E hitu hiero ’āpī i fa’aarahia

E patuhia te hō’ē hiero i Salta (Rāparata) ; i Bengaluru (Inidia) ; i Managua (Nicaragua) ; i Cagayan de Oro (Philipino) ; i Layton (Utaha) ; i Richmond (Virginia) ; ’e i roto i te hō’ē ’oire rahi nō Rusia e fa’a’itehia atu, ’ua fa’aara te peresideni Russell M. Nelson i te pae hope’a o te tuha’a purera’a nō te avatea sābati o te ’āmuira’a rahi.

Nā mua a’e i te ’āmuira’a, ’ua fa’aara mai te Peresidenira’a Mātāmua ē, e ha’amo’ahia te hiero nō Roma (’Ītālia) i te 10 nō Māti 2019 ē tae roa atu i te 17 nō Māti 2019. ’Ua pūhara ato’a te ’Ēkālesia i te hō’ē hōho’a pāpa’i nō te hiero nō Bangkok (Tairane).

I te ’āva’e ’Ātopa 2017 ra, ’ua hurihua te ope repo mātāmua nō te hiero nō Port-au-Prince (Haiti) ; ’ua ha’amo’ahia te hiero nō Meridian (Idaho) i te ’āva’e Novema 2017 ’e ’ua ha’amo’ahia te hiero nō Cedar City (Utah, Marite) i te ’āva’e Tītema 2017.

E piti hiero fātata i te ha’amo’a-fa’ahou-hia : te hiero nō Houston (Texas) o te 22 nō ’Ēperēra 2018, i muri iho i te mau tātā’ira’a i tupu nō te pape pu’e ; ’e te hiero nō Jordan River (Utah), i te 20 nō Mē 2018, i muri iho i te tahi fa’a’āpīra’a. E piti fa’ahou hiero tē ha’amo’ahia i te pae hope’a o teie matahiti : te hiero nō Concepción (Tīreni), i te 28 nō ’Ātopa 2018 ; ’e te hiero nō Barranquilla (Colombia), i te 9 nō Tītema 2018.

E ’ōpani te hiero nō Hamilton (Aotearoa) i te ’āva’e nō Tiurai 2018 nō te tahi fa’a’āpīra’a rahi ’e e ha’amo’a-fa’ahou-hia atu i te matahiti 2021.

Tē vai nei 159 hiero e ’ohipa nei nā te ao nei, ’e tē vai ra e 30 hiero i fa’aarahia ’e ’aore rā, tē patuhia ra.