fātata roa e’ita e mara’a, ’aita rā ’oia e vaiiho ia tātou ma te tīa’ira’a ’ore.

Nō te ’ōteo-fa’ahou-ra’a tō tātou tīa’ira’a i mua i te mau fifi o te orara’a, ’ua ineine roa te maita’i rahi o te Fa’aora ’e tē vai noa mai. Tōna maita’i rahi, « e rāve’a hanahana ïa nō te tauturu ’aore rā nō te ha’apūa’i… e mana ha’amana e fa’ati’a i te mau tāne ’e te mau vahine ’ia noa’a te ora mure ’ore ’e te fa’ateiteira’a i muri mai i tā rātou mau tauto’ora’a rahi roa a’e ».¹⁰ Tei ni’a tōna maita’i rahi ’e tōna mata here ia tātou i te roara’a o tō tātou tere, i te fa’aurura’a, i te ha’amāmāra’a i te hōpoi’a, i te ha’apūaira’a, i te fa’aorara’a i te ha’avīra’a, i te pārurura’a, i te rāpa’aura’a ’e i te « fa’aorara’a i tōna mau ta’ata », noa atu ā e tūrorirori rātou i ni’a i te ’ē’a piriha’o ’e te oaoa.¹¹

’O te tātarahapara’a te hōro’a a te Atua e noa’a tāmau ia tātou, e fa’ati’a ’e e ha’amana ia tātou nō te haere mai terā manuia-’ore-ra’a i terā manuia-’ore-ra’a ma te ’ore roa e ’ere i te ’ana’anatae. E ’ere te tātarahapara’a i te fa’anahora’a piti mai te peu e manuia ’ore tātou. Te tātarahapara’a, ’o tāna ïa fa’anahora’a, te ’itera’a e nā reira tātou. ’O teie te ’evanelia tātarahapara’a, mai tā te peresideni Russell M. Nelson i parau : « E fa’anahora’a ha’api’ira’a nō te orara’a tā’āto’a ».¹²

I roto i teie fa’anahora’a ha’api’ira’a nō te orara’a tā’āto’a, ’o te ’ōro’a te rāve’a tā te Fatu i fa’ata’a nō te noa’a-tāmau-ra’a tāna fa’aorera’a hara. Mai te mea e rave tātou ma te ’ā’au tātarahapa ’e te vārua marū, e pūpū mai ’oia i te fa’a’orera’a hapa tāhepetoma ’a haere ai tātou mai terā manuia-’ore-ra’a i terā manuia-’ore-ra’a i ni’a i te ’ē’a o te fafaura’a. Inaha « noa atu tā rātou mau hara, ’ua ’ī roa tō’u ’ā’au i te aroha ia rātou ».¹³

I teienei, e hia taime ’oia e fa’a’ore mai i tā tātou hara ? Mai te aha tōna fa’a’oroma’i-noa-ra’a ? I te hō’ē taime ’ua ui Petero i te Fa’aora : « E te Fatu, ’ia tuatāpapa ta’u taea’e i te hāmani ’ino mai iā’u, ’ia hia ā’u fa’a’orera’a atu i tāna hara ? ’Ia hitu ānei ? »¹⁴

’Ua mana’o paha ’o Petero ē, e hitu ra, e nūmera teitei ïa nō te fa’a’itera’a i te ma’ama’a e fa’aore i te hapa e rave rahi roa taime, ’eiaha ato’a paha ’ia pinepine roa. Te pāhonora’a a te Fa’aora ia Petero, ’oia ho’i ’eiaha roa atu e tai’o—’eiaha e tā’ōti’a i te fa’aorera’a hapa.

« ’Ua parau atu rā Iesu iāna, ’aore au i parau atu ia ’oe ē, ’ia hitu ; ’ia hitu rā ’ahuru i te hitura’a ».¹⁵

E mea pāpū ē ’aita te Fa’aora e ha’amau ra i te hō’ē ’ōti’a ē ’ia 490. Hō’ē ïa huru i te paraura’a ē, e ’ōti’a te vai ra nō te ravera’a i te ’ōro’a, ’oia ho’i e 490, ’e i te 491ra’a, e haere mai te tahi ti’a hi’opo’a a te ra’i nō te parau ē : « ’Ua hope tā ’oe tāreta tātarahapara’a—mai teie taime atu nā ’oe iho e fa’aitoito ia ’oe. »

’Ua fa’a’ohipa te Fatu i te nūmerara’a hitu ’ahuru i te hitura’a ’ei fa’ahōho’ara’a nō tāna tāra’ehara fāito ’ore, tōna here ’ōti’a ’ore ’e tōna maita’i rahi tā’ōti’a ’ore. « ’Ē, ’ua tātarahapa ana’e tō’u mau ta’ata, e fa’a’ore au i tā rātou mau hara iā’u ».¹⁶

’Eiaha rā e mana’o ē, ’ua riro atura te ’ōro’a ’ei parau fa’ati’a nō te hara. Teie hō’ē tumu te Fatu i parau ato’a ai i roto i te buka a Moroni ē : « ’Ia tātarahapa rā rātou ’a tītau ai ’ia fa’a’orehia te hara ma te mana’o pāpū, ’ua fa’a’orehia ïa te hara ».¹⁷

