Mai te Mesia ato’a e fa’a’ore i tā ’outou na, e nā reira ato’a ’outou
Nā Elder Larry J. Echo Hawk
Nō te Hitu ’Ahuru
E noa’a ia tātou pā’āto’a te hau e’ita e nehenehe e parau, ’e te ’āpitira’a ho’i ’e te Fa’aora, ’ia ha’api’i tātou ’ia fa’a’ore hua atu i tā te ta’ata « hāmani-’ino-ra’a » ia tātou.
« Tae a’era rā i te mahana mātāmua o te hepetoma ra, haere atura rātou, ’e ’o to’ofanu pu’e vahine ’ē’ē ho’i i te mēnema ra i te po’ipo’i roa, ma te rā’au no’ano’a tā rātou i putu ra.
« Ro’ohia atu e rātou ’ua fa’ata’a-’ē-hia te ’ōfa‘i i te mēnema ra.
« ’E tei tō rātou tomora’a i roto ra, ’aita ra te tino o te Fatu ra ’o Iesu.
« ’E tē māere noa ra rātou i taua mea ra, inaha, tē ti’a noa mai ra e to’opiti pu’e ta’ata i pīha’i iho ia rātou ma te ’ahu ’ana’ana :
« ’E rahi roa a’era te mehameha o taua mau vahine ra, pi’o ihora tō rātou mata i raro i te repo, ’ua parau mai ra rāua, e aha ’outou i ’imi ai i tei ora i te vaira’a o te pohe ?
« ’Aore ’oia i’ō nei, ’ua ti’a ïa i ni’a ».1
Ananahi te sābati Pāsa e ha’amana’o ta’a ’ē ai tātou i te mea tā Iesu Mesia i rave nō tātou : « I aroha mai te Atua i tō te ao, ’e ’ua tae roa i te hōro’a mai i tāna Tamaiti fānau tahi, ’ia ’ore ’ia pohe te fa’aro’o iāna ra, ’ia roa’a rā te ora mure ’ore ».2 I te hō’ē mahana e ti’afa’ahou mai tātou mai iāna te huru, ’a ora ai ē a muri noa atu.
Nā roto i te temeio nō te tāra’ehara hanahana a Iesu Mesia, e ti’a ato’a ia tātou ’ia fāri’i i te hōro’a nō te fa’aorera’a i tā tātou mau hara ’e te mau hape, mai te peu e fāri’i tātou i te rāve’a ’e te hōpoi’a nō te tātarahapara’a. ’E nā roto i te fāri’ira’a i te mau ’ōro’a i tītauhia, te ha’apa’ora’a i te mau fafaura’a ’e te mau fa’auera’a, e ti’a ia tātou ’ia roa’a te ’ora mure ’ore ’e te fa’ateiteira’a.
I teie mahana, ’ua hina’aro vau e fa’atumu i ni’a i te fa’aorera’a hara, hō’ē hōro’a faufa’a rahi ’e te tao’a rahi ho’i tei pūpūhia mai e tō tātou Fa’aora ’e te Ora Tāra’ehara o Iesu Mesia.
I te hō’ē pō Tītema, i te matahiti 1982, ’ua fa’aara te niuniu ia māua Terry, i tō māua fare i Pocatello (Idaho). I te pāhonora’a atu vau, tē ta’i ra terā ta’ata. I te hope’a, fa’aro’o a’era vau i te reo o tō’u tuahine tei nā ’ō mai ē « ’ua fa’aru’e mai Tommy ».
E ta’ero ’ava, e taure’are’a 20 matahiti, tei fa’ahoro pūai i tōna pere’o’o, hau atu i te 135km i te hora ’aita i tāpe’a i te mori ’ute’ute, i te hō’ē vāhi nō Denver (Colorado). ’Ua fa’aū atu ’oia i te pere’o’o o tō’u teina, ’o Tommy, ē ’ua fa’aru’e roa mai rāua tāna vahine, ’o Joan. Tē ho’i ra rāua i te fare o te tahi tamāhine tā rāua, i muri mai i te hō’ē ’āru’i Noela.
I terā iho taime māua tā’u vahine i te revara’a i Denver, ’ua haere atura i te fare vaira’a tino pohe. ’Ua putuputu mātou tō’u metua ’e tō’u mau taea’e ’e tuahine, ’ua heva mātou i te pohe o Tommy iti ’e o Joan. ’Ua mo’e rāua nō te tahi hara hā’iri’iri. ’Ua māuiui roa tō mātou nei ā’au, ’e tē ha’amata ra tō’u riri i terā taure’are’a i te rahi i roto iā’u.
