’A hi’o mai na i taua ta’ata nei !
Nā Elder Dieter F. Uchtdorf
Nō te pupu nō te Tino ’Ahuru Ma Piti ’āpōsetolo
Te feiā e itehia ia rātou te hō’ē rāve’a nō te hi’o mau i taua ta’ata nei, e itehia ïa ia rātou te ūputa e tae atu ai i te mau ’oa’oa rahi o te orara’a, e te rā’au nō te mau hepohepo teimaha o te orara’a.
E au mau taea’e here, e au mau tuahine here, e au mau hoa, tē ’oa’oa nei au ’ia tae mai i rotopū ia ’outou i roto i teie hōpe’a hepetoma ’āmuira’a rahi nehenehe. Tē ’oa’oa nei māua Harriet, mai ia ’outou na, i te pāturura’a o Elder Gong ’e o Elder Soares ’e te tahi ato’a mau taea’e e mau tuahine tei pi’i-’āpī-hia i roto i teie ’āmuira’a rahi.
Noa atu ē, tē mihi nei au i tō’u hoa rahi ’o te Peresideni Thomas S. Monson, ’ua here au, ’e tē pāturu nei au, ’e tē turu nei au i tō tātou peropheta ’e peresideni, ’o Russell M. Nelson, e tōna nā tauturu rahi.
Tē māuruuru ’e tē hanahana ato’a nei au ’ia ’ohipa fa’ahou ā i pīha’i iho roa i tō’u mau hoa taea’e no te pupu nō te Tino ’Ahuru Ma Piti.
Hau roa atu ā, tē ha’eha’a nei au ’e tē ’oa’oa nei ho’i i te rirora’a ’ei melo no te ’Ēkālesia a Iesu Mesia i te Feiā Mo’a i te Mau Mahāna Hōpe’a Nei, i reira ho’i te rahira’a mirioni tāne ’e vahine ’e tamari’i e amo nei i te vāhi tei reira rātou—noa atu te huru tō rātou ti’ara’a—’e e tauto’o nei ma tō rātou ’ā’au ato’a nō te tāvini i te Atua ’e tāna mau tamari’i, i te patura’a i te bāsileia o te Atua.
E mahana mo’a teie mahana. E Sābati Pāsa, ’a fa’ahanahana ai tātou i taua po’ipo’i hanahana ra ’a ’ōfati ai tō tātou Fa’aora i te mau tāpe’a nō te pohe1 ’e ’ua ti’a mai ma te upo’oti’a mai roto mai i te mēnema.
Te mahana rahi roa a’e i roto i te ’ā’amu
’Aita i maoro a’enei, ’ua ui au i te natirara : « E aha te mahana i taui rahi a’e i te terera’a o te ’ā’amu ? »
’Ua noa’a mai te mau pāhonora’a, mai te māere ’e te huru ’ē, haere atu i te pa’ari ’e te fa’aitoito mana’o. Te tahi mau pāhonora’a, ’o te mahana ïa ’a tā’iri ai te hō’ē hu’ahu’a paraneta i te fenua Yucatan ; ’e ’aore rā, i te matahiti 1440, ’a fa’aoti ai ’o Johannes Gutenberg i tāna mātini nene’i parau ; ’e, ’oia ato’a, i te matahiti 1903, ’a fa’a’ite ai nā taea’e Wright i tō te ao nei ē, e ti’a mau i te ta’ata ’ia rere.
Mai te mea ē, e ui-ato’a-hia te reira uira’a ia ’outou, e aha tā ’outou pāhonora’a ?
E mea māramarama te pāhonora’a i roto i tō’u ferurira’a.
Nō te ’ite i te mahana faufa’a roa a’e i roto i te ’ā’amu, e ho’i tātou i muri, i taua ahiahi ra, fātata ’a 2 000 matahiti i teienei, i roto i te ’ō nō Getesemane, ’a tūturi ai Iesu i raro i roto i te pure ’ū’ana ’e ’a pūpū ai ’oia iāna iho ’ei ho’o nō tā tātou mau hara. I roto i taua tusia rahi ’e te hōpe’a ’ore ra nō te mamae fāito ’ore o te tino ’e te vārua, i tahe mai ai te toto nā roto i te mau poa ato’a o Iesu Mesia, te Atua. Ma te here hope roa, ua hōro’a ’oia i te mau mea ato’a ’o tā tātou pā’āto’a e nehenehe e fāri’i. Tāna tusia fa’ahiahia, e ’ere i te mea ’ōhie ’ia ta’a, maori rā, nā roto noa i tō tātou ’ā’au ’e te mana’o, tē fa’aha’amana’o mai nei te reira ia tātou i tā tātou tārahu rahi ’ā’au mehara i te Mesia nō tāna hōro’a hanahana.
