Rongorongon te Utu: Kakaea, Ikotia, Tomaia

Tembora n te tabo ao rongorongon te utu kantiaotanti a kona n buokiia kain te Ekaretia ao tabeman ni karekea te kukurei are e roko man kakaean, ikoikotan, ao tomakiia ma aia bakatibu, ni kaineti ma Unimwaane Bradley D. Foster, Mataniwi ni Kabuta n te Itingaun ao Tarekita n Ana Tabo ni Mwakuri Rongorongon te Utu.

Ni kabane iai aia karaki man rongorongon aia utu. Ao bwaai aika tamaroa a kona n riki ngkana ko waakina am kakae iaon kakaeaia.

“Ara kabwarabwara ibukin ririki aika a na roko bon buokaia kantiaotanti n noora tabeia ni buokakiia membwa ni karekea te taneia aei,” e taku Unimwaane Foster. “Ti karaoa anne teuana imwiin teuana. Ti kawariia [aomata] n tabo ake a mena iai, ma katuruturuana iaoia naake a nang koro 12 ao naake a boou ake a tibwa rairaki.” Kurubu akana uoua akanne a waekoa ni buokaki n nooran aron te mwakuri n te tembora ni kakorakoraia utu ni karokoa akea tokina, ao n angiin te tai a unga ni karaoia ibuakoia raraoia ma aia utu.

Riki naake tiaki kain te Ekaretia a kona ni karekea te taneiai ni kakaea-ikotia-tomaia rinanon te ibuobuoki temanna nakon temanna man tienta n rongorongon te utu ae raka iaon 5,000 n te aonaaba.