’Ua tāvini Tommy ’ei pāruru ture nō te tuha’a fa’atere ha’avāra’a a te hau Marite ’e tē haere ra ’oia nō te riro mai ’ei ti’a pāruru pūai nō te mau fenua ’e te mau faufa’a a te mau ta’ata tumu nō Marite.
I muri iho i te tahi tau taime ri’i, ’ua fa’atupuhia te hō’ē tiripuna ha’avāra’a nō teie taure’are’a tei fa’atupu i te pohe e tōna pere’o’o. Noa atu tō rātou māuiui ’e te ’oto, ’ua haere tō’u nā metua ’e tō’u tuahine matahiapo, ’o Katy, i te ha’avāra’a. Tei reira ato’a nā metua o te taure’are’a ta’ero, ’e ’ia ’oti te ha’avāra’a, ’ua pārahi noa rāua i ni’a i te pārahira’a ma te ta’i. Tei ’ō noa atu tō’u nā metua ’e tō’u tuahine i te pārahira’a, ’a ’imi noa ai i te fa’anā i tō rātou ’oto. I muri iho, ’ua ti’a mai ra tō’u nā metua ’e tō’u tuahine, ’e ’ua haere atu ra i terā nā metua rā ’e ’ua pūpū atu i te parau tāmāhanahanara’a ’e te fa’a’orera’a hapa. ’Ua aroha rima te mau tāne ; ’ua tāpe’a te mau vahine, tō te tahi ’e tō te tahi rima e ’oto rahi ’e te roimata tei ’itehia i ni’a i nā ’utuāfare e piti ’e tae noa atu i te māuiui rahi. ’Ua fa’a’ite mama, papa ’e ’o Katy i te haere’a avei’a ma tō rātou pūai māru ’e te itoito ’e ’ua fa’a’ite ato’a i tō mātou nei ’utuāfare e aha te fa’a’orera’a hapa.
Maoti terā pūpūra’a fa’a’orera’a hapa i terā mau taime tō’u ’ā’au i te tāmarūra’ahia ’e ’ua mahora te ’ē’a nō te fa’aorara’a. I te roara’a o te tau, ’ua ha’api’i mai au ē nāhea ’ia roa’a te ’ā’au fa’a’orera’a hapa. E mea nā roto noa i te tauturu a te Ari’i nō te hau tā’u zugo māuiui i te matarara’a mai. E mihi tāmau noa tō’u ’ā’au ia Tommy ’e iaJoan, tē fa’ati’a nei rā te fa’a’orera’a hapa iā’u ’ia ha’amana’o ia rāua ma te ’ōti’a ’ore. ’Ua ’ite ho’i au ē, e tāhō’ē fa’ahou mātou ’ei ’utuāfare.
’Aita vau e parau nei ē, e pāturu mātou i te ravera’a ti’a ’ore. ’Ua ’ite pāpū maita’i roa tātou ē, e amo te ta’ata hō’ē i te hōpoi’a nō tā rātou mau hara ’ī’ino ’e tā rātou mau ’ohipa hape. ’Āre’a rā, ’ua ’ite ato’a tātou ē, ’ei mau tamaiti ’e ’ei mau tamāhine a te Atua, te pe’e nei tātou i te mau ha’api’ira’a a Iesu Mesia. E tītauhia ia tātou ’ia fa’a’ore i te hapa noa atu ē, e au ra nō vetahi, e ’ere i te mea tano tā tātou fa’a’orera’a hapa.
’Ua ha’api’i te Fa’aora :
« ’Ia fa’a’ore ho’i ’outou i tā vetahi ’ē ra hapa, e fa’a’ore ato’a mai tō ’outou Metua i te ao ra i tā ’outou : »
« ’Ia ’ore rā ’outou e fa’a’ore i tā vetahi ’ē ra hapa, e ’ore ato’a tō ’outou Metua e fa’a’ore mai i tā ’outou hapa ».3
E noa’a ia tātou pā’āto’a te hau e’ita e nehenehe e parau, ’e te ’āpitira’a ho’i ’e te Fa’aora, ’ia ha’api’i tātou ’ia fa’a’ore hua atu i tā te ta’ata « hāmani-’ino-ra’a » ia tātou. Nā teie ’āpitira’a e fa’atae mai i te mana o te Fa’aora i roto i tō tātou orara’a ma te hape ’ore ’e te ’ore roa e mo’ehia.
