Tutu Atu—Ia Faamaoni

Saunia e Elder K. Brett Nattress

Fesoasoani Lua, Au Peresitene o le Eria a le Pasefika

A o o’u tamaitiiti, sa ou fiafia e faitau aafiaga o a tatou perofeta e siitia ai le faatuatua a o latou laiti. O se tasi o aafiaga ou te fiafia lava i ai e sau mai le soifuaga o Peresitene Iosefa F. Samita, le Peresitene lona ono o le Ekalesia: Sa ola a’e Iosefa F. Samita i totonu o se aiga sa na’o le tasi le matua. O lona tama, o Ailama, sa maliu faamaturo i le Falepuipui o Karefasi faatasi ma le Perofeta o Iosefa Samita. O le taulealea o Iosefa F. sa na o le ono ona tausaga i lea taimi.

I ni tausaga mulimuli ane, i le 19 o ona tausaga, sa toefoi atu ai Iosefa F. Samita i le aiga mai se misiona faatasi ma se vaega o isi faifeautalai. O lana faigamalaga i le taavale toso na oso atu i se nofoaga matautia na i ai fili o le Ekalesia na tauto latou te fasiotia tagata Mamona.

Ou te ta’ua nei se upusii mai se talaaga o le soifuaga o Peresitene Samita:

“I se tasi aso i le mavae ai ona tolauapi taavale toso . . . , sa tietie atu se vaega o tamaloloa onanā i le tolauapiga i solofanua, sa upuleaga ma laulauvavale ma taufaamatau atu e fasioti soo se ‘Mamona’ latou te tau i ai. . . . Ina ua faalogo atu nisi o uso ua latou o mai sa latou o atu ma le faaeteete i se lafitaga i lalo i le alia, ia le iloa atu ai. . . . Sa fai si mamao ese o Iosefa F. mai le tolauapiga ona sa alu e tae fafie mo le afi i le taimi na oo atu ai nei tamaloloa. Ina ua ia vaaia i latou, sa ia faapea, sa mafaufau muamua lava e fai le mea na faia e isi uso, ma saili atu se malutaga i laau ma sola ese ai. Ona oo mai lea o se manatu ia te ia, ‘Aisea ou te sola ai fua mai nei alii?’ Faatasi ai ma lena mafaufauga sa ia savali atu ai ma le lototoa ma avega fafie na afisi i le afi o le tolauapiga. A o tau tuu atu i lalo ana fafie, sa folafola mai e se tasi o tagata faatupu vevesi, sa uu ana fana ma ta’i mai i le Faifeautalai talavou, ma upuleaga mai e pei ona faia e se tagata onā, ma fai mai o lona tiute o le tafiesea o soo se ‘Mamona’ na te fetaui i ai, ma ’e’ē mai i se leo ita, ‘O oe o se Mamona?’”

“Sa aunoa ma le faatuai ma pulato’a atu i le tagata faatupu vevesi, sa tali atu ai ma le lototoa Iosefa F. Samita, ‘Ioe, alii; mausali ma mautu; tuuto faamaoni, ma le atoatoa.’

“Sa tuu atu le tali ma le lototoa ma sa aunoa ma se faailoga o se fefe, lea sa aveesea atoa ai le fana a le tamaloa taufaamatau, ma i lona le mautonu, sa ia u’u mai le lima o le faifeautalai ma fai atu i ai: ‘Ia, o oe—o se alii sili ona fiafia ua ou fetaui ai! Alii talavou, gatete, ua ou fiafia e vaai i se alii e tu atu mo ona talitonuga maumaututu.’

“Sa saunoa Iosefa F. [Samita] i ni tausaga mulimuli ane sa ia faamoemoeina atoa e talia le pa o le fana a le tamaloa, ae sa ia le mafai ona faia se isi auala e ui sa foliga mai o le oti lona taunuuga.”¹

O lenei faatinoga maoae o le lototele sa avea ma se uunaiga ia te a’u i le tele o tausaga. Sa le’i fefe Iosefa F. Samita e tu atu ma ia faamaoni—“faamaoni i le faatuatua [na] faamemelo i ai [ona] matua” ma le “faamaoni i le faatuatua na maliliu ai maturo.”² Ioe, o lona tama o Ailama, o se tasi o na maturo.

Iloaina Po o Ai i Tatou

O lo tatou tofotofoga o le faatuatua i lenei olaga atonu e le o le puipuia o o tatou talitonuga maumaututu a o siōa atu i le fana a se tagata leaga. Ae foliga mai, o le ola ai i le talalelei i talitonuga maumaututu pe a i ai le tele o mea faalavefau ma auala faatosina e leai se taunuuga. E manaomia ona tatou iloa ma le mautinoa, e pei ona iloa e Peresitene Samita, po o ai i tatou ma pe aisea ua tatou i ai iinei.

E tele lava ina faamanatu mai e lo tatou perofeta pele o Peresitene Russell M. Nelson ia i tatou po o ai i tatou. Sa ia saunoa: “O i tatou o fanau a le Atua. O lo tatou gafatia e le faatapulaaina. O lo tatou tofi e paia. Tau ina ia tatou faamamaluina e le aunoa lena tofi—i mafaufauga uma ma galuega.”³

O Atalii o Mosaea

Sa faamanatu atu i atalii o Mosaea e se agelu, i se auala mautinoa, e uiga i le fuafuaga sili o le fiafia a le Atua. O lo latou liua ma auaunaga na sosoo ai i le malo o le Atua e musuiaina. Latou te tutu o ni faataitaiga mamana o le faatoilaloina, salamo, auauna atu ma le faamanuiaina. “O i latou o ni alii mafaufau lelei”⁴ o e na iloa le auala e tatala ai pupuni o le lagi. Ma o a ki i lo latou manuia faaleagaga? Faafofoga i lenei faamatalaga mai le Alema 17:

“Sa latou suesue i tusitusiga paia ma le filiga.”

“Sa latou tuu atu i latou i le tatalo tele, ma le anapogi.”

“Ma a latou aoao atu”—Ou te fia faaopoopo atu, a latou auauna atu—sa latou faia lava “[i] le mana ma le pule [a] le Atua.”⁵

O se mamanu sili lea mo i tatou e mulimuli ai. Tau lava ina fai o ni mea se tolu i aso taitasi:

Faitau ia tusitusiga paia (ou te fia fautua atu, ia patino lava le faitauina o le Tusi a Mamona).
Tatalo faaletagata lava ia ma o ni aiga.
Saili se tasi e auauna i ai. Fai se eseesega lelei i le olaga o se isi tagata. E anoanoai auala e fai ai lenei mea—o se faatinoga o le agalelei, o se upu lelei, e oo i se ataata e mafai lava ona faamalamalama ai le aso o se tasi.

O nei fuataga faigofie, a faia i aso taitasi, o le a fesoasoani ia i tatou e tumau ai i le ala o feagaiga.

A tatou faia nei mea faigofie, o le a faamalosia i tatou i o tatou manaoga e ulu atu i le maota o le Alii. O le a faamalamalamaina faaleagaga i tatou a o tatou aai ma feinu i le faamanatuga i vaiaso taitasi. O le a avea i tatou ma soo tuuto o Iesu Keriso. O le a avea i tatou ma ē tausi feagaiga.

Ia tatou tauivi i aso taitasi e manatua o i tatou o atalii ma afafine o le Atua ma ia tatou “Manatua pea o Ia.”