I muri ri’i a’e i taua pō ra, ’ua arata’ihia mai Iesu i mua i te feiā fa’atere fa’aro’o, ’e te poritita tei fa’ao’ō’o iāna, tei tā’iri iāna, ’e tei fa’autu’a iāna i te hō’ē pohe ha’amā. ’Ua tārere ’oia ma te mamae i ni’a i te satauro ē tae roa atu ē, « ’ua oti. »2 ’Ua tu’uhia tōna tino pohe i roto i te hō’ē mēnema tārahuhia. ’E i muri iho, i te po’ipo’i o te toru o te mahana, ’ua māiha maira Iesu Mesia, te Tamaiti a te Atua Mana Hope ra nā roto mai i te mēnema ’ei ta’ata hanahana ’e te ti’a fa’ahou, ma te māramarama ’e te hanahana ari’i.
’Oia mau, e rave rahi mau ’ohipa i roto i te ’ā’amu tei tāui roa i te haere’a o te mau fenua ’e te mau ta’ata. Terā rā, e’ita te reira mau ’ohipa tā’āto’a e ’ōmua ri’i noa a’e i te fa’aau i te faufa’a o te ’ohipa tei tupu i taua po’ipo’i Pāsa mātāmua ra.
E aha te mea i fa’ariro i te tusia hōpe’a ’ore ’e te ti’afa’ahoura’a o Iesu Mesia ’ei ’ohipa faufa’a roa a’e i roto i te ’ā’amu—hau atu i te pūai o te mau tama’i rahi o te ao nei, te mau ’āueuera’a fenua, te mau mā’imira’a ’ihi e fa’ahuru ’ē i te orara’a ?
Maoti Iesu Mesia tātou e ora fa’ahou ai
Tei roto te pāhonora’a i nā tītaura’a rarahi ’e te fāito ’ore e piti, tā te ta’ata tāta’itahi e fa’aruru nei.
’A tahi, e pohe tātou pā’āto’a. Noa tu ē, e mea ’āpī roa, e mea nehenehe, e mea tino maita’i, ’e ’aore rā, e mea ha’apa’o maita’i ’outou, ’ia tae i te hō’ē mahana, ’aita e ora fa’ahou tō roto i tō ’outou tino. E ’oto te mau hoa ’e te ’utuāfare ia ’outou. E’ita rā tā rātou e nehenehe e fa’aho’i fa’ahou mai ia ’outou.
Noa atu rā i te reira, ’aua’a a’e Iesu Mesia, nō te hō’ē noa pu’e tau poto tō ’outou pohe. ’Ia tae i te hō’ē mahana, e tāhō’ē-fa’ahou-hia tō ’outou vārua i tō ’outou tino. E’ita teie tino ti’a fa’ahou e riro fa’ahou i te pohe,3 ’e e ora ’outou ē a muri noa atu, ma te ’ore e ’ite fa’ahou i te māuiui tino.4
E tupu te reira maoti Iesu Mesia, tei hōro’a i tōna ora ’e ’ua rave fa’ahou mai.
’Ua rave ’oia i te reira nō te mau ta’ata ato’a e ti’aturi iāna.
’Ua rave ’oia i te reira nō te mau ta’ata ato’a ’o te ’ore e ti’aturi iāna.
’Ua rave ato’a ’oia i te reira nō te mau ta’ata ato’a e fa’ao’ō’o, e fa’a’ino ’e e tuhi iāna.5
Maoti Iesu Mesia e nehenehe ai tātou e ora i pīha’i iho i te Atua
’A piti, ’ua hara tātou pā’āto’a. E ’ōpani tā tātou hara ia tātou ’ia ora ē a muri noa atu i pīha’i iho i te Atua, nō te mea, « e ’ore e ō te mea vi’ivi’i i roto i tōna basileia. »6
Nā roto i te reira, ’ua ’ōpanihia te mau tāne ato’a, te mau vahine ato’a ’e te mau tamari’i ato’a i rāpae i tōna aro—’oia ho’i, e tae roa atu i te taime e pūpū ai Iesu Mesia, te ’ārēnio pōra’o ’ore, i tōna ora ’ei ho’o nō tā tātou mau hara. Nō te mea ho’i ē, ’aita a Iesu e tārahu i mua i te ture, e nehenehe tāna e ’aufau i tā tātou tārahu, ’e ’ia pāhono i te mau tītaura’a a te ture nō te mau vārua ato’a. Nō ’outou ’e nō’u ato’a nei ïa.
