Te tūra’ira’a i te parau nō te aupurura’a

E fa’a’orehia te hāhaerera’a ’utuāfare ’e te hāhaerera’a a te mau vahine, ’ua fa’aara mai te peresideni Russell M. Nelson i roto i te tuha’a purera’a nō te avatea sābati o te ’āmuira’a rahi. E riro te « Aupurura’a », e « arata’ira’a ’āpī ’e te mo’a a’e » nō te ha’apa’o i te ta’ata mai te Mesia te huru, i te fa’afāna’o i te hō’ē tauto’ora’a nahonaho maita’i nō te pāhono i te mau hina’aro pae vārua ’e pae tino o te mau melo.

’Ua paraparau ato’a mai te tuahine Jean B. Bingham, te peresideni rahi o te Sōtaiete Tauturu, nā reira ato’a ’o Elder Jeffrey R. Holland nō te pupu nō te Tino ’Ahuru Ma Piti ’āpōsetolo, nō ni’a i te huru teie arata’ira’a ’āpī e fa’arōtahi maita’i a’e i te mau tauto’ora’a a te mau pupu autahu’ara’a a Melehizedeka ’e a te Sōtaiete Tauturu i ni’a i te aupurura’a mai tā te Fa’aora i rave (hi’o i te mau ’api 101 ’e 104).

I teienei, e nehenehe te mau Roti ’e te mau Tarona e tāvini ’ei ’āpiti aupuru nō te mau tuahine o te Sōtaiete Tauturu. Pauroa te toru ’āva’e, e ’āpo’o te mau taea’e ’e te mau tuahine aupuru ’e tō rātou feiā fa’atere nō ni’a i te mau hina’aro ’e te mau pūai o rātou tei fa’atahia nā rātou. ’O te rahira’a uiuira’a noa a te feiā fa’atere i roto i te toru ’āva’e te nūmera e tu’uhia i roto i te parau fa’a’ite. E mea faufa’a te fārerei-tino-ra’a i te ta’ata mai te peu e nehenehe, ’aita rā te aupurura’a e ha’amau nei i te hō’ē rāve’a ta’a ’ē nō te fārerei i te ta’ata i te mau ’āva’e ato’a.

« E ti’a i te feiā ’āpī ’ia fa’a’ite i tā rātou mau hōro’a hō’ē roa ’e e pa’ari mai rātou i te pae vārua ’ia ’āpe’e rātou i te feiā pa’ari i roto i te ’ohipa nō te fa’aorara’a », ’ua parau te tuahine Bingham. E riro ato’a te fa’aōra’a i te feiā ’āpī i te ha’amara’a i te nūmera melo e ha’apa’o i te tahi ’e te tahi ma te tauturu i te feiā ’āpī « ’ia fa’aineine maita’i a’e nō te amora’a i tō rātou mau ti’ara’a ’ei fa’atere i roto i te ’Ēkālesia ’e te ’oire, ’e ’ei āpiti turu i roto i tō rātou mau ’utuāfare. »

« Nō mātou nei i te pū fa’atere o te ’Ēkālesia, ’aita e faufa’a ’ia ’ite nāhea ’aore rā i hea ’aore rā ahea ’outou i te fārereira’a i tō ’outou mau ta’ata », tē parau nei Elder Holland ; « ’ua hina’aro noa mātou ’ia ’ite ’e ’ia ha’apāpū ē, tē rave nei ’outou i te reira ’e tē ha’amaita’i nei ’outou i te mau ta’ata i te mau rāve’a ato’a e noa’a ia ’outou.

Mai tei pāpa’ihia i roto i te rata a te Peresidenira’a Mātāmua, e tītauhia paha te tahi taime nō te fa’atupura’a i te mau tauira’a nō te aupurura’a, e ti’a rā ’ia fa’anaho-’oi’oi-hia te reira. Tē vai fa’ahou ra te tahi ha’amāramaramara’a i ni’a ia Ministering.lds.org, mai te mau uira’a ui-pinepine-hia. E tu’uhia atu te tahi mau video arata’ira’a ’e te tahi ato’a mau mātēria i ni’a i te tahu’a natirara i te mau hepetoma i muri nei.

Ha’amata i te ’āva’e Tiunu, e tu’uhia i roto i te Liahona te hō’ē tuha’a e parauhia « Parau tumu nō te aupurura’a », nō te tauturu i te mau melo ’ia māramarama nāhea i te riro rahi atu ā mai te Mesia te huru i roto i te aupura’a te tahi i te tahi.