Tōna Vārua ’ia vai i pīha’i iho ia ’outou
Nā te peresideni Henry B. Eyring
Tauturu piti i roto i te Peresidenira’a Mātāmua
Te pure nei au ma tō’u ’ā’au ato’a ia fa’aro’o ’outou i te reo o te Vārua, ’o tei tonohia atu ia ’outou na, ma te ’ā’au hōro’a noa.
E au mau taea’e ’e au mau tuahine, tē māuruuru nei au nō te ha’amaita’ira’a ’ia paraparau atu ia ’outou i te Sābati o te Fatu, i roto i te ’āmuira’a rahi o tāna ’Ēkālesia, i teie pu’e tau Pāsa. Tē ha’amāuruuru nei au i tō tātou Metua i te Ao ra nō te hōro’a o tāna Tamaiti here, tei haere mai i te fenua nei, nā roto i tōna iho hina’aro, ’ia riro ’ei fa’aora nō tātou. Tē māuruuru nei au ’ia ’ite ē, ’ua pohe ’oia nō tā tātou mau hara ’e ’ua ti’a fa’ahou i roto i te ti’afa’ahoura’a. Pauroa te mahana ’ua ha’amaita’ihia vau ’ia ’ite ē, ’aua’a a’e tāna tāra’ehara, e nehenehe au e ti’a fa’ahou i te hō’ē mahana nō te ora ē a muri noa atu i roto i te hō’ē ’utuāfare here.
’Ua ite au i teie mau mea nā roto i te hō’ē noa iho rāve’a e nehenehe ai ia tātou pā’āto’a ’ia ’ite. ’Ua paraparau mai te Vārua Maita’i i tō’u ferurira’a ’e i tō’u ’ā’au ē, e parau mau te reira—e ’ere hō’ē noa time, e mea pinepine rā. ’Ua hina’aro vau i tāua tāmāhanahanara’a tāmau ra. ’Ua fa’aruru tātou pā’āto’a i te ’ati i reira ho’i tātou i te hina’arora’a i te tāmarūra’a a te Vārua. ’Ua ’ite au i te reira i te hō’ē mahana ’a ti’a ai au ’e tō’u metua tāne i roto i te hō’ē fare ma’i. ’Ua hi’o noa māua i tō’u metua vahine ’ia hutihuti na’ina’i noa i te aho—ē i muri iho, ’ua fa’aea. I te hi’ora’a māua i tōna hōho’a mata, tē ’ata’ata ra ’oia, ’a pe’e ai te māuiui. I muri a’e i te tahi taime māniania ’ore, ’ua paraparau tō’u pāpā nā mua. ’Ua nā ’ō ’oia : « ’Ua ho’i te hō’ē tamāhine iti i te fare ».
’Ua parau marū noa ’oia. Mai te mea ra ē, ’ua topa te hau. Tē fa’a’ite ra ’oia i te hō’ē mea tāna i ’ite ē, e parau mau. ’Ua ha’amata a’era ’oia i te ha’aputuputu marū noa i te mau tauiha’a o māmā. ’Ua haere ’oia i rāpae i te piha nō te ha’amāuruuru i te mau tuati tāta’itahi ’e te mau taote tei aupuru iāna e rave rahi mahana.
’Ua fāri’i tō’u metua tāne i te auhoara’a o te Vārua Maita’i i tāua taime ra nō te fāri’i, nō te ’ite ’e nō te rave i te mea tāna i rave i taua mahana ra. ’Ua fāri’i oia i te fafaura’a mai te mau ta’ata e rave rahi : « ’Ia vai noa tōna Vārua i roto ia rātou » (PHPF 20:79).
Tā’u e tīa’i nei i teie mahana, ’o te fa’arahira’a ïa i tō ’outou hina’aro ’e tō ’outou ’aravihi ’ia fāri’i i te Vārua Maita’i. E ha’amana’o ē, ’o ’oia te toru o te melo o te Atuara’a. E mau tino ti’a fa’ahou tō te Metua ʼe te Tamaiti. Te Vārua Maita’i rā, e tino vārua tōna (Hi’o PH&PF 130:22). Nā rātou e mā’iti e fāri’i ānei iāna ’e e fāri’i poupou ānei iāna i roto i tō ’outou ’ā’au ’e te ferurira’a.
