Digital Lamang: Batan-ong mga Hamtong
Giunsa Nako Pagkat-on Unsay Buhaton Kon ang Usa ka Tawo Moangkon nga Sila Nakigbisog sa Pornograpiya
Ang tagsulat nagpuyo sa Utah, USA.
Akong nahibaloan sulod sa pipila ka mga bulan nga adunay nahitabo, apan niini lang higayona nga ang akong amiga misulti kanako sa tinuod: nakigbisog siya sa pornograpiya sulod sa mga katuigan, sa tibuok gayud nga panahon nga nakaila nako siya.
Samtang naglingkod sa sakyanan nga naminaw sa iyang pagkompisal, ako mapasalamaton. Ayaw saypa sa pagsabot—sakit kaayo nga mahibaloan nga sa taas nga panahon nakigbisog siya nga wala gayud ako masayud—apan nalipay ko nga nasabtan na nako unsaon pagtubag uban sa gugma imbis sa paghukom.
Ang Pagkadili Mabination Dili Gayud Makatarunganon
Usahay ang kahibalo nga dautan ang pornograpiya makaimpluwensya sa atong panghunahuna sa uban. Nasayud ko nga kana nga kahibalo nakaimpluwensya sa akong panglantaw sa usa ka higayon. Niadtong batan-on pa ko, nakadungog ko og mga tawo nga nakigbisog sa pornograpiya ug ang akong reaksyon mao ang kasuko ug hilabihan nga kasagmuyo. Apan dihang gisultihan ko sa akong amiga sa iyang mga pakigbisog, aduna na akoy mas dakong kalooy sa paghupay kaniya tungod kay mas nakahibalo ko sa akong kaugalingong mga sala ug mga kahuyang sa tibuok nakong kinabuhi.
Nasayud na ako karon nga ang pagkadili mabination dili gayud makatarunganon. Si Jesukristo, nga mao ang atong hingpit nga ehemplo, mitinguha sa mga tawo nga gibiaybiay sa uban. Nakigsulti siya sa mga Samarianhon ug sa mga makasasala. Si Kristo, kinsa dili “makatan-aw diha sa sala uban sa labing gamay nga matang sa pagtugot” (Doktrina ug mga Pakigsaad 1:31), makatan-aw, “nato, nga ingon ka dili hingpit, nga dili mobiya sa kalisang ug kasagmuyo.”1 Mao nga sa seryoso kaayo nga panag-istoryahanay uban sa akong amiga, misulay ko sa paghunahuna kon unsay buhaton ni Jesus. Ang istorya mahitungod sa babaye nga nadakpan tungod sa pagpanapaw nakatabang nako kon unsaon sa pagtubag.
Pagtubag uban sa Kalooy
Ang mga escriba ug mga Pariseo nga nagsunod sa balaod ni Moises sa panahon sa pagpangalagad ni Jesus walay dakong kalooy. Dihay mga piho kaayo, kasagaran bangis, mga silot nga gitudlo alang sa mga sala, ug ang pagpanapaw nagkinahanglan og pagbato. Apan dihang ang mananapaw gidala ngadto kang Jesus, wala Siya masagmuyo—mipakita Siya og kalooy kaniya. Imbis mopahalipay sa mga tig-akusar nga nakakita og usa ka tawo nga nadakpan diha gayud sa akto, mipahinumdum Siya sa mga tig-akusar sa ilang kaugalingong mga sala (Juan 8:3–7). Sa tinuod, kita “nakasala man ang tanan, ug nakabsan sa himaya sa Dios” (Mga Taga-Roma 3:23). Si Kristo wala maghukom sa makasasala, ug kita dili gayud maghimo sa ingon (tan-awa sa Juan 13:34–35).
Dihang mibiya ang mga tig-akusar, nabuntog sa ilang mga konsensya, si Kristo misulti ngadto sa babaye. Ang iyang mga pulong diyutay apan talagsaon. Siya unang nangutana, “Babaye, hain na sila? wala bay mihukom kanimog silot?” Ug sa dihang siya mitubag nga sila namahawa, Siya yano nga miingon, “Dili usab ako mohukom kanimog silot: lumakaw ka, ug ayaw na pagpakasala” (Juan 8:10–11).
Ang pagpanghimaraut dili makatabang niining babaye nga mausab, apan ang Manluluwas nasayud nga ang gugma makahimo.
Lakaw, ug Ayaw na Pagpakasala
Ang gugma mao lamang ang unang lakang sa pagtabang sa tawo nga mabuntog ang pornograpiya. Ang proseso sa pagkaayo kanunay nga lahi sama sa indibidwal, apan adunay pipila ka sukaranang mga lakang nga kinahanglang buhaton sa tanang nakigbisog. Awhaga sila sa pagpakigkita sa ilang bishop; aduna siyay mga kapanguhaan ug mga himan nga makatabang. Kon angayan, tabangi sila sa pag-ila sa mga makapaagni nila ug paghimo og plano sa pagtabang kanila nga makalikay niini. Awhaga sila sa pagpakigkita og usa ka propesyonal o sa pag-apil og support group. Ug padayon sa paghigugma ug pagsuporta kanila sa tibuok proseso.
Si Kristo mipahayag og gugma ngadto sa babaye ug misiguro nga siya nasayud nga Siya dili gusto nga magpadayon siya sa iyang mga sala. Ang tinuod nga gugmang putli wala magpasabut nga ibaliwala nato ang mga kasaypanan sa uban; hinoon, naghimo kini nato nga makaamgo sa ilang mga potensyal ug moawhag kanato nga mopadayon sa pagtabang nila.
Usa ka Panaw sa Hugot nga Pagtuo
Gimahal na nako ang akong amiga, apan mas labaw nako siyang gimahal human siya misulti sa iyang sekreto. Bisan unsa pa ang nahimo nimo o sa tawo nga imong gimahal, “Imposible nga ang mahangturong kahayag sa Pag-ula ni Kristo dili moabut kaninyo.”2
Kon may nasayran ka nga usa ka tawo nga nakigbisog sa pornograpiya, ayaw sila hunungi sa pagtabang! Tabangi uban ang gugma ug kalooy sama sa gibuhat sa Manluluwas. Dili kini kanunay nga sayon; kini nga mga pakigbisog dili mawala diha-diha dayon. Magmapailubon sa imong minahal ug sa imong kaugalingon. Ang pagkat-on sa paghigugma ug pagsabut sa tawo nga nagsinati og sobra ka lisud nga butang dili kanunay nindot o sayon. Apan misalig ko nga ang tanang gugma nga atong gihatag dili makawang lamang, bisan unsa pa kataas o ang resulta sa panaw sa tawo nga atong gihigugma.