Bonnie H. Cordon

Peresideni rahi nō te Feiā ’Āpī Tamāhine

Hō’ē ’īrava tā te tuahine Bonnie H. Cordon e au roa nei, tei roto ïa i Te Parau Ha’api’ira’a ’e te mau Parau Fafau 123:17 : « ’Ia rave tātou i te mau mea ato’a i roto i tō tātou mana ’ia rave rā ma te ’oa’oa ; ’ei reira e ti’a ai ia tātou ’ia ti’a noa mai ai, mai te pāpū-roa-ra’a, nō te ’ite i te ora o te Atua ra, ’e nō te fa’a’itera’a mai i tōna ra rima. »

Nōna, tei roto i teie ’īrava te mau ha’api’ira’a tāna i ha’api’i i te roara’a o tōna orara’a. « E ti’a ia tātou ’ia rave i te mau ’ohipa teimaha, e nehenehe ato’a rā e rave ma te ’oa’oa », tē parau ra te tuahine Cordon, tei pāturuhia i te 31 nō Māti 2018, ’ei peresideni ’āpī nō te Feiā ’Āpī Tamāhine.

’Ua nīni’i mai te reira ’ite i roto iāna mai te hō’ē « ’ā’amu moemoeā », i te ’ohipara’a ’oia i roto i te hō’ē ’āua fa’a’apu nō Idaho Apato’a Hiti’a o te rā, ’e i muri iho, i te taime ’a tauto’o ai ’oia nō te ha’api’i i te reo ’āpī ’ei misiōnare i Pōtītī. E poro’i ato’a te reira tāna i fa’ahiti pinepine i mua i te mau misiōnare ’a peresideni ai rāua tāna tāne i te misiōni nō Brazil Curitiba. ’E e poro’i i teienei tāna e hina’aro e fa’a’ite i te mau tamāhine ato’a ’ati a’e te ao.

I teie mahana, e anihia te feiā ’āpī tamāhine ’ia ti’a mai ’e ’ia fa’anu’u i te ’ohipa a te Fatu i mua. « E nehenehe tā tātou ’ia rave i te reira », ’ua parau fa’ahou ’oia.

’Ua fānauhia Bonnie Hillam Cordon i te 11 nō Māti 1964, nā Harold ’e Carol Rasmussen Hillam i Idaho Falls, i Idaho (Marite). I muri mai i tāna misiōni, ’ua noa’a iāna te parau tū’ite Licence nō te ’ohipa ha’api’ira’a i Brigham Young University, i reira tōna mātaura’a ia Derek Lane Cordon. ’Ua fa’aipoipo rāua i te 25 nō ’Ēperēra 1986, i roto i te hiero nō Roto Miti. E maha tā rāua tamari’i ’e e maha mo’otua tamāroa.

I roto i tāna tāvinira’a i roto i te ’Ēkālesia, ’ua rave ’oia ’ei fa’atere piha aupuru tamari’i ri’i ’e ’ei ’orometua séminaire. Hou tāna pi’ira’a, ’a piti matahiti i ma’iri, ’ei tauturu i roto i te peresidenira’a rahi nō te Paraimere, ’ua au roa te tuahine Cordon i te tāvinira’a ’ei peresideni Feiā ’Āpī Tamāhine nō te titi. Noa atu ā tōna ha’amāuruurura’ahia i te reira pi’ira’a, tē parau ra ’oia : « ’Aita vau i fa’aea i te pure nō te feiā ’āpī tamāhine ».

Hō’ē poro’i tāna e hina’aro roa e fa’a’ite i te feiā ’āpī tamāhine ’ati a’e te ao, ’oia ho’i, ’ua here ’oia ia rātou, ’e hau atu, ’ua here te Atua ia rātou.