Elder Takashi Wada

Hitu ’Ahuru Hui mana fa’atere rahi

I te hō’ē mahana to’eto’e nō Novema, ’ua hitimahuta Takashi Wada i te uira’a a te hō’ē misiōnare marite tei ani mai iāna i te purūmu nō te haere i te fare rata.

’Ua parauhia teie taure’are’a 15 matahiti e ’ape i te mau momoni, rātou ho’i tei paraparau haere i te mau ta’ata i roto i te mau aroā nō Nagano (Tāpōnē), e toru noa minuti te ātea i tō rātou fare. ’Ua māere rā ’o Takashi i te paraura’a mai teie misiōnare marite nā roto i te reo tāpōnē.

Ma’a mahana i muri mai, ’ua tāpe’a fa’ahou te tahi misiōnare iāna. ’Aita ’oia i maoro roa i te fenua Tāpōnē. Mea ’ū’ū noa ’oia i te fa’ati’ara’a i te ’ā’amu o Iosepha Semita nā roto i te reo tāpōnē.

’Aita ’o Takashi i ta’a pauroa tei parauhia mai, tē ha’amana’o nei rā ’oia ē, « ’ua tae mai te mana’o i roto iā’u ē, e fa’aro’o atu ».

’Ua ha’api’i te mau misiōnare iāna nāhea i te pure, nā reira ato’a te mau ha’api’ira’a. ’Ua haere ’oia i te purera’a ’e ’ua putapū ’oia i te ’itera’a pāpū o te mau melo Tāpōnē. Nō te pāto’ira’a a tōna ’utuāfare fa’aro’o Buddha, e parau noa Takashi i te mau misiōnare ē : « E’ita tāna e nehenehe e tomo i roto i te ’Ēkālesia, tē hina’aro nei rā vau e ha’api’i rahi atu ā. »

Piti matahiti i muri iho, hou Takashi ’a reva atu ai i te ha’api’ira’a i te Fenua Marite, i te 17ra’a o tōna matahiti, ’ua fāri’i tōna nā metua, ’e ’ua tomo atura ’oia i roto i te ’Ēkālesia.

’Ua fānauhia Elder Wada i te 5 nō Fepuare 1965, nā Kenzo ’e Kazuko Wada, ’ua noa’a te hō’ē parau tū’ite Licence nō te reo i te matahiti 1990 ’e te parau tū’ite Master nō te fa’aterera’a faufa’a i te matahiti 1996, to’opiti i Brigham Young University.

’Ua tāvini ’oia i te hō’ē misiōni i roto i te misiōni nō Utah Salt Lake City North ’e ’ua fa’aipoipo ’ia Naomi Ueno i te 18 nō Tiunu 1994, i roto i te hiero nō Tokyo (Tāpōnē). E piti tā rāua tamari’i.

I roto i tāna ’ohipa, ’ua amo Elder Wada i te ti’ara’a rau i roto i te mau taiete rahi nā te ara i te Fenua Marite ’e i Tāpōnē, nā reira ato’a te ti’ara’a ti’a fa’atere o te mau ’ohipa pae faufa’a nō te ’Ēkālesia i te mau ārea nō Amerika Apato’erau, te tuha’a tō’o’a o te rā ’e te tuha’a apato’erau tō’o’a o te rā ’e i te ārea nō Asia Apato’erau.

’Ua riro Elder Wada ’ei ’episekōpo, ’ei melo ’āpo’ora’a teitei ’e ’ei ’orometua séminaire. ’Ua tāvini ’oia ’ei peresideni nō te misiōni nō Japan Tokyo South mai te matahiti 2013 ē 2016. ’Ua pāturuhia ’oia ’ei Hitu ’Ahuru Hui mana fa’atere rahi i te 31 nō Māti 2018.