Elder Matthew L. Carpenter
Hitu ’Ahuru Hui mana fa’atere rahi
Tē ha’amana’o nei Elder Matthew L. Carpenter i te taime mātāmua ’ua ’ite ’oia i te putapūra’a o te Vārua Maita’i. E tamaiti ’āpī noa ā, e hitu paha matahiti, tē pārahi ra ’oia i te Paraimere. E māramarama e haere mai ra i roto i te piha, ’e ’ua tae ato’a mai tōna mana’o māhanahana ’aita ’oia i ’ite i nā mua a’e.
« Mai te huru ’ua ’ume’ume i roto i tō’u ’ā’au—e ’ere nō te māhanahana », ’ua parau mai ’oia. « I ’ite au ē, e parau pāpū te parau nō te Atua ; ’ua putapū vau i te reira. »
I te 11ra’a o tōna matahiti, ’ua haere ’oia i te hō’ē tuha’a purera’a nō te ’āmuira’a rahi i roto i te Fare menemene nō Roto Miti nā muri i tōna metua tāne. Terā te taime mātāmua ’oia i roto i te hō’ē ā piha ’e te hō’ē peropheta, ’o te peresideni Joseph Fielding Smith.
’Ua parau mai ’oia : « I te ’itera’a atu vau iāna, ’ua fa’a’ite mai te Vārua iā’u ē, e peropheta ’oia. »
Nā teie mau ha’apāpūra’a pae vārua i te ’āpīra’a i tauturu iāna ’ia ’imi i te Vārua ’ei mana arata’i i te roara’a o tōna orara’a.
« ’Aita tō’u ’itera’a pāpū i noa’a i te hō’ē ’ohipa ta’a ’ē ’e te mau melahi », ’ua parau mai teie Hitu ’Ahuru Hui mana fa’atere rahi tei pāturuhia i te 31 nō Māti 2018, « ’ua tupu noa mai rā ’e ’ua nu’u noa mai i roto i te tau. »
’Ua fānauhia Matthew Leslie Carpenter i Roto Miti, Utaha (Marite), i te 21 nō ’Ātopa 1959, nā Leone Erekson ’e Robert Allred Carpenter. ’O ’oia te teina o nā tamari’i e va’u, ’e ’ua pa’ari ’oia i roto i te hō’ē ’utuāfare e pae tuahine.
I tōna ’āva’e hope’a i te fare ha’api’ira’a tuarua, ’ua mātau rāua Michelle « Shelly » Brown. ’Ua ha’amata rāua i te arapae ’e ’ua fa’aea i te taime ’a tāvini ai ’oia i roto i te misiōni nō Helevetia Geneva, mai te matahiti 1979 i te matahiti 1981. I te ho’ira’a mai ’oia, ’ua fa’aipoipo rāua i roto i te hiero nō Roto Miti i te 9 nō Tiurai 1982. E pae tā rāua tamari’i.
’Ua roa’a ia Elder Carpenter te parau tū’ite Licence no te ’ohipa moni i te fare ha’api’ira’a Brigham Young University, ’e tae noa atu i te parau tū’ite Master nō te fa’aterera’a ’ohipa i Harvard Business School. ’Aita i maoro a’enei, ’o ’oia te ti’a fa’atere rahi nō te fa’anahora’a Foundation Specialty Financing Fund.
’Ua tāvini Elder Carpenter ’ei ’episekōpo, ’ei tauturu i roto i te ’episekōpora’a, ’ei peresideni Feiā ’Āpī Tamāroa titi, ’ei melo ’āpo’ora’a teitei ’e ’ei Hitu ’Ahuru ārea.