Hō’ē mahana fa’ahou

Nā Elder Taylor G. Godoy

Nō te Hitu ’Ahuru

Tē vai ra tā tātou pā’āto’a hō’ē « teie mahana » nō te ora, ’e te tāviri ’ia manuia tō tātou mahana, o te ineinera’a ïa nō te fa’atusia.

I te tahi tau matahiti i ma’iri, ’ua fāri’i tō’u mau hoa i te hō’ē ’aiu nehenehe roa o Brigham te i’oa. I muri mai i tōna fānaura’ahia, ’ua ’itehia e ma’i varavara tō Brigham tei pi’ihia te syndrome de Hunter, te aura’a ra e mea poto ïa te orara’a o Brigham. I te hō’ē mahana, te haere ra o Brigham ’e tōna ’utuāfare e māta’ita’i i te mau vāhi o te hiero, ’ua fa’ahiti o Brigham i te hō’ē pereota ta’a ’ē ; e piti taime, ’ua parau ’oia ; « hō’ē mahana fa’ahou ». I te mahana i muri mai, ’ua pohe o Brigham.

E haere au i te tahi taime e hi’o i te mēnema o Brigham, ’e te mau taime ato’a e haere au, e hi’o tūtonu vau i te pereota « hō’ē mahana fa’ahou » Tē uiui nei au e aha rā te aura’a o te reira, e aha te mea e tupu mai i roto i tō’u orara’a ’ia ’ite ē e hō’ē ana’e mahana nō’u nō te ora. Nāhea rā vau i tā’u vahine, tā’u mau tamari’i ’e vetahi ’ē ? E aha te fāito o tō’u fa’a’oroma’i ’e tō’u marū ? Nāhea vau i te atuatu maita’i i tō’u tino ? Mai tei hea itoito e nehenehe ai au e pure ’e e mā’imi i te mau pāpa’ira’a mo’a ? Tē mana’o nei au ē nō terā huru ’aore rā nō te tahi atu, e vai ra tō tātou pā’āto’a, te hō’ē taime ’aore ra te tahi atu, hō’ē fa’aotira’a « hō’ē mahana fa’ahou »—te hō’ē fa’aotira’a ē, e ti’a ia tātou ’ia fa’a’ohipa ma te pa’ari i te taime e vai ra ia tātou.

I roto i te Faufa’a Tahito, e tai’o tātou i te ’ā’amu o Hezekia, te ari’i nō Iuda. ’Ua fa’aara te peropheta Isaia ia Hezekia i te hope’a ’o te ora o Hezekia. I tōna fa’aro’ora’a i te mau parau a te peropheta, ’ua ha’amata o Hezekia i te pure, i te tāparu ’e ’ua ta’i ma te māuiui. Nō teie ’ohipa, ’ua hōro’a mai te Atua e 15 matahiti nō te ora o Hezekia. (Hi’o Isaia 38:1-5)

’Āhani e parauhia mai ’ia tātou ē e mea poto roa tō tātou taime nō te ora, e tāparu ato’a tātou nō te tahi mahana fa’ahou nō te ora i te i’oa o te mau mea o tā tātou e ti’a e rave ’aore rā e rave ta’a ’ē atu.

Noa atu e aha te taime te Fatu, i roto i tōna pa’ari, e fa’aoti ai i te hōro’a mai nō tātou tāta’itahi, o te mea noa o tei pāpū ia tātou : tē vai ra tō tātou pā’āto’a hō’ē « teie mahana » nō te ora, ’e te tāviri ’ia manuia tō tātou mahana, o te ineinera’a ïa nō te fa’atusia.

’Ua parau te Fatu, « inaha, ’ua parauhia i teienei o teie mahana e tae noa atu i te taera’a mai o te Tamaiti a te Ta’ata, ’e oia mau ïa ’ei mahana ïa nō te tusia » (PH&PF 64:23; tu’uhia te pāpa’i opa).

Te ta’o tusia, nō roto mai ïa i te parau latino sacer te aura’a « mo’a » e facere te aura’a « rave »—te aura’a mau ’ia rave i te mau mea mo’a, te fa’arirora’a i te reira e mea tura.

« E horo’a mai te tusia i te mau ha’amaita’ira’a no te ra’i » (« Auē te Ta’ata i Parau ia Iehova », Te Mau Hīmene, no. 16).

