O Meaalofa Faaleagaga ma le Filifilia o se Galuega

Judy Soloai

Na ou mauaina la’u misiona o le olaga ao auauna atu i le Alii i se misiona.

Ou te lei maua ni togi lelei i le aoga maualuga. O le tuputupu ae e tele lava ina faamamafa mai e o’u matua le mana o i ai i le aotauina i le suia ai o o tatou olaga mo le lelei sili atu ae peitai, ou te lei manatu mamafa i ai.

Ou te sau mai se aiga toatele e toalima tamaiti; lua tama ma teine e toatolu. Sa aoaoina uma i matou ia avea le aotauina ma se faamuamua. Sa ou auai i ni nai aoga eseese i Hamilitone ma Aukilani ae sa le mafai ona maua le vaaiga mamao.

Sa ou alu i se misiona faafaifeautalai ma se fuafuaga e aoga pe a ou foi mai i le fale. Sa ou manao e mulimuli i le fautuaga a perofeta, ae e lei i ai sa’u fuafuaga i le mea e tatau ona ou suesueina ma e lei i ai se faanaunauga moni mo soo se galuega.

Sa suia e le misiona lo’u olaga. E leai se aso ou te le mafaufau ai e uiga i la’u misiona ma le aafiaga na faia i lo’u olaga. Pe ana ou lei faalogoina le olioli matautia o le faaaluina o aso uma i le auauna atu i le anoano o fanau a le Atua semanu ou te le iloaina lo’u manaomiaina tele o lenei mea, ma sa ou iloaina ai ni meaalofa faaleagaga ou te lei iloaina muamua ia te a’u lava ia. Na fai mai tagata ia te a’u o loo ia te a’u le meaalofa o le fesootai ma tagata. O o’u uiga faamasani sa faigofie ai ona ou masani i tagata. Na ou taumafai e opogi nei meaalofa faaleagaga ma faaaogaina i latou e faasoa atu ai le talalelei a Iesu Keriso.

Sa ou vaaia i la’u misiona le tele o tulaga faanoanoa o le ola ai, e aofia ai ni aiga puapuagatia, tagata o loo mafatia i faanoanoaga ma isi o i ai aafiaga o mausa mo fualaau faasaina. I le avea ai ma se faifeautalai sa mafai ona ou fefautuaai ma i latou e faaaoga ai tusitusiga paia, ma sa ou vaai i le talalelei ua faamanuia ai o latou olaga ao latou taumafai i le mea sili latou te mafaia e faaaoga mea sa latou aoaoina. E ui na ou fiafia e faasoa atu le talalelei ma i latou sa ou manao e faia nisi mea e sili atu.

O le toatele o tagata sa ou auauna atu i ai o le tele foi lea o lo’u vaaia o i latou e ala atu i fofoga o le Tama Faalelagi. Na iu lava ina ou mauaina se alofa le faatuaoia ma le tigaalofa. Na ou iloaina o le mea sa faafiafiaina ai a’u o le auauna atu, o tagata. O le mea lenei ou te manao e fai i lo’u olaga.

E i ai se tulaga tutusa i le va o le avea ma se faifeautalai ma le avea ma se tagata faigaluega faaagafesootai. O le faamoemoega o vaega uma e lua o le suia lea o olaga mo le lelei. O le avea ai ma se tagata o Le Ekalesia a Iesu Keriso o le Au Paia o Aso e Gata Ai, ua faamanuiaina ai a’u i se malamalamaaga e uiga i le Togiola o Iesu Keriso. Ou te matuai talitonu e mafai ona suia ia tagata, ma i le faia o se matata i le fesoasoani i tagata ina ia suia o se faamanuiaga tele ia te a’u.

I le taimi nei ua ou fiafia lava i a’u suesuega. O loo ou aoga nei mo se faailoga o le Tagata Malaga i Galuega Faaagafesootai i BYU. Ou te matua naunau lava i le mea o loo ou aoaoina ma galue ma le malosi ou te mafai ai. O le toatele o o’u uso ma tuafafine ua oo atu i aoga maualuluga ma ua vaaia uma na faamanuiaga lea na aoaoina ai e o matou matua i matou o le a oo mai pe a matou mulimuli ia la’ua apoapoaiga.

Ao o’u suesue mo la’u faailoga, sa i ai lava iina ia aoaoga faavae o le talalelei mo a’u, faateleina ai le malamalama o le poto salalau faalelalolagi ma faaleleia o’u tomai ia avea ai ma se tagata faigaluega faaagafesootai.

Ao o’u laitiiti, ou te vaai i le taua o le i ai o se faamoemoega po o se misiona i le olaga. E i ai se faamoemoega a le Alii mo a’u ma sa ou iloaina ao ou i ai i la’u misiona. Ou te lei alu i se misiona e saili ai a’u lava. Na ou alu e faasoa atu le talalelei i tagata e toatele e mafai ona ou faasoa atu i ai, ae o lo’u faaleiloaina o a’u lava i le galuega a le Alii na ou maua ai a’u lava ma lo’u faamoemoega.