Bonnie H. Cordon
Beretitenti ni Kabuta n te Bootaki n Ataeinaine
Mamaten nanon Titita Bonnie H. Cordon n Koroboki aika a tabu e kuneaki n Reirei ao Berita aika Tabu 123:17: “Ti riai ni kukurei ni karaoi bwaai ni kabane aika a wene ni mwaakara; ao ngkanne ti aonga ni bon tei naba, ma te koaua ae korakora, n noora ana kamaiu te Atua, ao ibukin baina bwa e na kaotaki.”
Te kibu aei e riki irouna bwa kabwarabwaran reirei are e a kaman reiakinii inanon maiuna. “Ti kona ni karaoi mwakuri aika matoatoa, ma ti kona ni karaoi naba ma te aro ni kukurei,” e taku Titita Cordon, are e kamatoaki n Maati 31, 2018, bwa te Beretitenti ni Kabuta ae e boou n Ataeinaine.
Te atatai anne e waekoa n reiakinna inanon “kukureina n ataei” n tain mwakurina n te onaroka ae e uarereke i Idaho Maiakimainiku ao ngke e kekeiaki ni reiakinna te taetae ae boou n ana tai ni mitinare i Botukare. Bon te rongorongo naba are e a manga kaokiokia ni katoatai nakoia mitinare ngke e makuri ma kainnabana ngke kainnabana e tararuaa aon Brazil Curitiba Mition. Ao bon anne naba are e a tia n iangoia bwa e na tibwauaia ma ataeinaine ni kabutaa te aonaaba.
N tai aikai ataeinaine, e taku, a tia n tuangaki bwa a na wakirake ao ni kabuta ana mwakuri te Uea nako mooa. “Ao ti kona ni karaoia,” e reitia.
E bungiaki Bonnie Hillam Cordon n Maati 11, 1964, irouia Harold ao Carol Rasmussen Hillam i Idaho Falls, Idaho, USA. Imwin ana mition e karekea ana beeba ae te batiratikuri n te reirei i Brigham Young University, te tabo are e kaitibo iai ma Derek Lane Cordo. A mareaki n Eberi 4, 1973, n te Tembora i Salt Lake City. Iai aman natiia ao aman tibuia mwane.
Maiuna ni mwakuri n te Ekaretia e a tia n riki bwa te tia kairiri n te netiuri ao te tia reirei n te tieminari. Imwain weteana uoua te ririki nako bwa te kauntira n te Beretitentii ni kabuta n te Moanrinan, Titita Cordon e tangiria ni beku bwa te beretitenti irouia ataeinaine n te titeiki. Imwin kamotirawanna man te wewete anne, “E bon aki toki arou n tataro ibukia ataeinaine,” e taku.
Te rongorongo ae e ingainga ni kan tibwaia ma ataeinaine n te aonaaba bwa e tangiriia ao ae e kakawaki riki, bwa e tangiriia te Atua.