Nāhea te tusia i te fa’ariro i tō tātou mau mahana e mea faufa’a ’e te ha’amaita’ihia ?

’A tahi, e ha’apūai te tusia a te ta’ata iho ia tātou ’e e ha’afaufa’a i te mau mea nō te reira tātou e fa’atusia ai.

Tau matahiti i teienei, i te hō’ē sābati ha’apaera’a mā’a, ’ua haere mai hō’ē tuahine pa’ari i te puripiti nō te fa’a’ite i tōna ’itera’a pāpū. Tē ora ra ’oia i roto i te ’oire tei pi’ihia Iquitos, hō’ē vāhi uru rā’au ta’ata ’ore nō Pērū. ’Ua parau mai ’oia ia mātou ē mai tōna bāpetizora’ahia, ’ua vai noa tera ’ōpuara’a tōna e fāri’i i te mau ’ōro’a nō te hiero nō Lima, Pērū. ’Ua aufau ha’apa’o ’oia i te tuha’a ’ahuru ti’a ’e ’ua tu’u i te hiti i te moni iti tāna e roa’a e rave rahi matahiti.

Teie te mau parau nō te fa’a’ite i tōna ’oa’oa i te haerera’a i te hiero ’e ’ia fāri’i i te mau ’ōro’a mo’a: « I teie mahana, e nehenehe au e parau ē ’ua ineine au nō te haere atu nā roto i te pāruru. E vahine ’oa’oa roa a’e au i te ao nei, ’ua ha’aputu vau i te moni, ’aita ’outou i ’ite e hia maorora’a, nō te haere e māta’ita’i i te hiero ’e i muri iho e hitu mahana nā ni’a i te ’ānāvai ’e e 18 hora nā ni’a i te pere’o’o uta ta’ata, tei roto vau i te pae hope’a i te Fare o te Fatu. I tō’u fa’aru’era’a i teie vāhi mo’a, ’ua parau vau iā’u iho, i muri a’e i te tusia o tei ani iā’u ’ia haere mai i te hiero, e’ita vau e vaiiho tāu’a ’ore noa i te fafaura’a tā’u i rave, e ’ohipa māu’a ïa te reira. E fafaura’a faufa’a rahi roa teie ! »

’Ua ha’api’i mai au nā roto mai i teie tuahine ē te tusia o te ta’ata iho o te hō’ē ïa pūai fāito ’ore ’o te fa’ata’a i tā tātou mau fa’aotira’a ’e tō tātou hina’aro mau. E arata’i te tusia a te ta’ata iho i tā tātou mau ’ohipa, tā tātou mau fa’aotira’a ’e tā tātou mau fafaura’a ’e e hōro’a i te hō’ē aura’a o te mau ’ohipa mo’a.

Te piti, te tusia tā tātou e rave nō vetahi ’ē, e tā vetahi ’ē e rave nō tātou, e hōro’a mai i te mau ha’amaita’ira’a nō te tā’āto’a.

I tō’u rirora’a ’ei pīahi nō te ha’api’ira’a taote niho, e ’ere te mau hi’ora’a ātea pae faufa’a nō te ’imira’a faufa’a o tō mātou fenua i te mea fa’ahiahia roa. ’Ua topatopa roa te faufa’a o te moni mai teie mahana i te mahana i muri iho.

Tē ha’amana’o nei au i te matahiti i reira vau e haere ai e tāpa’o iā’u i te mau piha tōro’a a te mau taote tāpū ; e ti’a ’ia roa’a iā’u te mau tauiha’a ato’a nō te tāpū e hina’arohia nā mua a’e i te tāpa’ora’a i te reira ’āfa matahiti.’Ua ha’aputu tō’u nā metua i te moni e hina’arohia. I te hō’ē rā pō, ’ua tupu te hō’ē ’ohipa pe’ape’a. ’Ua haere mātou e ho’o mai i te mau tauiha’a, i te ’itera’a noa i te faufa’a moni tā mātou nō te ho’o mai i te mau tauiha’a ato’a, ’ua nava’i noa ïa nō te ho’o mai hō’e noa fa’ahōhoni nō te tāpū—e ’aita atu.’Ua ho’i mātou i te fare ’aita e ’ohipa i roto i te rima ’e te mana’o teimaha i roto i te ’ā’au ē e ’āfa matahiti nō te fare ha’api’ira’a teitei tei māu’a. E inaha, i reira iho, ’ua parau tō’u māmā : « Taylor, haere mai ; e haere ana’e »

