Elder Mathias Held

Hitu ’Ahuru Hui mana fa’atere rahi

E ti’a ia Elder Mathias Held rāua tāna vahine, ’o Irene, ’ia fa’ahōho’a i te purarara’a te ’Ēkālesia nā te ao ato’a nei. Rāua to’opiti nō Colombia ma te tupuna nō Heremani mai. Nā roto i tā rāua ’ohipa ’e te ha’api’ira’a, ’ua haere rāua mai tō rāua ’āi’a ra i Amerika Apato’a i Canada, i Germany, i Guatemala, i Beresiria ē ’ua ho’i mai i Colombia. I roto i terā nā fenua tāta’itahi, ’ua ha’amātau rāua i te reo ’e te ta’ere.

« Hō’ē ā rā ’Ēkālesia noa atu te vāhi ’ua haere māua », ’ua parau Elder Held, tei pāturuhia ’ei Hitu ’Ahuru Hui mana fa’atere rahi i te 31 nō Māti 2018.

’Ua riro terā huru « hō’ē ā » i te tūtau nō rāua ’a ha’api’i ai rāua i tā rāua nā tamari’i e toru ’e ’a pa’ari ai i roto i te ’evanelia.

’Ua haere ’o Held mā i te hō’ē fare ha’api’ira’a reo purutia i tō rāua ’oire nō Bogotá, Colombia. ’Ua tā’atihia rāua i te 13 nō Tiunu 1989, i te hiero nō Frankfort (Heremani) i muri iho tō Mathias noa’ara’a te parau tū’ite ’ihi mātini i Bogotá ’e te parau tū’ite Master nō te fa’aterera’a faufa’a i Canada.

Ē nō te ’ohipa, ’ua fa’anu’u teie nā ta’ata fa’aipoipo ’āpī i Hanover (Heremani), i reira tō te tuahine Held fāri’ira’a i te mana’o pūai ē, e taui roa tō rāua orara’a.

« ’Ua nā ’ō atu vau ia Mathias ē, e fāri’i māua i te hō’ē poro’i nā te ra’i mai », tē nā reira ra ’oia. ’Ua tae mai taua poro’i ra a te ra’i i te hō’ē avatea i te matahiti 1987, nā roto i te hō’ē pātōtōra’a i te ’ōpani. I muri i te ’ōpani, ’o te mau misiōnare momoni ïa paraparau reo heremani ma te tahi ta’ira’a reo marite.

Nā ’āva’e 10 i muri mai, ’ua tuatāpapa ’o Held mā nā muri i te mau misiōnare ’e ’ua fa’ahoa i te ’āmuira’a o te ’Ēkālesia i reira. ’Ua pure rahi rāua ē ’ua noa’a mai tā rāua ha’apāpūra’a a te Vārua nō te parau mau o te ’evanelia, ’e ’ua bāpetizohia rāua i te matahiti 1988.

E 25 matahiti te maoro tō Elder Held ’ohipara’a nō te taiete hāmani pere’o’o ra Daimler-Benz, tei fa’ahaere iāna nā te ao ato’a nei. ’Ua tūru’i noa Held mā i ni’a i te Fatu i te mau vāhi ato’a ’ua haere rātou.

« ’Aita e fifi te tāmatara’a e fa’aruru atu ’outou », ’ua parau ’oia. « ’Ia paraparau ’outou i tō te ra’i, ’aita e fifi nō ’outou. »

’Ua fānauhia ’oia i te 5 nō Tiunu 1960, nā Michael ’e Elisabeth Held, ’ua tāvini Elder Held ’ei tauturu i roto i te peresidenira’a titi, ’ei tauturu i roto i te ’episekōpora’a ’e ’ei Hitu ’Ahuru ārea i roto i te ārea nō Amerika Apato’a, te pae apato’erau tō’o’a o te rā.