Te mau tītaura’a e nehenehe ai ia tātou ’ia fāri’i i te reira ha’amaita’ira’a nō te ra’i mai, ’ua ha’amāramaramahia ïa i roto i te mau parau e fa’ahitihia i te mau hepetoma ato’a, ’aita rā paha te reira e ō pāpū nei i roto i tō tātou ’ā’au ’e tō tātou ferurira’a. Nō te fāri’i i te Vārua, tītauhia ia tātou « ’ia ha’amana’o noa » i te Fa’aora ’e « ’ia ha’apa’o i tāna mau fa’auera’a » (PHPF 20:77).
E tauturu teie pu’e tau o te matahiti ia tātou ’ia ha’amana’o i te tusia o te Fa’aora ’e tōna ti’afa’ahoura’a mai roto mai i te mēnema, ’ei tino ti’a fa’ahou. E rave rahi o tātou e tāpe’a noa nei i te mau hōho’a o tāua mau ’ohipa ra i roto i tō tātou ferurira’a. Hō’ē taime ’ua ti’a māua o ta’u vahine i rāpae i te hō’ē mēnema i Ierusalema. E rave rahi ’o te ti’aturi nei ē, ’o terā te mēnema i haere mai ai te Fa’aora i fa’asataurohia, i rāpae, ’ei Atua ti’a fa’ahou ’e te ora.
’Ua parau fa’atura maira te ta’ata arata’i nō tāua mahana ra, ma te fa’atorotoro i tōna rima, « Haere mai, ’a hi’o i te hō’ē mēnema ta’ata ’ore ».
’Ua pi’o mātou nō te tomo i roto. ’Ua ’ite atu mātou i te hō’ē ’ōfa’i tārava i pīha’i iho i te papa’i. Terā rā, ’ua puta maira te tahi atu hōho’a i roto i tō’u ferurira’a, mai te hōho’a mau mai te mea tā mātou i ’ite i tāua mahana ra. ’O Maria ïa, tā te mau ’āpōsetolo i vaiiho i te mēnema. Terā ïa tā te Vārua i fa’ati’a ’ia hi’o vau, ’e ’ia fa’aro’o ato’a i roto i tō’u ferurira’a, ma te māramarama maita’i, mai te huru ē, ’ua ti’a na vau i reira :
« ’Āre’a Maria tē ti’a noa ra ïa i rāpae i pīha’i iho i te mēnema ra, tē ’oto noa ra. Pi’o ihora ’oia i raro ma te ’oto, e hi’o atura i roto i te mēnema ra,
’E ’ite atura ’oia i e to’opiti pu’e melahi ma te ’ahu teatea, i te pārahira’a i te vāhi i vaiihohia ai te tino o Iesu ra, i te upo’o te tahi, ’e i te ’āvae ho’i te tahi.
« ’Ua parau maira rāua iāna, e aha ’oe i ’oto ai e terā ra vahine ? ’Ua parau atura ’oia ia rāua, nō tā’u Fatu i hōpoi-’ē-hia e rātou nei, ’e ’aore au i ’ite i te vaiihora’ahia e rātou ra.
« ’E tei te nā reirara’a atu o’ia ra, ’e oti a’era, ’ua fariu ti’a atura ’oia i muri, ’ite atura ’oia ia Iesu i te ti’a-noa-ra’a, ’aita rā ’oia i ’ite ē,’o Iesu.
« ’Ua parau maira Iesu iāna, e terā ra vahine, e aha ’oe i ’oto ai ? ’o vai tā ’oe e ’imi na ? Parau a’era ’oia, ma te mana’o ē, ’o te ta’ata fa’a’apu ra, nā ’ō atura iāna, e hoa, nā ’oe ’oia i hopoi ’ē ra, e fa’a’ite mai ’oe i te vaiihora’ahia ’oia e ’oe na, e nā’u ’oia e ti’i atu e hōpoi ’ē.