’Ua ’aufau Iesu Mesia i te ho’o nō tā tātou mau hara.
Te tā’āto’ara’a.
I taua mahana faufa’a roa a’e i roto i te ’ā’amu, ’ua ’īriti Iesu Mesia i te mau ’ōpani o te pohe, ’e ’ua ha’amou i te mau pāruru e tāpe’a ia tātou ia tomo i roto i te mau piha mo’a ’e te tura o te ora mure ’ore. Maoti tō tātou Fatu ’e te Fa’aora, ’ua hōro’ahia ia ’outou ’e iā’u nei te hōro’a faufa’a rahi roa a’e ’e te fāito ’ore—noa atu tō tātou huru i muta’a ra, e nehenehe tā tātou e tātarahapa, ’e e pe’e i te ’ē’a e arata’i atu i te māramarama tiretiera ’e te hanahana, ma te hā’atihia e te mau tamari’i ha’apa’o a te Metua i te Ao ra.
Te tumu tātou e ’oa’oa ai
Teie tā tātou e fa’ahanahana nei i te Sābati Pāsa—tē fa’ahanahana nei tātou i te ora !
Maoti Iesu Mesia tātou e ti’a mai ai mai te pohe mai, ’e e tauahi atu ai ia rātou tā tātou i here, ma te roimata tahe o te ’oa’oa rahi ’e te māuruuru rahi. Maoti Iesu Mesia tātou e vai ai ’ei mau ta’ata mure ’ore, ’ei mau ao ’aore e hōpe’a.
Maoti Iesu Mesia tā tātou mau hara e nehenehe ai e tūmāhia, e ’ere noa rā terā, e ’aramōina-ato’a-hia.
E nehenehe tātou e riro ’ei ta’ata vi’ivi’i ’ore, ’e e fa’ateiteihia.
Mo’a.
Maoti tō tātou Fa’aora here e ti’a ai ia tātou ’ia inu i te pape piha’a e piha’a ē tae noa atu i te ora mure ’ore ra.7 E nehenehe tā tātou e pārahi i roto i te mau fare o tō tātou Ari’i mure ’ore, i roto i te hanahana fāito ’ore ’e te ’oa’oa hope roa.
Tē « hi’o ra ānei tātou i taua ta’ata nei » ?
Noa atu teie mau mea tā’āto’a, e rave rahi i roto i te ao nei i teie mahana, ’aita i ’ite ’e ’aore rā, ’aita e ti’aturi nei i roto i te hōro’a tāo’a rahi tā Iesu Mesia i hōro’a mai ia tātou nei. ’Ua fa’aro’o paha rātou i te parau nō Iesu Mesia ’e ’ua ’ite iāna ’ei ta’ata tu’iro’o, ’aita rā rātou e hi’o nei iāna ’ia au i tōna huru mau.
’Ia feruri ana’e au i te reira, e ha’amana’o vau i te Fa’aora, ’a ti’a ai ’oia i mua i te tāvana i Iudea i Rōma, ’o Ponotio Pilato, tau hora ri’i noa hou te pohera’a te Fa’aora.
’Ua hi’o ’o Pilato ia Iesu mai te au i te hi’ora’a a tō te ao. E ’ohipa tā Pilato e rave, e piti ’ohipa tumu : ha’aputu i te tute nō Rōma, e ha’apa’o i te hau. I teienei, ’ua hōpoi mai te sunederi ’āti Iuda i mua iāna i te hō’ē ta’ata tā rātou e parau nei ē, e riro ’ei fifi nō nā ’ohipa e piti nei.8
I muri a’e i te uiuira’a i tāna mau ’auri, ’ua fa’aara a’era Pilato ē : « ’Aita roa tō taua ta’ata a’era ’ino i ’itea iā’u. »9 ’Ua feruri rā ’oia ē, ’ua tītauhia iāna ’ia tāmarū i te feiā pari ia Iesu, nō reira, ’ua rave ’oia i te peu mātarohia ’ia fa’aora i te hō’ē mau ’auri i te pu’e tau nō te Pāsa. E’ita ānei rātou e ani iāna ’ia fa’aora ia Iesu i te fa’aora ia Baraba, te ta’ata ’eiā ’e te taparahi ta’ata tu’iro’o ?10
’Ua tītau rā te naho’a ta’ata huehue ’ia fa’aora ’o Pilato ia Baraba ’e ia fa’asatauro ia Iesu.