’Ua haere mātou i te ’oire pū, i reira e mea rahi te mau vahi nō te ho’o mai ’e nō te ho’o atu i te mau tao’a fa’anehenehe ana’ana. I tō mātou taera’a i te hō’ē fare toa, ’ua ’īritimai tō’u māmā mai roto mai i tāna panie i te hō’ē pute terevete iti, i roto tē vai ra hō’ē fifi rima piru nehenehe e te hō’ē pāpa’i te nā ō ra : « Nā tā’u tamāhine here nā roto mai i tō ’oe pāpā ». O te hō’ē fifi rima tā tō’u pāpā rū’au i hōro’a i te hō’ē o tōna mau ’ōro’a mahana fānaura’a. E i mua i tō’u mata, ’ua ho’o atu i te reira.

I tōna fāri’ira’a i te moni, ’ua parau mai ’oia iā’u : « Te hō’ē mea o tā’u i pāpū maita’i, ’oia ho’i e riro mai ’oe ’ei taote niho. ’A haere ’e ’a ho’o mai i te mau tauiha’a ato’a o te hina’arohia ». I teienei, e nehenehe ānei ’outou e feruri ē mai te hea huru pīahi au i riro mai ai i te reira taime ? ’Ua hina’aro vau ’ia riro ’ei mea maita’i roa a’e ’e ’ia fa’aoti ’oi’oi i tā’u ha’api’ira’a, nō te mea ’ua ’ite au i te faufa’a moni teitei o te tusia tā tō’u māmā i rave.

’Ua ha’api’i mai au ē te tusia o tā tō tātou mau ta’ata here i rave nō tātou e fa’ahaumarū ïa ia tātou mai te pape to’eto’e i roto i te medebara. Nā teie huru tusia e ’āfa’i mai i te ti’aturira’a ’e te itoito.

Te toru, te mau tusia ato’a tā tātou e rave nei e mea ha’iha’i ïa ’ia fa’aauhia i te tusia a te Tamaiti a te Atua.

E aha te faufa’a o te hō’ē fifi rima piru herehia ’ia fa’aauhia i te tusia a te Tamaiti iho a te Atua ? Nāhea tātou ’ia fa’ahanahana i teie tusia fāito ’ore ? I te mau mahana ato’a, e nehenehe tātou e ha’amana’o ē hō’ē mahana fa’ahou tō tātou nō te ora ’e ’ia ha’apa’o maita’i. ’Ua ha’api’i mai Amuleka : « ’Oia ïa, ’ua hina’aro vau ’ia haere mai ʼoutou, ʼe ’ia ʼore ʼoutou ’ia faʼaetaeta i tō ʼoutou ʼāʼau ; inaha hoʼi, o te taime teie, ʼe te mahana o tō ʼoutou ora ; e nō reira ’ia tātarahapa ʼoutou, ʼe ’ia ʼore ’ia faʼaetaeta i tō ʼoutou ʼāʼau, e faʼatupu-vave-hia te rāveʼa rahi o te ora nō ʼoutou » (Alama 34:31). Te aura’a ra, ’ia pūpū tātou i te Fatu i te tusia nō te ’ā’au tātarahapa ’e te vārua marū, ’oi’oi te mau ha’amaita’ira’a nō te fa’anahora’a rahi nō te ’oa’oa e tupu mai i roto i tō ’outou orara’a.

E ti’a te fa’anahora’a nō te fa’aorara’a nā roto mai i te tusia a Iesu Mesia. Mai tāna iho i fa’ata’a mai, te tusia « nā te reira mamae rahi i fa’atupu i roto iā’u, ’oia ’o te Atua, ’o tei hau a’e i te mau mea ato’a ra, i te rurutaina nō te māuiui, ’e ’ua tahe mai ra te toto nā te mau poa ato’a, ’e ’ua māuiui i te tino ’e te vārua ato’a ho’i—’E ’ua hina’aro ho’i ’ia ’ore au ’ia inu i te ’āu’a maramara ’e ’ōriorio atu » (PH&PF 19:18).