Te mana’o pāpū, ’o te tauto’ora’a pāpū ato’a ïa ’e te tauira’a pāpū. Te ta’o « taui » ’o te ta’o rahi e fa’a’ohipahia e te Arata’i nō te mau Pāpa’ira’a Mo’a nō te tātara i te parau tātarahapara’a : « E tauira’a o te ferurira’a ’e te ’ā’au ’ei mea ’āpī i mua i te Atua, i mua iāna iho ’e i roto i te orara’a ».¹⁸ E fa’ahope’ara’a te reira tauira’a nō te tupura’a pae vārua. Tō tātou manuirara’a, e ’ere te haerera’a mai terā manuia-’ore-ra’a i terā manuia-’ore-ra’a, ’o te tupura’a rā mai terā manuia-’ore-ra’a i terā manuia-’ore-ra’a ma te pohe ’ore te ’ana’anatae

Nō ni’a i te tauira’a, ’a feruri i teie fa’ahitira’a ’ōhie : « Te ’ohipa ’aita e taui e vai noa ïa mai te reira. » E ’ere teie parau mau ’ōhie i te fa’ao’ō’ora’a i tō ’outou māramarama, e parau pa’ari ’e te hōhonu rā mai roto mai i te peresideni Boyd K. Packer, tei nā ’ō fa’ahou ē : « ’E ’ia fa’aea tātou i te taui—’ua fa’aea tātou ».¹⁹

Nō te mea ’aita tātou e hinaaro e fa’aea ē tae roa ’ua riro tātou mai tō tātou Fa’aora te huru,²⁰ tītauhia ’ia tāmau noa tātou i te ti’a mai i te mau taime ato’a e topa tātou, ma te hia’ai e tāmau noa i te tupu rahi mai ’e ’ia haere i mua noa atu tō tātou mau paruparu. I roto i tō tātou paruparu, tē fa’aitoito nei ’oia ia tātou, « tō’u nei maita’i ’ātīrē ïa tā ’oe : ’ei te paruparu e ta’a maita’i roa ai tō’u pūai ».²¹

Nā roto ana’e i te patara’a vitiviti o te mau hōho’a ’aore rā te mau hōho’a tupura’a, tātou e ’ite ai i te tupura’a tō tātou tino. Nā reira ato’a, e mea huru ’ite ’ore tō tātou tupura’a pae vārua maori rā nā roto i te hi’o tau mua ra. E mana’o pa’ari te hi’o-pinepine-ra’a ’o roto ia tātou nā roto i terā hi’o nō te ’ite mai i tō tātou haerera’a i mua ’e nō te fa’auru ia tātou « ’ia haere ti’a atu… i mua i te ti’a-māite-ra’a i te Mesia, ma te tīa’i pāpū roa ».²²

E māuruuru mure ’ore tō’u i te here, te marū, te fa’a’oroma’i ’e te fa’a’oroma’ira’a roa o nā Metua i te ra’i ’e o te Fa’aora, ’o tē fa’ati’a noa nei ia tātou ’ia tāmata fa’ahou ā ma te tai’o ’ore, i ni’a i tō tātou tere ho’ira’a i mua i tō rāua aro. I te i’oa o Iesu Mesia, ’āmene.

Fa’ata’ara’a

1. Nā e rave rahi ta’ata pāpa’i i parau i teie fa’ahitira’a, ’oia ato’a ’o Abraham Lincoln ’e Winston Churchill.

2. Thomas Edison, i roto Zorian Rotenberg, « To Succeed, You Must Fail, and Fail More », 13 nō Novema 2013, insightsquared.com.

3. Charles F. Kettering, i roto Thomas Alvin Boyd, Charles F. Kettering: A Biography (1957), 40. ’Ua parau pinepine-noa-hia teie fa’ahitira’a e C. S. Lewis.

4. Te Parau Ha’api’ira’a ’e te mau Parau Fafau 122:7. Nō te Fa’aora ato’a, « ’ua ha’api’i… i te auraro i tōna ra mau pohe » (Hebera 5:8). Noa atu ē tē fa’aau nei teie mau ’īrava i te mau ’ati ’e te mau māuiui ’ati a’e ia tātou ’aore rā tō tātou vaira’a fifi, ’ua riro ato’a tō tātou mau hape ’ei maita’i mai te peu e ’apo mai tātou i te ha’api’ira’a nā roto mai i te reira.

5. Mose 6:55.

6. 1 Samuela 17:47; hi’o ato’a 1 Nephi 3:29.

7. Hi’o Iakoba 4:7.

8. Hi’o 2 Nephi 2:11.

9. Isaia 48:10; 1 Nephi 20:10.

10. Bible Dictionary, « Grace »; reta tei fa’ahuru-’ē-hia.

11. Alama 7:12.

12. Russell M. Nelson, i roto Dallin H. Oaks and Neil L. Andersen, « Repentance » (a’ora’a tei hōro’ahia i te ha’api’ira’a a te mau peresideni misiōni, 26 nō Tiunu 2015), 11.

13. Te Parau Ha’api’ira’a ’e te Mau Parau Fafau 101:9.

14. Mataio 18:21.

15. Mataio 18:22.

16. Mosia 26:30; reta tei fa’ahuru-’ē-hia.

17. Moroni 6:8; reta tei fa’ahuru-’ē-hia.

18. Guide to the Scriptures, « Repent, Repentance », scriptures.lds.org.

19. Boyd K. Packer (Kingsland Georgia Stake conference, ’Ātete 1997).

20. Hi’o 3 Nephi 27:27.

21. 2 Korinetia 12:9; hi’o ato’a Etera 12:27.

22. 2 Nephi 31:20.