’Ua parau te ’āpōsetolo Paulo :
« E tēnā na, e fa’aā’au aroha noa, e te ha’eha’a, ’e te marū, ’e te fa’a’oroma’i rahi, ’e te hāmani maita’i mai te feiā… i mā’itihia e te Atua ra;
« E fa’a’oroma’i te tahi i te tahi, ’e e fa’a’ore te tahi i tā te tahi hapa… mai te Mesia ato’a i fa’a’ore i tā ’outou na, e nā reira ato’a ’outou. »4
’Ua parau te Fatu iho ē :
« Nō reira, tē parau atu nei au ia ’outou ē, e mea ti’a roa ia ’outou ’ia fa’a’ore ’outou te tahi i tā te tahi ra hapa ; nō te mea ’o ’oia ’o tei ’ore i fa’a’ore i te hapa a tōna ra taea’e ’ua vai fa’ahapahia ’oia i mua i te Fatu ; nō te mea tei roto noa iāna te hara rahi a’e.
« E fa’a’ore au, ’o te Fatu, i te hara a rātou tā’u i hina’aro i te fa’a’ore atu, ia ’outou rā ’ua tītauhia atu ra ’outou ’ia fa’a’ore i te hapa a te ta’ata ato’a ».5
E mea pāpū maita’i te mau ha’api’ira’a a tō tātou Fa’aora ’e te Ora Tāra’ehara e ti’a i te ta’ata hara ’ia ineine ’ia fa’a’ore i te hapa a vetahi ’ē mai te peu tē tīa’i ra ’oia ’ia noa’a mai te fa’a’orera’a hapa.6
Te mau taea’e ’e te mau tuahine, e ta’ata ānei i roto i tō tātou orara’a tei ha’amāuiui ia tātou ? Tē tāpe’a noa ra ānei tātou i tā tātou e mana’o ra, e ’ino’ino ra ’e e riri ti’a roa ra ? Tē vaiiho ra ānei tātou i te te’ote’o ’ia tāpe’a noa te ’ino’ino ’eiaha e vaiiho atu ? Tē ani nei au ia tātou pā’āto’a ’ia fa’a’ore roa i te hapa ’e ’ia vaiiho i te ora ’ia tae mai. ’E noa atu ē, ’aita te fa’a’orera’a hapa e tae mai i teie mahana, ’ia ’ite ’outou ē, ’ia hia’ai tātou i te reira ’e ’ia ’ohipa tātou nō te reira, e tae mai te reira—mai tei tupu i te hope’a nō’u, i te pohera’a tō’u taea’e.
E ha’amana’o ato’a ē, te tahi tuha’a faufa’a rahi nō te fa’a’orera’a hapa, ’o te fa’a’orera’a ato’a ïa tātou i tā tātou iho hapa.
’Ua parau te Fatu : « ’O ’oia ’o tei tātarahapa i tāna ra mau hara, ’ua fa’a’orehia ïa te reira, ’e e ’ore ho’i au, ’o te Fatu e ha’amana’o fa’ahou ā i te reira ».7
Tē tāparu nei au ia tātou pā’āto’a i teie mahana ’ia ha’amana’o ’e ’ia pe’e i te hi’ora’a o Iesu Mesia. I ni’a i te sātauro i Golagota, i roto i tōna ahoaho, ’ua ’ū’uru ’oia i teie mau parau : « E ta’u Metua e fa’a’ore mai i tā rātou hara, ’aore ho’i rātou i ’ite i tā rātou e rave nei .8
Nā roto i te roa’ara’a te vārua fa’a’ore hapa ’e te fa’a’ohipara’a i te reira, mai tō’u nā metua ’e tō’u tuahine matahiapo, e ti’a ia tātou ’ia fa’atupu i te parau fafau a te Fa’aora : « ’O tō’u nei hau tā’u e hō atu nō ’outou ; e ’ere mai tā tō te ao nei hōro’a tā’u hōro’a ia ’outou. ’Eiaha e taiā tō ’outou ’āau, ’eiaha ho’i e mata’u ».9
Tē fa’a’ite pāpū nei au e tae mai te reira hau i roto i tō tātou orara’a ’ia ha’apa’o tātou i te mau ha’api’ira’a a Iesu Mesia ’e ’ia pe’e tātou i tōna hi’ora’a nā roto i te fa’a’orera’a i te hapa a vetahi ’ē. ’A fa’a’ore ai tātou i te hapa, tē parau fafau atu nei au ē, e ha’apūai te Fa’aora ia tātou, ’e e mani’i mai tōna mana ’e tōna ’oa’oa i roto i tō tātou orara’a.
’Aore ta’ata i roto i te mēnema. Tē ora nei te Mesia. ’Ua ’ite au iāna. ’Ua here au iāna. ’Ua māuruuru vau nō tōna maita’i, ’o te mana ha’apūai e nava’i nō te fa’aora i te mau mea ato’a. Nā roto i te i’oa mo’a o Iesu Mesia ra, ’āmene.