’E nā roto ho’i i teie tusia, i muri a’e i te pe’era’a i te fa’anahora’a o te tātarahapa mau, tātou e nehenehe ai e ’ite i te teimaha i tā tātou mau hape ’e mau hara ’ia māra’a. Nō reira, e mono te hara, te ha’amā, te māuiui, te ’oto ’e te au ’ore iāna iho i te hō’ē ’itera’a māramarama, te ’oa’oa ’e te ti’aturi.

’Oia ato’a, ’a fa’ahanahana ai tātou ’e te māuruuru ho’i nō tāna tusia, e nehenehe tātou e fāri’i i roto i te hō’e fāito rahi te hina’aro rahi ’ia riro ’ei mau tamari’i maita’i a’e a te Atua, ’ia fa’aātea ’ē atu i te hara ’e ’ia ha’apa’o i te mau fafaura’a mai te ’ore i nā-reira-hia nā mua atu.

I muri iho, mai ia Enosa i muri mai i te fāri’ira’a i te fa’aorera’a o tāna mau hara, e fāri’i tātou i te hina’aro ’ia fa’atusia ’ia tātou ’e ’ia ’imi i te maita’i nō tō tātou mau taea’e ’e mau tuahine (hi’o Enosa 1:9). ’E ’ua ineine tātou i te « hō’ē mahana fa’ahou » tāta’itahi e pe’e i te anira’a o tā te peresideni Howard W. Hunter i parau mai ia tātou ’a parau ai ’oia : « E tāta’i te hō’ē pe’ape’a. E ’imi i te hō’ē hoa tei mo’ehia. E pāto‘i i te mana’o mo’emo’e ’e mono ’ei mana’o ti’aturi. E hōro’a i te hō’ē pāhonora’a marū. E fa’aitoito i te feiā ’āpī. E fa’a’ite i tō ’outou ha’avare ’ore nā roto i te parau ’e te ’ohipa. E tāpe’a i te parau fafau. ’Eiaha e tāpe’a i te ’ino’ino. E fa’a’ore i te hapa a te hō’ē ’enemi. E fa’a’ite i te mana’o tātarahapa. E tāmata ’ia hāro’aro’a. E hi’opo’a i tā ’outou mau tītaura’a i ni’a ia vetahi ’ē. E feruri nā mua i te tahi atu ta’ata. E fa’a’ite i te maita’i. E fa’a’ite i te marū. E fa’arahiri’i atu te ata. E fa’a’ite i tō ’outou ’ā’au mēhara. E mānava i te hō’ē ta’ata ’e’ē. E fa’a’oa’oa i te ’ā’au o te hō’ē tamari’i. Parau tō ’outou here ’e i muri iho ’a parau fa’ahou atu te reira » (Te mau ha’api’ira’a a te mau Peresideni o te ’Ēkālesia : Howard W. Hunter [2015], 32; fa’atanohia nā roto mai « What We Think Christmas Is », McCall’s, Tītema 1959, 82–83).

’Ia fa’a’ī tātou i tō tātou mau mahana i teie huru ’e i te pūai o tā te tusia a te ta’ata iho e hōro’a mai ia tātou ’e te tusia tā tātou e rave nei ’aore ra tā tātou e fāri’i nei a vetahi ’ē’E nō te hō’ē huru ta’a ’ē, ’ia ’oa’oa tātou i te hau ’e ’ia ’oa’oa i te tusia a te Tamaiti Fānau Tahi i pūpū mai nō tātou ; ’oia ho’i teie hau i fa’ahitihia ’ia tai’o tātou ē ’ua hi’a Adamu ’ia vai te mau ta’ata ’e tē vai nei te ta’ata—’outou ïa—’ia noa’a te ’oa’oa (hi’o 2 Nephi 2:25). Taua ’oa’oa ra o te’oa’oa mau ïa o tā te tusia ana’e ’e te tāra’ehara a te Fa’aora o Iesu Mesia e nehenehe e hōro’a mai.

’O tā’u ïa pure ē ’ia pe’e tātou iāna, ’ia ti’aturi tātou iāna, ’ia here tātou iāna ’e ’ia ’ite tātou i te here i fa’a’ta’ahia mai nā roto i tāna tusia i te mau taime ato’a e rāve’a ai tā tātou nō te ora hō’ē mahana fa’ahou. I te i’oa o Iesu Mesia, ’āmene.