«’Ua parau maira Iesu iāna, e Maria. ’Ua fāriu atura ’oia ’ua parau atu ra iāna, e Raboni ; ’o tei parauhia ra ē, e te ’orometua.
« ’Ua parau maira Iesu iāna, ’eiaha e tāpe’a mai iā’u ; ’aore ā vau i tae i ni’a i ta’u Metua ra : e haere rā ’oe i ta’u mau taea’e ra, e parau atu ia rātou ē, tē haere nei au i ta’u Metua ra ’e tō ’outou Metua ra, ’e i ta’u Atua ra ’e tō ’outou Atua ra » (Ioane 20:13-17).
’Ua pure au ’ia fa’ati’ahia vau ’ia ’ite i te hō’ē mana’o tā Maria i fāri’i i te mēnema ra, ’e e aha tā nā ’āpōsetolo e piti ra i fāri’i i ni’a i te ’ē’a nō Emausa, ’a haere ai rāua e te Fa’aora ti’afa’ahou, ma te feruri ē, e rātere noa teie e haere ra i Ierusalema :
« Tāpe’a atura rāua iāna, nā ’ō atura, e fa’aea na tātou, ’ua huru ahiahi ho’i, ’ua mure te mahana. Haere atura ’oia i roto ’e pārahi ato’a rātou.
« ’E iāna i ’āmui ato’a atu ia rāua i te ’amura’a mā’a ra, ’ua rave ihora ’oia i te pāne, ha’amaita’i atura i te Atua, vāhi ihora tu’u atura ia rāua ra.
« Tu’ua ihora te ’ite i tō rāua mata, ’ite atura rāua iāna, mo’e roa atura rā ’oia.
« ’Ua parau ihora rāua rāua iho, e ’ere, e hoa, i ’ana’anatae tō tāua ’ā’au iāna i paraparau mai ia tāua i te arati’a ra, ’a fa’a’ite mai ai ia tāua i te aura’a i te mau parau i pāpa’ihia ra ? » (Luka 24:29-32).
’Ua fa’ahiti-fa’ahou-hia te tahi o te reira mau parau i roto i te hō’ē purera’a ’ōro’a tā’u i haere atu hau atu i te 70 matahiti i teienei. I taua tau ra, e fa’atupuhia te mau purera’a ’ōro’a i te ahiahi. E mea pōuri i rāpae. ’Ua hīmene te ’āmuira’a i teie mau parau mātarohia. ’Ua fa’aro’o vau i te reira mau parau e rave rahi taime. Terā rā, te mea ’o te ’ore e mo’e-fa’ahou-hia iā’u, ’o te hō’ē ïa mana’o i te hō’ē ahiahi ta’a ’ē. E ha’afātata te reira iā’u i te Fa’aora. Penei a’e, mai te mea ē, e fa’ahiti atu vau i te mau parau, e ha’amana’o fa’ahou tātou pā’āto’a i te reira :
’Ei iā’u nei, e te Fatu,
Terā mai nei te pō ;
Tē tae mai nei te poiri ;
Mo’e te mahana.
Fa’aea i tō’u fare
Pāruru mai iā’u.
’Ei iā’u nei, e te Fatu,
Terā, mai nei te pō
’Ei iā’u nei, e te Fatu,
Terā mai nei te pō.
’Ei iā’u nei e te Fatu,
Marū tō’u ’ā’au.
Hau atu i te faufa’a o te hō’ē ha’amana’ora’a i te mau ’ohipa i tupu, ’o te ha’amana’ora’a ïa i tō te Vārua Maita’i ha’aputapūra’a i tō tātou ’ā’au nā reira ato’a tāna fa’a’itera’a tāmau i te parau mau. Hau atu i te faufa’a o te ’itera’a tō tātou mata, ’e ’aore rā, te ha’amana’ora’a i te mau parau i parauhia ’e i tāi’ohia, ’o te ha’amana’ora’a ïa i te mau mana’o e ’āpe’e mai i te reo marū o te Vārua. E mea varavara tō’u putapū-roa-ra’a mai nā rātere i ni’a i te ’e’a nō Emausa—mai te ahu marū i roto i tō’u ’ā’au e’ita e nehenehe e hape. Te mea pinepine rā, ’o te hō’ē ïa mana’o nō te māramarama ’e te mana’o pāpū.
