Elder Steven R. Bangerter

Hitu ’Ahuru Hui mana fa’atere rahi

I roto i te hō’ē tere pūhapara’a i tōna ’āpīra’a, ’ua pa’uma Elder Steven R. Bangerter ’e tōna ’utuāfare i te hō’ē mou’a nā ni’a i te moto cross. I te poura’a mai rātou, ’ua mo’e iāna tōna purūmu ’e ’ua ātea roa te tahi mau pu’era’a.

I te tūturira’a ’oia i terā avatea nō te tāparu i te Metua i te Ra’i i te tauturu, ’ua ’ite ’oia i roto i tōna ferurira’a i te purūmu tei mo’e iāna. Tē ha’amata ra ’oia i te pou, « tae mai nei tō’u taea’e i teie vāhi i ni’a nā ni’a i tōna moto, ’ua tauahi mai iā’u ’e ’ua arata’i iā’u i raro nā roto i te pōiri i te pūhapara’a, tau hora te ātea. »

’O te hō’ē noa ’ohipa teie i roto i tōna ’āpīra’a tei ha’aputapū iāna i te here. « ’Aita hō’ē a’e taime i roto i tō’u orara’a tō’u uiuira’a iā’u ē, tē here ra ānei te ta’ata iā’u, tē ha’apa’o mai ra ānei iā’u », ’ua parau Elder Bangerter.

’Ua fānauhia Elder Bangerter i Roto Miti, i Utaha (Marite) nā Max E. ’e Thelma R. Bangerter, i te 29 nō Tiurai 1961. ’Ua pa’ari ’oia i Granger (Utaha).

Ma’a hepetoma noa ’oia i te ho’ira’a mai tāna misiōni nō Canada Vancouver, tō Elder Bangerter mātaura’a ia Susann Alexis Hughes. I tā rāua arapaera’a mātāmua, ’ua mana’o ’oia ē, tē vai ra te hō’ē hia’ai ha’eha’a i roto i terā tamāhine ’e ’ua ani atu ’oia ’ia fa’aipoipo i te pitira’a o te arapaera’a. ’Ua tā’atihia rāua i roto i te hiero nō Roto Miti, i te 17 nō Māti 1983. E ono tamāroa tā rāua.

’Ua noa’a tā Elder Bangerter parau tū’ite Licence i te fare ha’api’ira’a Arizona State University i te pae nō te tuatāpapa ha’apa’ora’a fa’aro’o ’e tae noa atu i te hō’ē parau tū’ite nō te ture i te fare ha’api’ira’a Western State University College of Law. I nā matahiti 25 i ma’iri, ’ua ti’a atu Elder Bangerter nō te mau ’ēkālesia ’e te mau fa’anahora’a pae fa’aro’o i California Apato’a ’e Utah Apato’a. ’Ua ’āpiti ’oia i te mau fa’anahora’a ture mai ia Cooksey, Toolen, Gage, Duffy ’e Woog mai te matahiti 1993 i te matahiti 2003 ’e ’ua riro mai ’ei ’āpiti fa’atere nō Bangerter, Frazier ’e Graff i te matahiti 2004.

’Ua tāvini Elder Bangerter ’ei Hitu ’Ahuru ārea, ’ei peresideni titi, ’ei tauturu i roto i te peresideni titi, ’ei ’episekōpo, ’ei peresideni pupu peresibutero ’e ’ei peresideni Feiā ’Āpī Tamāroa.