« I te aha ho’i ? » Te uira’a ïa a Pilato. « E aha tāna hara i rave ? »
Rahi roa atura tā rātou tuotuōra’a. « E fa’asatauro atu iāna ! »11
I roto i te hō’ē tauto’ora’a hōpe’a no te fa’ati’a i te mana’o o te naho’a ta’ata, ’ua fa’aue a’era ’o Pilato ’ia papa’ihia Iesu.12 ’Ua nā reira rātou, ’e ’ua vaiiho noa iāna ma te te tahe te toto ’e ma te mamae. ’Ua fa’ao’ō’o rātou iāna, ’ua tu’u i te hō’ē hei taratara i ni’a i tōna upo’o, ’e ’ua fa’a’ahu iāna i te hō’ē ’ahu purepure.13
’Ua mana’o paha ’o Pilato ē, e māha te hina’aro fa’atahe toto o te naho’a. Penei a’e e aroha rātou i teie ta’ata. ’Ua parau maira Pilato : « Inaha, i arata’i mai nei au iāna ia ’outou nei, ’ia ’ite ’outou ē, ’aita roa ’ōna ’ino i ’itea iā’u… ’A hi’o mai na i taua ta’ata nei ! »14
’Ua ti’a tino roa maira te Tamaiti a te Atua i mua i te ta’ata nō Ierusalema.
’Ua ti’a ia rātou ’ia hi’o ia Iesu, ’aita rā rātou i hi’o mau iāna.
’Aita a rātou e mata nō te hi’o.15
’Ei fa’aaura’a parau, tē ani-ato’a-hia nei ia tātou ’ia « hi’o mai na i taua ta’ata nei. » ’Ua rau te mana’o nō ni’a iāna i roto i te ao nei. Tē fa’a’ite pāpū nei te mau peropheta nō muta’a ra ’e nō teie anotau ē, e Tamaiti ’oia nā te Atua. Tē rave ato’a nei au i te reira. E mea faufa’a rahi ’ia ’ite tātou nō tātou iho. Nō reira, ’ia feruri hōhonu ana’e ’outou i te orara’a ’e i te tau tāvinira’a o Iesu Mesia, e aha tā ’outou e ’ite ?
Te feiā e ’itehia ia rātou te hō’ē rāve’a nō te hi’o mau i taua ta’ata nei, e ’itehia ïa ia rātou te ’ūputa e tae atu ai i te mau ’oa’oa rahi o te orara’a, ’e te rā’au nō te mau hepohepo teimaha o te orara’a.
Nō reira, ’ia hā’atihia ana’e ’outou i te ’oto ’e te pe’ape’a, ’a hi’o na i taua ta’ata nei.
Ia feruri ’outou ē, ua mo’e ’outou ’e aore ra, ua ha’amo’ehia, ’a hi’o na i taua ta’ata nei.
’Ia paruparu ’outou, ’ia ’ōvere, ’ia fē’a’a, ’ia ’ati, ’e ’aore rā, ’ia pau, ’a hi’o na i taua ta’ata nei.
E tāmāhanahana ’oia ia ’outou.
E fa’aora ’oia ia ’outou ’e e hōro’a mai ho’i i te aura’a i tō ’outou tere. E nīni’i mai ’oia i tōna Vārua ’e e fa’a’ī ho’i i tō ’outou ’ā’au i te ’oa’oa rahi.16
Tē horo’a nei ’oia « i te itoito nō te matapōuri ; ’e tē fa’arahi nei ’oia i te ’eta’eta nō tei paruparu. »17
’Ia hi’o mau ana’e tātou i taua ta’ata nei, e ha’api’i mai tātou nō ni’a iāna, ’e e ’imi tātou i te rāve’a nō te fa’a’āfaro i tō tātou orara’a i ni’a iāna. E tātarahapa tātou ma te tauto’o ho’i nō te ha’amaita’i i tō tātou nātura ta’ata, ’e e tupu fātata ri’i atu ā iāna ra i te mau mahana ato’a. Tē ti’aturi nei tātou iāna. E fa’a’ite tātou i tō tātou here nōna nā roto i te ha’apa’ora’a i tāna mau fa’auera’a, ’e nā roto i te orara’a i tā tātou mau fafaura’a.