’Ua fāri’i tātou i te fafaura’a faufa’a rahi o te Vārua Maita’i ’ei hoa nō tātou, ’e ’ua fāri’i ato’a tātou i te mau arata’ira’a mau e nāhea i te tītau i te reira hōro’a. Nā te tāvini ha’amanahia o te Fatu i fa’ahiti mai i teie mau parau ma te tu’u i tōna rima i ni’a i tō tātou ūpo’o : « ’A fāri’i mai i te Vārua Maita’i ». I tāua taime ra, ’ua pāpū ia ’outou ’e iā’u ato’a ē, e tonohia mai ’oia. Tā tātou rā tītaura’a, ’o te mā’itira’a ïa ’ia ’īriti i tō tātou ’ā’au nō te fāri’i i te aupurura’a a te Vārua i roto i te orara’a tā’āto’a.
Nā te mau ’ohipa i tupu nō te peropheta Iosepha Semita e hōro’a mai i te hō’ē arata’ira’a. ’Ua ha’amata ’oia ’e ’ua tāmau noa ho’i i tāna tāvinira’a ma te fa’aoti ē, e’ita e nava’i tōna iho pa’ari nō te ’ite e aha te haere’a ’ia haere ’oia e ti’a ai. ’Ua mā’iti oia ’ia fa’aha’eha’a i mua i te Atua.
I muri iho, ’ua mā’iti ’o Iosepha e ani i te Atua. ’Ua pure ’oia ma te fa’aro’o ’ia pāhono mai te Atua. ’Ua tae mai te pāhonora’a i te taime e tamaiti ’āpī noa ā ’oia. ’Ua tae mai taua mau poro’i ra i te taime ’a hina’aro ai ’oia ’ia ’ite ē, nāhea te Atua i te ha’amau i tāna ’Ēkālesia. ’Ua tāmāhanahana ’e ’ua arata’i te Vārua Maita’i iāna i roto i tōna orara’a.
’Ua ha’apa’o ’oia i te fa’aurura’a i te taime fifi. ’Ei hi’ora’a, ’ua fāri’i ’oia i te arata’ira’a ia tono i te Tino ’Ahuru ma Piti i Peretāne i te taime ’ua hina’aro mau ’oia ia rātou. ’Ua tono ’oia ia rātou.
’Ua fāri’i ’oia i te fa’atītī’aifarora’a ’e te tāmāhanahana mai ’ō mai i te Vārua ra, i te taime ’a tāpe’ahia ai ’oia i te fare ’auri, ’e ’ua ahoaho roa te feiā mo’a. ’E ’ua ha’apa’o ’oia ’a haere ai ’oia nā ni’a i te purūmu ē tae atu ai i Tarateti (Carthage), noa atu ē, ’ua ’ite ’oia ē, e nehenehe ’oia e pohe.
’Ua fa’a’ite te peropheta Iosepha i te hō’ē hi’ora’a nō tātou nō ni’a i te huru nō te fāri’i-tāmau-ra’a i te arata’ira’a pae vārua ’e i te tāmāhanahana nā roto i te Vārua Maita’i.
Te mā’itira’a mātāmua tāna i rave, ’o te fa’aha’eha’ara’a ïa i mua i te Atua.
Te piti ’o te pure ïa ma te fa’aro’o i te Fatu ia Iesu Mesia.
Te toru ’o te ha’apa’o ti’a mau ïa. E nehenehe te aura’a o te ha’apa’o, ’o te haere-vitiviti-ra’a ïa. E nehenehe te aura’a, ’o te fa’aineinera’a. ’E ’aore rā, e nehenehe ē, ’o te tīa’ira’a ma te fa’a’oroma’i i te tahi atu fa’aurura’a.
’E te maha, ’o te pure ïa nō te ’ite i te mau hina’aro ’e te ’ā’au o vetahi ’ē, e nāhea ’ia tauturu ia rātou, nō te Fatu. ’Ua pure Iosepha nō te feiā mo’a i roto i te ahoaho ’a pārahi ai ’oia i roto i te fare tāpe’ara’a. ’Ua fāna’o vau i te ha’amaita’ira’a ’ia ’ite i te mau peropheta o te Atua ’ia pure, ’ia ani i te fa’aurura’a, ’ia fāri’i i te arata’ira’a, ’e ’ia ’ohipa ’ia au i te reira.
’Ua ite au i tā rātou mau pure pinepine nō ni’a i te mau ta’ata tā rātou i here ’e e tāvini nei. E au ē, nā te māna’ona’ora’a rātou ia vetahi ’ē e ’īriti i tō rātou ’ā’au nō te fāri’i i te fa’aurura’a. E nehenehe ato’a te reira e tupu nō ’outou.
Nā te fa’aurura’a e tauturu ia tātou ’ia aupuru ia vetahi ’ē, nō te Fatu. ’Ua ite a’enei ’outou i te reira i roto i te mau ’ohipa i tupu nō ’outou ; mai iā’u ato’a nei. I te hō’ē taime ’ua parau mai tō’u ’episekōpo iā’u—i te hō’ē taime tei roto ta’u vahine i te hepohepo rahi o tōna orara’a—« I te mau taime ato’a e fa’aro’o vau i te hō’ē ta’ata i roto i te pāroisa e hina’aro ra i te tauturu, ’ia tae ana’e au i reira nō te tauturu, e ite au ē, ’ua nā mua atu tā ’oe vahine iā’u. E mea nāhea ’oia e nā reira ai ? »
Mai te mau ta’ata ato’a ’oia tei riro ’ei mau ta’ata aupuru rahi i roto i te bāsileia o te Fatu. Mai te huru ra ē, tē vai ra e piti ’ohipa tā rātou e rave. ’Ua ti’a i te mau ta’ata aupuru rahi ’ia fāri’i i te Vārua Maita’i fātata ’ei hoa tāmau. ’E ’ua ti’a ia rātou ’ia fāri’i i te hōro’a o te aroha, ’oia te here mau o te Mesia. ’Ua tupu teie mau hōro’a i roto ia rātou nā roto i tō rātou fa’a’ohipara’a i te reira i roto i te tāvinira’a i te ta’ata ma te here, nō te Fatu.
Te huru nō te ’ohipa-’āmui-ra’a te pure, te fa’aurura’a ’e te here o te Fatu i roto i tā tātou tāvinira’a, ’ua fa’ata’a-maita’i-hia ïa, i tō’u mana’o, i roto i teie mau parau :
« ’O tā ’outou i ani ma tō’u ra i’oa, nā’u ïa e rave.
« ’Ua hina’aro ’outou iā’u ra, e ha’apa’o i ta’u parau.
« Nā’u ho’i e ani atu i te Metua ra, e nāna e hōro’a mai i te tahi Fa’aa’o ia ’outou, ’ia pārahi mau ’oia ē a muri noa atu i’ō ’outou nei ;
« ’O te Vārua parau mau ra, ’o te ’ore e fāri’ihia mai e te ao nei ra, nō te mea ’aore i hi’o iāna, ’aore ho’i i ’ite iāna, e ’ite rā ’outou iāna, e pārahi mau ho’i ’oia i’ō ’outou nei, ’e ’ei roto ho’i ia ’outou.
« E’ita vau e vaiiho ’ōtare noa ia ’outou, e ho’i mai ā vau ia ’outou nei.
« ’E ’ia ro’ovau iti a’e, e ’ore tō te ao e hi’o fa’ahou mai iā’u ; e hi’o mai rā ’outou iā’u ; nō te mea e ora vau, e ora ato’a ho’i ’outou.