’Ia parau poto noa, e riro mai tātou ’ei mau pipi nāna.
E fa’a’ī tōna māramarama ha’amaita’i i tō tātou vārua. Nā tōna aroha e fa’ateitei ia tātou. E ha’amāmāhia tā tātou hōpoi’a, e fa’ahōhonuhia tō tātou hau. Mai te mea ē, e hi’o mau tātou i taua ta’ata nei, e fāri’i tātou i te fafaura’a nō te hō’ē ananahi ha’amaita’ihia ’o tē fa’auru ’e ’o tē pa’epa’e ia tātou i roto i te mau tīpu’ura’a ’e te mau pu’u i roto i te tere o te orara’a. ’A hi’o ai tātou i muri, e ’ite tātou ē, tē vai ra te hō’ē hōho’a hanahana, e tū’ati’ati mau te mau patapatara’a.18
Mai te mea ē, e fāri’i ’outou i tāna tusia, e riro mai ’outou ’ei pipi nāna, ’e i te pae hope’a e tāpae i te hope’a o tō ’outou tere tāhuti nei, e aha te tupu i ni’a i te mau ’oto tā ’outou i fa’a’oroma’i i roto i teie orara’a ?
E mo’e ’ē te reira.
E te mau ’ino’inora’a, te mau ha’avarera’a, te mau hāmani-ino-ra’a tā ’outou i fa’aruru ?
E mo’e ’ē.
Te mauiuira’a, te māfatu ’oto, te pe’ape’a, te ha’amā, ’e te ahoaho ’ua nā roto atu ’outou ?
E mo’e ’ē.
’Ua ha’amo’ehia.
E mea māere ānei mai te mea ē, « tē paraparau nei tātou i te Mesia, ’e tē ’oa’oa nei tātou i te Mesia, ’e tē a’o nei tātou i te parau a te Mesia, ’e tē tohu nei ho’i tātou i te Mesia ’ia ’ite tā tātou mau tamari’i i te tumu e hi’ohia atu e rātou nō te matarara’a i tā rātou mau hara » ?19
E mea māere ānei mai te mea ē, e tauto’o tātou ma tō tātou ’ā’au ato’a nō te hi’o mau i taua ta’ata nei ?
E au mau taea’e, e au mau tuahine here, tē fa’a’ite pāpū nei au ē, te mahana faufa’a roa a’e i roto i te ’ā’amu o te huita’ata, ’o te mahana ïa a upo’oti’a ai Iesu Mesia, te Tamaiti ora a te Atua, i ni’a i te pohe ’e te hara nō te mau tamari’i pā’āto’a a te Atua. E te mahana faufa’a roa a’e i roto i tō ’outou orara’a ’e tō’u nei, ’o te mahana ïa ’a ha’api’i mai ai tātou ’ia « hi’o i taua ta’ata nei » ; ’a hi’o ai tātou iāna i tōna ra huru mau ; ’a rave ai tātou ma tō tātou ’ā’au ato’a ’e te vārua ato’a i tōna mana tāra’ehara ; ’a fafau ai tātou ’ia pe’e iāna ma te ’oa’oa ’e te pūai fa’a’āpīhia. ’Ia riro taua mahana ra ’ei mahana e nā ni’a iho ’e e nā ni’a iho noa, i te roara’a o to tātou orara’a.
Tē vaiiho atu nei au ia ’outou i tō’u ’itera’a pāpū ’e tā’u ha’amaita’ira’a ē, mai te mea ē, e « hi’o tātou i taua ta’ata nei », e ’itehia ïa ia tātou te ’oa’oa ’e te hau pāpū i roto i teie orara’a tāhuti nei ’e te ora mure ’ore i roto i te ao e tae mai. Nā roto i te i’oa mo’a o Iesu Mesia ra, ’āmene.