« ’Ia tae i te reira mahana e ’ite ai ’outou ē, tei roto ho’i au i ta’u Metua, ’e tei roto ho’i ’outou iā’u ’e tei roto vau ia ’outou.
« Tei iāna ta’u ra parau ’e ’ua ha’apa’o ’oia i taua parau ra, ’oia tei hina’aro mai iā’u ; ’e tei hina’aro mai iā’u ra, e herehia mai ’oia e ta’u Metua ra ; ’e e here ho’i au iāna, ’e e fa’a’ite atu ho’i au iāna iā’u iho » (Ioane 14:14-21).
Tē fa’a’ite atu nei au i tō’u iho ’itera’a pāpū ē, i teie taime, tē ite mai ra te Metua ia ’outou, i tō ’outou mau mana’o, ’e i te mau hina’aro pae vārua ’e pae tino o te mau ta’ata ato’a ’ati a’e ia ’outou. Tē fa’a’ite pāpū nei au ē, tē tono mai nei te Metua ’e te Tamaiti i te Vārua Maita’i i te feiā ato’a tei fāri’i i te reira hōro’a, ’o tē ani i te reira ha’amaita’ira’a, ’e ’o tē ’imi ’ia ti’amā nō te reira. E ’ore roa te Metua, ’e tae noa atu i te Tamaiti, ’e tae noa atu i te Vārua Maita’i, e fa’ahepo ia rātou iho i roto i tō ’outou orara’a. E ti’amāra’a tō tātou ’ia mā’iti. I parau mai te Fatu i te mau ta’ata ato’a ē :
« Inaha, tē ti’a noa nei au i te ’ūputa, tē pātōtō atu nei : ’ia fa’aro’o mai te hō’ē ta’ata i ta’u reo, ’e ’ua ’īriti i te ’ōpani ra, e haere atu vau i roto iāna ra.
« ’O te riro iāna te rē ra, e ha’apārahi au iāna iā’u nei i ni’a i to’u nei terōno, mai tei riro ato’a mai te rē iā’u ra, ’e tē pārahi nei au ’e ta’u Metua ato’a i ni’a iho i tōna ra terōno ».
« E tari’a tōna ra, ’a fa’aro’o ’oia i tā te Vārua e parau » (Apokalupo 3:20-22).
Tē pure nei au ma tō’u ’ā’au ato’a ’ia fa’aro’o ’outou i te reo o te Vārua, ’o tei tonohia atu ia ’outou na, ma te ’ā’au hōro’a noa. ’E tē pure nei au ’ia ’īriti noa ’outou i tō ’outou ’ā’au i te mau taime ato’a nō te fāri’i iāna. Mai te mea ē, e ani ’outou i te fa’aurura’a, ma te mana’o tae mau, e ma te fa’aro’o ia Iesu Mesia, e fāri’i ïa ’outou i te reira mai te au i te fa’anahora’a a te Fatu ’e i tōna ra taime. ’Ua nā reira te Atua nō te tamaiti ’āpī ra ’o Iosepha Semita. Tē rave nei ’oia i te reira i teie mahana nō tō tātou peropheta ora, te peresideni Russell M. Nelson. ’Ua tu’u ’oia ia ’outou i ni’a i te ’ē’a o te tahi atu mau tamari’i a te Atua nō tē tāvini ia rātou nōna. ’Ua ite au i te reira, ’eiaha nā roto noa i te mea tā tō’u mata i ’ite, e mea pūai atu rā, ’oia ho’i, nā roto i te mea tā te Vārua i muhumuhu mai i tō’u ’ā’au.
’Ua putapū vau i te here o te Metua ’e o tāna Tamaiti here nō te mau tamari’i ato’a a te Atua i roto i te ao nei, ’e nō tāna mau tamari’i i roto i te ao vārua. ’Ua fāri’i au i te tāmāhanahana ’e te arata’ira’a a te Vārua Maita’i. Tē pure nei au ia roa’a ia ’outou te ’oa’oa nō te fāri’ira’a i te Vārua ’ei hoa tāmau noa nō ’outou. I te i’oa o Iesu Mesia, ’āmene.